ଭୁବନେଶ୍ୱର,୨୦।୧୨ (ବ୍ୟୁରୋ):ଦୀର୍ଘ ଦିନର ଜେରା, ଚଢ଼ାଉ ସହ ଥାନା ଓ ଫୋରେନ୍ସିକ୍ ଲାବ୍ରୁ ଦସ୍ତାବିଜ ପାଇବା ସତ୍ତ୍ୱେ ଏଯାଏ ବ୍ଲାକ୍ମେଲର ଅର୍ଚ୍ଚନା ନାଗଙ୍କ କଳା ସାମ୍ରାଜ୍ୟର କାଣିଚାଏ ଗୁମର ଖୋଲିପାରି ନାହିଁ ପ୍ରବର୍ତ୍ତନ ନିର୍ଦ୍ଦେଶାଳୟ। ମାତ୍ର କିଛି ଲକ୍ଷ ଟଙ୍କାର ବେଆଇନ କାରବାର ଧରିଥିଲେ ମଧ୍ୟ ରାଜ୍ୟର ଏହି ବଡ଼ ହନିଟ୍ରାପ୍, ବ୍ଲାକ୍ମେଲିଂ ଓ ଠକେଇ ଘଟଣାରେ ପ୍ରଭାବଶାଳୀ ନେତା, ଅଫିସର, ପୋଲିସ ଓ ବ୍ୟବସାୟୀଙ୍କ ସମ୍ପୃକ୍ତିର ପ୍ରମାଣ ପାଇପାରି ନାହିଁ। ଇତିମଧ୍ୟରେ ଅର୍ଚ୍ଚନାଙ୍କ ଦ୍ୱିତୀୟ ପର୍ଯ୍ୟାୟ ରିମାଣ୍ଡ ସରିଥିବାବେଳେ କୋର୍ଟ ଆଉ ରିମାଣ୍ଡ ଦେବାକୁ ମନା କରିଛନ୍ତି। ଏପରିସ୍ଥିତିରେ ବେଆଇନ ଆର୍ଥିକ କାରବାରରେ ବଡ଼ବଡ଼ିଆଙ୍କ ଲିଙ୍କ୍ ନେଇ ଇଡି ଅଧିକାରୀମାନେ ହାସଲ କରିଥିବା ତଥ୍ୟର ସତ୍ୟତା ଜାଣି ନ ପାରି ଦ୍ୱନ୍ଦ୍ୱରେ ପଡିଥିବା କୁହାଯାଉଛି। ରବିବାର ଅର୍ଚ୍ଚନାଙ୍କ ରିମାଣ୍ଡ ସରିବା ପରେ ସୋମବାର ଇଡି ତାଙ୍କୁ କୋର୍ଟରେ ହାଜର କରିଥିଲା। ଏହି ସମୟରେ ଅର୍ଚ୍ଚନାଙ୍କୁ ପୁଣି ଥରେ ତୃତୀୟ ପର୍ଯ୍ୟାୟ ପାଇଁ ୨ ଦିନିଆ ରିମାଣ୍ଡରେ ନେବା ପାଇଁ ଇଡି କୋର୍ଟଙ୍କ ନିକଟରେ ଆବେଦନ କରିଥିଲା। ହେଲେ କୋର୍ଟ ଏହାର ଶୁଣାଣି କରି ରିମାଣ୍ଡ ଆବେଦନକୁ ଖାରଜ କରିଦେଇଛନ୍ତି। ଫଳରେ ଅର୍ଚ୍ଚନା ପୁଣି ଥରେ ଝାରପଡ଼ା ଜେଲ ହାଜତକୁ ଫେରି ଯାଇଛନ୍ତି। ତେବେ କୋର୍ଟକୁ ପ୍ରବେଶ ସମୟରେ ଅର୍ଚ୍ଚନାଙ୍କୁ ଗଣମାଧ୍ୟମ ପ୍ରତିନିଧିମାନେ ପ୍ରତିକ୍ରିୟା ରଖିବାକୁ ବାଧ୍ୟ କରିଥିଲେ। ‘ସବୁ କହିଛି, କହିବି, କାହାକୁ ଛାଡ଼ିବିନି’ ବୋଲି ଅର୍ଚ୍ଚନା କହିଥିଲେ। ହେଲେ ଅର୍ଚ୍ଚନା ସହଯୋଗ କରି ନ ଥିବା ଓ ଏହି ମାମଲାରେ କିଛି କହୁ ନ ଥିବା ଇଡି ସୂଚନା ଦେଉଥିବାରୁ ସନ୍ଦେହ ଦୃଢ଼ୀଭୂତ ହୋଇଛି।
ପ୍ରଥମ ପର୍ଯ୍ୟାୟରେ ୭ ଦିନ ଓ ଦ୍ୱିତୀୟ ପର୍ଯ୍ୟାୟରେ ୬ଦିନ ପାଇଁ ରିମାଣ୍ଡରେ ଆସି ଅର୍ଚ୍ଚନା ଚୁପ୍ ରହିଥିଲେ। ତେଣୁ ଆଉ ୨ ଦିନ ରିମାଣ୍ଡରେ ନେଇ କିଛି ପ୍ରମାଣ ପାଇବାକୁ ଇଡି ଆଶା ରଖିଥିଲା। ହେଲେ କୋର୍ଟ ଏହି ଆବେଦନକୁ ଖାରଜ କରିବା ପରେ ଇଡିର ଯୋଜନା ଫେଲ୍ ମାରିଛି। ଅପରପକ୍ଷରେ ଅର୍ଚ୍ଚନାଙ୍କ ସ୍ବାମୀ ଜଗବନ୍ଧୁ ଚାନ୍ଦଙ୍କ ୯ ଦିନିଆ ରିମାଣ୍ଡରୁ ଆଉ ୩ଦିନ ବାକି ରହିଛି। ସେ ଗତ ୧୪ ତାରିଖରୁ ରିମାଣ୍ଡରେ ଆସି ଜେରାର ସମ୍ମୁଖୀନ ହେଉଛନ୍ତି। ଆଗାମୀ ବୁଧବାର ତାଙ୍କର ରିମାଣ୍ଡ ସରିବ। ଏହି ସମୟ ମଧ୍ୟରେ ଜଗବନ୍ଧୁଙ୍କଠାରୁ ଅଧିକ ତଥ୍ୟ ହାସଲ କରିବାକୁ ଇଡି ଶେଷ ଆଶା ରଖିଛି।
