ନୂଆଦିଲ୍ଲୀ,୧୫।୧୧: ଭାରତ ସଞ୍ଚାର ନିଗମ ଲିମିଟେଡ (ବିଏସଏନଏଲ) ଭାରତରେ ପ୍ରଥମ ‘ସାଟେଲାଇଟ-ଟୁ-ଡିଭାଇସ’ ସେବା ଆରମ୍ଭ କରିଛି, ଯାହା ଦେଶର ବହୁ ଦୂରବର୍ତ୍ତୀ ଅଞ୍ଚଳରେ ମଧ୍ୟ ସଂଯୋଗ ଯୋଗାଇବ। ଟେଲି ଯୋଗାଯୋଗ ବିଭାଗ (DoT) ଏହା ଘୋଷଣା କରି କହିଛି ଯେ, ଆମେରିକୀୟ କମ୍ପାନୀ Viasatଙ୍କ ସହଯୋଗରେ ଏହି ସେବା ଆରମ୍ଭ ହୋଇଛି। ଏହି ନୂତନ ଟେକ୍ନୋଲୋଜିର ଉଦ୍ଦେଶ୍ୟ ହେଉଛି,ଯେଉଁଠାରେ ସାଧାରଣ ମୋବାଇଲ ନେଟୱାର୍କ ପହଞ୍ଚେ ନାହିଁ ସେହି କ୍ଷେତ୍ରରେ ସଂଯୋଗ ଯୋଗାଇବା।
ଆଜି ମଧ୍ୟ ଭାରତରେ ଅନେକ କ୍ଷେତ୍ର ଅଛି ଯେଉଁଠାରେ ଜିଓ, ଏୟାରଟେଲ, ଭୋଡାଫୋନ-ଆଇଡିଆ ସମେତ କୌଣସି ଟେଲିକମ କମ୍ପାନୀର ନେଟୱାର୍କ ଉପଲବ୍ଧ ନୁହେଁ, ଯେଉଁ କାରଣରୁ ସେଠାରେ ରହୁଥିବା ଲୋକମାନେ ଟେଲିକମ ସଂଯୋଗର ଲାଭ ଉଠାଇବାକୁ ସକ୍ଷମ ନୁହଁନ୍ତି। ବିଶେଷକରି ପାହାଡ଼ିଆ ଏବଂ ଜଙ୍ଗଲ ଅଞ୍ଚଳରେ ଏହା ଘଟେ। ଲୋକଙ୍କ ଏହି ସମସ୍ୟାକୁ ଦୂର କରିବା ପାଇଁ ବିଏସ୍ଏନ୍ଏଲ ଭାରତରେ ପ୍ରଥମ ଥର ପାଇଁ ସାଟେଲାଇଟ-ଟୁ-ଡିଭାଇସ ସେବା ଆରମ୍ଭ କରିଛି, ଯାହା ମାଧ୍ୟମରେ ଲୋକମାନେ ଫୋନ ନେଟୱାର୍କ ବିନା ଟେଲିକମ ସଂଯୋଗ ବ୍ୟବହାର କରିପାରିବେ।
ଏହି ସେବା ପ୍ରଥମେ ଇଣ୍ଡିଆ ମୋବାଇଲ କଂଗ୍ରେସ (ଆଇଏମ୍ସି ୨୦୨୪) ରେ ଆରମ୍ଭ କରାଯାଇଥିଲା। ଭାରତରେ ଡିଜିଟାଲ ବିଭାଜନକୁ ହ୍ରାସ କରିବା ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ବିବେଚନା କରାଯାଉଛି। ବିଏସ୍ଏସ୍ଏଲ୍ ଅନୁଯାୟୀ, ‘ସାଟେଲାଇଟ-ଟୁ-ଡିଭାଇସ’ ସେବାର ପରୀକ୍ଷା ଶେଷ ହୋଇଛି ଏବଂ ଏହା ବିଭିନ୍ନ ଚ୍ୟାଲେଞ୍ଜ କ୍ଷେତ୍ରରେ ମଧ୍ୟ ସ୍ଥିର ସଂଯୋଗ ଯୋଗାଇବାରେ ସକ୍ଷମ ଅଟେ। DoT ଏହା ଘୋଷଣା କରିଛି। କିଛି ମୋବାଇଲ ବ୍ରାଣ୍ଡ ବୈଶିଷ୍ଟ୍ୟଗୁଡିକ ଲଞ୍ଚ କରିଥିଲେ, ଯାହା ଜରୁରୀକାଳୀନ ପରିସ୍ଥିତିରେ ଉପଗ୍ରହ ସଂଯୋଗ ଯୋଗାଇଥାଏ, କିନ୍ତୁ ସେଗୁଡ଼ିକ କେବଳ ଜରୁରୀକାଳୀନ ସେବାରେ ସୀମିତ। ବର୍ତ୍ତମାନ ସାଧାରଣ ନାଗରିକମାନେ ମଧ୍ୟ ଦୁର୍ଗମ ଅଞ୍ଚଳରେ ବିଏସ୍ଏସ୍ଏଲ୍ର ଏହି ସେବା ସହିତ ସଂଯୋଗ କରିପାରିବେ।
ବିଏସ୍ଏସ୍ଏଲ୍ର ଏହି ଉପଗ୍ରହ ନେଟୱାର୍କ ବ୍ୟବହାରକାରୀଙ୍କୁ ଜରୁରୀକାଳୀନ କଲ, SOS ବାର୍ତ୍ତା ଏବଂ ଏପରିକି ୟୁପିଆଇ ପେମେଣ୍ଟରେ ସାହାଯ୍ୟ କରିବ। ତେବେ ସାଧାରଣ କଲ ଏବଂ ଏସଏମଏସ ପାଇଁ ଏହି ବୈଶିଷ୍ଟ୍ୟ ଉପଲବ୍ଧ ହେବ କି ନାହିଁ କମ୍ପାନୀ ସ୍ପଷ୍ଟ କରିନାହିଁ।
