ଅନୁଗୋଳ ଅଫିସ, ୧୩।୧୨: ସହର, ବଜାର କିମ୍ବା କଲୋନୀ ଅଞ୍ଚଳ ରାସ୍ତାରେ ଦ୍ରୁତଗତିରେ ଗାଡ଼ି ଚାଳନା ଉପରେ କଟକଣା ରହିଛି। ଏପରି କି ଡାକ୍ତରଖାନା, ସ୍କୁଲ ନିକଟରେ ଉଚ୍ଚଶବ୍ଦରେ ହର୍ନକୁ ମଧ୍ୟ ବାରଣ କରାଯାଇଛି। ଏହାର ଉଲ୍ଲଂଘନ ହେଲେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିବା କଥା। କିନ୍ତୁ ଅନୁଗୋଳ ସହରରେ ଏପରି କଟକଣାକୁ ଖାତିର କରାଯାଉ ନ ଥିବା ଦୈନିକ ଦେଖାଯାଉଥିଲେ ମଧ୍ୟ ପୋଲିସ ଓ ପରିବହନ କର୍ତ୍ତୃପକ୍ଷ ନୀରବଦ୍ରଷ୍ଟା ସାଜିଛନ୍ତି।
ଅନୁଗୋଳ ସହର ମଧ୍ୟଦେଇ ୫୫ନଂ. ଜାତୀୟ ରାଜପଥ ଯାଇଥିବାରୁ ଅନେକ ସମୟରେ ଟ୍ରାଫିକ ସମସ୍ୟା ସୃଷ୍ଟି ହେଉଛି। ବିଶେଷକରି ଭାରିଯାନ ଚଳାଚଳକୁ ଏଠାରେ ନିୟନ୍ତ୍ରଣ କରାଯାଇ ପାରୁନାହିଁ। ସହରରେ ଲୋକସଂଖ୍ୟା ବଢ଼ୁଥିବାବେଳେ ଶିଳ୍ପବହୁଳ ଜିଲା ହୋଇଥିବାରୁ ଦୈନିକ ବାହାର ଅଞ୍ଚଳରୁ ସହସ୍ରାଧିକ ଲୋକଙ୍କ ଆତଯାତ ହେଉଛି। ତେଣୁ ସହରାଞ୍ଚଳ ରାସ୍ତାରେ ସର୍ବଦା ଭିଡ଼ ଲାଗିରହୁଛି। ଏହାକୁ ଦୃଷ୍ଟିରେ ରଖି ଗାଡ଼ିର ବେଗ ନିୟନ୍ତ୍ରଣ ନିମନ୍ତେ ବିଭିନ୍ନ ରାସ୍ତାରେ ସୂଚନା ଫଳକ ଲଗାଯାଇଛି। କିନ୍ତୁ ରାଜପଥରେ ଟ୍ରକ୍, ବସ୍, କାର୍ ଆଦି କଟକଣା ମାନୁ ନ ଥିବାବେଳେ ସ୍ପିଡ୍ ବାଇକଗୁଡ଼ିକ ଅଧିକ ଚିନ୍ତାର କାରଣ ହୋଇଛି। ଭିଆଇପି ରୋଡ୍ରେ ଥିବା ଏସ୍ପିଙ୍କ ଆବାସିକ କାର୍ଯ୍ୟାଳୟ, ଉତ୍ତରକେନ୍ଦ୍ରାଞ୍ଚଳ ଡିଆଇଜିଙ୍କ ଆବାସିକ କାର୍ଯ୍ୟାଳୟ ସହ ମେଡିକାଲ, କୋର୍ଟ, ଥାନା, ଜିଲା କାର୍ଯ୍ୟାଳୟ, ଏସ୍ପି କାର୍ଯ୍ୟାଳୟ, ସ୍କୁଲ ନିକଟରେ ମଧ୍ୟ କଟକଣାର ଉଲ୍ଲଂଘନ ହେଉଛି। ବିକଟାଳ ହର୍ନ ଶବ୍ଦ ପ୍ରଦୂଷଣ ବଢ଼ାଉଛି। ପୋଲିସ କିମ୍ବା ପରିବହନ ବିଭାଗ ପକ୍ଷରୁ ନିୟମିତ ଯାଞ୍ଚ କରାଯାଉ ନ ଥିବାରୁ ସହରବାସୀଙ୍କ କ୍ଷେତ୍ରରେ ଦୁର୍ଘଟଣା ଆଶଙ୍କା ବଢ଼ିଯାଉଛି। ଲୁଟେରା ଓ ଛିନ୍ତାଇ ଗ୍ୟାଙ୍ଗ ସହରରେ ଲୁଟ୍ପାଟ କରି ଫେରାର ହୋଇଯାଉଛନ୍ତି। ଗତ ସପ୍ତାହରେ ବିଇଡି କଲେଜ କଲୋନୀ ନିକଟ, ଗୀତାଗ୍ରାମ ଅଞ୍ଚଳ ଓ ଗାନ୍ଧୀ ମାର୍ଗରେ ମହିଳାମାନଙ୍କଠାରୁ ବ୍ୟାଗ, ଚେନ୍ ଆଦି ଛିନ୍ତାଇ କରାଯାଇଛି। ତଥାପି ପୋଲିସ କିମ୍ବା ପରିବହନ କର୍ତ୍ତୃପକ୍ଷ ସତର୍କ ହୋଇ ନ ଥିବାରୁ ଅସନ୍ତୋଷ ଦେଖାଦେଇଛି।
ରଫ୍ ଡ୍ରାଇଭ୍ରେ କେସ୍ ବୁକ୍ ହେଉଛି
ଦ୍ରୁତ ଗତିରେ ଗାଡ଼ି ଚାଳନା କଲେ କାର୍ଯ୍ୟାନୁଷ୍ଠାନ ଗ୍ରହଣ ନିୟମ ରହିଛି। ଗାଡ଼ି ସିଜ୍ କରାଯାଇ ମାମଲା ରୁଜୁ କରାଯାଉଛି। ସହରରେ ଦ୍ରୁତ ଗତିରେ ଗାଡ଼ି ଚାଳନା କରୁଥିବା ଚାଳକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
-ବିଭବ ରଞ୍ଜନ ସାମନ୍ତସିଂହାର, ଆଞ୍ଚଳିକ ପରିବହନ ଅଧିକାରୀ
ସ୍ପେଶାଲ ଡ୍ରାଇଭ ହେବ
ଦ୍ରୁତଗତିରେ ଗାଡ଼ି ଚଳାଉଥିବା ଚାଳକଙ୍କଠାରୁ ଜରିମାନା ଆଦାୟ କରାଯାଉଛି। ଗାଡ଼ି ମଧ୍ୟ ଜବତ ହେଉଛି। ବିଭିନ୍ନ ସ୍ଥାନରେ ନାକା ଲଗାଯାଇ ନଜର ରଖାଯାଉଛି। ସମସ୍ତ ଥାନା ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ଏ ନେଇ ସ୍ପେଶାଲ ଡ୍ରାଇଭ ମଧ୍ୟ କରାଯିବ।
-ଜଗମୋହନ ମୀନା, ଅନୁଗୋଳ ଏସ୍ପି
