ରାଜନଗର,୧୨ା୭(ଭାସ୍କର ରାଉତରାୟ): ଜାତୀୟ ପାଣିପାଗ ସୂଚନା ଅନୁସାରେ ଜୁନ୍ ପ୍ରଥମ ସପ୍ତାହରେ ମୌସୁମୀର ଆଗମନ ହୋଇଥିଲା। ମୌସୁମୀର ଆଗମନ ଖବର ଚାଷୀଭାଇଙ୍କ ମଧ୍ୟରେ ଆନନ୍ଦ ଖେଳାଇ ଦେଇଥିଲା। କିନ୍ତୁ ମୌସୁମୀ ଉଭ୍ଭାନ ହୋଇଯାଇଛି। ମାସେ ବିତି ଯାଇଥିଲେ ମଧ୍ୟ ବର୍ଷାର ନାଁ ଗନ୍ଧ ନାହିଁ । ଏପଟେ ଆଶାଢ଼ ସରିବାକୁ ବସିଲାଣି। ଚାଷୀ ଏହାକୁ ନେଇ ଆଶଙ୍କା ଭିତରେ ରହିଛନ୍ତି। ଯେଉଁଠି ଆଷାଢ଼ରେ ଚାଷଜମିରେ ଧାନ ତଳି ରୁଆ, ବେଉଷଣ ହେବା କଥା, ସେହି ଜମି ଏବେ ବେଣା ଓ ଘାସବୁଦାମାନ ଶୋଭା ପାଉଛି। ଆଷାଢରେ ଚାଷଜମି ଏବେ ଗୋଚର ଭୂଇଁରେ ପରିଣତ ହେବାକୁ ଯାଉଛି। ଚାଷୀକୁଳ ଏବେ ହା ହୁତାଶରେ ଦିନ କାଟୁଛନ୍ତି।
ରାଜନଗରର ଗୌରାଙ୍ଗ ରାଉତ, କାଙ୍ଗାଳି ଚରଣ ପ୍ରଧାନ, ଉମେଶ ଚନ୍ଦ୍ର ଦାସ, ବାସୁଦେବ ସାହୁ, ବୁଦ୍ଧିରାମ ପ୍ରଧାନ ପ୍ରମୁଖ କ୍ଷୋଭ ଭରା କଣ୍ଠରେ କୁହନ୍ତିି ଯେ, ଦୀର୍ଘ କେତେବର୍ଷ ହେବ, ବିଳମ୍ବରେ ବର୍ଷା ହେଲେ ବି ଭଲ ମନ୍ଦରେ ଚାଷୀ ବିଲରେ ବୁଦା ମାରେ। ଠିକ୍ ଧାନ ସମୟରେ ଅଦିନିଆ ବର୍ଷା ତାଣ୍ଡବ ସାଜେ, ତଥାପି ଦୁଃଖ କଷ୍ଟେ ଧାନ ଗଣ୍ଡା ଅମଳ କରୁ।
ଚଳିତବର୍ଷ ରାଜନଗର ବ୍ଲକରେ ୧୮ ହଜାର ହେକ୍ଟର ଚାଷଜମିରେ ଚାଷକାର୍ଯ୍ୟ ଲକ୍ଷ୍ୟ ରଖାଯାଇଥିଲା। ଏଥିପାଇଁ ରଜ ପରେ ଚାଷୀମାନେ ଜମିରେ ବତୁରି ଧାନ ତଳି ରଜ ପରେ ପରେ ବୁଣିଥିଲେ। ବର୍ଷା ଅଭାବରୁ ତଳିଗୁଡିକ ଖରାରେ ନଷ୍ଟ ହେବାକୁ ବସିଲାଣି। ଆଷାଢରେ ଆଶା ଜନକ ବର୍ଷା ହୋଇଥିଲେ ଚାଷୀ ଆଛରା ତଳି ପକାଇ ତତ୍କାଳ ଜମିଗୁଡିକରେ ରୁଆ, ବେଉଷଣ କରିଥାନ୍ତେ। କିନ୍ତୁ ନିଅଁଟିଆ ବର୍ଷା ଯୋଗୁଁ ଚାଷୀମାନେ ଚାତକପକ୍ଷୀ ଭଳି ମୁକ୍ତ ଆକାଶକୁ ଚାହିଁ ବସିଛନ୍ତି। ଜୁନ୍ ୧୦ରେ ମୌସୁମୀ ଆଗମନ ଖବର ଏବଂ ଏବର୍ଷ ପାଞ୍ଜିକାରମାନଙ୍କ ଗଣନାରେ ୧୦୦ଦିନ ପାଳକ ଲେଖାଥିବା ବେଳେ ପ୍ରକୃତି କୃର ହେବାରେ ଲାଗିଛି। ଅବିଭକ୍ତ କଟକ ଜିଲାର ବଂଗୋପସାଗର ତଟବର୍ତ୍ତୀ ରାଜନଗର-ପଟ୍ଟାମୁଣ୍ଡାଇ ବ୍ଲକ ଏକଦା ଭାତହାଣ୍ଡି ଭାବରେ ସୁଖ୍ୟାତି ଅର୍ଜନ କରିଥିଲା। ବ୍ରିଟିଶ ଅମଳରୁ ଏଠିକାର ୮୦ଭାଗ ଲୋକେ ଚାଷ ଉପରେ ହିଁ ଆତ୍ମନିର୍ଭଶୀଳ। ଅଣଜଳସେଚିତ ଅଞ୍ଚଳ ହୋଇଥିବାରୁ ବର୍ଷକରେ ମାତ୍ର ଖରିଫ ଧାନଚାଷ ଏଠିକାର ଜୀବନର ମାନଦଣ୍ଡ। ଦୀର୍ଘ ଦୁଇ ଦଶନ୍ଧି ଧରି ବଂଗୋପସାଗରରୁ ସୃଷ୍ଟି ଛୋଟ ବଡ଼ ବାତ୍ୟା ହେଉ ବା ସାମୁଦ୍ରିକ ଝଡ଼ ଚାଷୀଙ୍କ ମେରୁଦଣ୍ଡକୁ ଟାଣି ଓଟାରି ଭାଙ୍ଗିବାରେ ଲାଗିଛି। ତଥାପି ପ୍ରକୃତିର ତାଡନାକୁ ସହ୍ୟ କରି ଅଣ୍ଟା ସଳଖି ପ୍ରତିବର୍ଷ ଚାଷୀ ଚାଷ ପାଇଁ ଧାରକରଜ, କୃଷି ଋଣ ଆଦିକୁ ପାଥେୟ କରି ଚାଷ ପାଇଁ ଅଣ୍ଟା ଭିଡେ। କିନ୍ତୁ ପ୍ରକୃତିର ବିବର୍ତ୍ତମାନ, ବିଶ୍ୱତାପନ, ଜଳବାୟୁର ପରିବତ୍ତନ ଚାଷ ଉପରେ ଗୁରୁତର ପ୍ରଭାବ ଓ କାୟା ବିସ୍ତାର କରି ଚାଲିଛି। ଚାଷ ବିଳମ୍ବ ହେଉଥିବାରୁ ଏଠାକାର ବହୁ ଚାଷୀ ପରିବାର ପ୍ରତି ପୋଷଣ ପାଇଁ ଗୁପ୍ତି, ସାତଭାୟା, ତାଳଚୁଆ, ରାଜନଗରଠାରୁ ଅନ୍ୟ ରାଜ୍ୟରେ ଦାଦନ ଖଟିବାକୁ ମାଳମାଳ ବସ୍ ଯୋଗେ ବାଧ୍ୟ ହୋଇଯାଉଥିବା ଅଭାବନୀୟ ଦୃଶ୍ୟ ଦେଖିବାକୁ ମିଳୁଛି।
