ନୂଆଦିଲ୍ଲୀ: ନ୍ୟାଶନାଲ ହାଇଓ୍ବେରେ ଯାତ୍ରା କରୁଥିଲେ ଫାସ୍ଟାଗ୍ ରଖିବା ଜରୁରୀ। ଯଦି ଆପଣ ଫାସ୍ଟାଗ୍ ବ୍ୟବହାର କରୁଛନ୍ତି ତେବେ ବର୍ତ୍ତମାନ ଏଥିରେ ପରିବର୍ତ୍ତନ ହୋଇଥିବା ନିୟମ ସମ୍ପର୍କରେ ଜାଣିରଖିବା ଜରୁରୀ। ଫାସ୍ଟାଗ୍ରେ ବର୍ତ୍ତମାନ ମିନିମମ୍ ବାଲାନ୍ସ ନ ରଖିଲେ କୌଣସି ଅସୁବିଧା ନାହିଁ। ନ୍ୟାଶନାଲ ହାଇଓ୍ବେ ଅଥରିଟି ଅଫ୍ ଇଣ୍ଡିଆ(ଏନ୍ଏଚ୍ଏଆଇ) ପକ୍ଷରୁ ଏ ନେଇ ନିଷ୍ପତ୍ତି ଗ୍ରହଣ କରାଯାଇଛି। ଏହି ସୁବିଧା କେବଳ କାର୍, ଜିପ୍ ଏବଂ ଭ୍ୟାନ୍ ପାଇଁ ଲାଗୁ ହେବ। ବାଣିଜି୍ୟକ ଯାନଗୁଡ଼ିକୁ ଏଥିରୁ ବାଦ୍ ଦିଆଯାଇଛି। ଏନ୍ଏଚ୍ଏଆଇ ପକ୍ଷରୁ ମିଳିଥିବା ସୂଚନା ମୁତାବକ, ଫାସ୍ଟାଗ୍ ଜାରି କରୁଥିବା ବ୍ୟାଙ୍କ ସିକ୍ୟୁରିଟି ଜମାକୁ ଛାଡ଼ିଦେଲେ କୌଣସି ମିନିମମ୍ ବାଲାନ୍ସ ରଖିବା ନେଇ ବାଧ୍ୟ କରିପାରିବେ ନାହିଁ। ପୂର୍ବରୁ ସିକ୍ୟୁରିଟି ଜମା ବାଦ୍ ମିନିମମ୍ ବାଲାନ୍ସ ରଖିବା ନେଇ ବ୍ୟାଙ୍କ କହୁଥିଲେ। ୧୫୦ରୁ ୨୦୦ ଟଙ୍କାର ମିନିମମ୍ ବାଲାନ୍ସ ରଖିବା ନେଇ ଲୋକଙ୍କୁ କୁହାଯାଉଥିଲା। ଫାସ୍ଟାଗ୍ ଆକାଉଣ୍ଟରେ ଅର୍ଥ ରହିଥିଲେ ମଧ୍ୟ ମିନିମମ୍ ବାଲାନ୍ସ ଯୋଗୁ ଟୋଲ୍ ପ୍ଲାଜାରେ ଲୋକଙ୍କୁ ବିଭିନ୍ନ ସମସ୍ୟା ସାମ୍ନା କରିବାକୁ ପଡୁଥିଲା। ଯଦି ଫାସ୍ଟାଗ୍ ଆକାଉଣ୍ଟରେ ବାଲାନ୍ସ ନେଗେଟିଭ ନ ଥାଏ ତେବେ ଟୋଲ୍ ପ୍ଲାଜାରେ ଯିବା ବେଳେ ଅନୁମତି ମିଳିବ। ଆକାଉଣ୍ଟରେ କମ୍ ଅର୍ଥ ରାଶି ଥିଲେ ମଧ୍ୟ ଯିବାରେ କୌଣସି ସମସ୍ୟା ନାହିଁ। ଟୋଲ୍ ପ୍ଲାଜା ପାରହେବା ପରେ ଆକାଉଣ୍ଟ ନେଗେଟିଭ ହେଲେ ମଧ୍ୟ ଚଳିବ। ଯଦି ଗ୍ରାହକ ଏହାକୁ ରିଚାର୍ଜ କରୁନାହାନ୍ତି ତେବେ ନେଗେଟିଭ ଆକାଉଣ୍ଟ ଅର୍ଥ ସିକ୍ୟୁରିଟି ଜମାରୁ ଆଦାୟ କରାଯାଇପାରିବ। ସୂଚନାଯୋଗ୍ୟ ଦେଶ ମଧ୍ୟରେ ବର୍ତ୍ତମାନ ୨.୫୪ କୋଟିରୁ ଊର୍ଦ୍ଧ୍ୱ ଫାସ୍ଟାଗ୍ ୟୁଜର ରହିଛନ୍ତି।
