ନୂଆଦିଲ୍ଲୀ, ୧୪ା୪(ଆଇଏଏନ୍ଏସ୍): ୨୦୨୪ ଲୋକ ସଭା ନିର୍ବାଚନରେ ଭାଜପାକୁ ପରାସ୍ତ କରିବା ଲାଗି ବିହାର ମୁଖ୍ୟମନ୍ତ୍ରୀ ତଥା ଜେଡିୟୁ ନେତା ନୀତୀଶ କୁମାର ଅଣ୍ଟା ଭିଡ଼ିଛନ୍ତି। ୩ ଦିନିଆ ନୂଆଦିଲ୍ଲୀ ଗସ୍ତରେ ଥିବା ନୀତୀଶ ସବୁ ଅଣଭାଜପା ଦଳଙ୍କୁ ଏକାଠି କରିବା ଲାଗି ଉଦ୍ୟମ ଜାରି ରଖିଛନ୍ତି। ଏହି କ୍ରମରେ ସେ ବୁଧବାର କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ, ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଏବଂ ଏଏପି ନେତା ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ଭେଟି ମିଳିତ ରଣନୀତି ଉପରେ ଆଲୋଚନା କରିଥିଲେ। ଗୁରୁବାର ସେ ସିପିଆଇ(ଏମ୍) ସାଧାରଣ ସମ୍ପାଦକ ସୀତାରାମ ୟେଚୁରୀ, ସିପିଆଇ ନେତା ଡି. ରାଜା ଏବଂ ଅନ୍ୟ ନେତାମାନଙ୍କୁ ଭେଟି ବିରୋଧୀ ଏକତା ନେଇ କଥା ହୋଇନ୍ତି। ଧର୍ମନିରପେକ୍ଷ ନୀତି ଆଦର୍ଶର ସମସ୍ତ ଗଣତାନ୍ତ୍ରିକ ଦଳ ଏକାଠି ହେବା ଆବଶ୍ୟକ। ବାମଦଳ ସବୁବେଳେ ଏହା ଉପରେ ବିଶ୍ୱାସ କରେ ବୋଲି ଆଲୋଚନା ଶେଷରେ ୟେଚୁରୀ ଗଣମାଧ୍ୟମକୁ କହିଛନ୍ତି। ଆଜି ଆମକୁ ଆମ ଦେଶ, ସମ୍ବିଧାନ ଓ ଗଣତନ୍ତ୍ରକୁ ସୁରକ୍ଷା ଦେବାକୁ ହେବ। ଏତ୍ଥପାଇଁ ଭାଜପାକୁ ପରାସ୍ତ କରି କେନ୍ଦ୍ରରେ ସରକାର ଗଢ଼ିବା ଜରୁରୀ। ଅଣଭାଜପା ଭୋଟ ବିଭାଜନକୁ ରୋକିବା ଆମର ମୂଳ ଲକ୍ଷ୍ୟ ହେବା ଆବଶ୍ୟକ। ଏଥିପାଇଁ ସବୁ ଦଳ ଏକାଠି ହେବାକୁ ପଡ଼ିବ ବୋଲି ୟେଚୁରୀ କହିଥିଲେ। ଖୁବ୍ଶୀଘ୍ର ସବୁ ବିରୋଧୀ ଦଳ ବୈଠକରେ ସାମିଲ ହେବେ। ସେଠାରେ ମିଳିତ ରଣନୀତି ପ୍ରସ୍ତୁତ ହେବ ବୋଲି ସିପିଆଇ(ଏମ୍) ନେତା କହିଛନ୍ତି। ଆଗକୁ ନୀତୀଶ ସମାଜବାଦୀ ପାର୍ଟି ନେତା ଅଖିଳେଶ ଯାଦବ ଏବଂ ଏନ୍ସିପି ନେତା ଶରଦ ପାଓ୍ବାରଙ୍କୁ ଭେଟିବେ ବୋଲି ସୂତ୍ରରୁ ଜଣାପଡ଼ିଛି। ବିହାର ମୁଖ୍ୟମନ୍ତ୍ରୀଙ୍କ ଉଦ୍ୟମକୁ ଐତିହାସିକ ବୋଲି କଂଗ୍ରେସ ଅଧ୍ୟକ୍ଷ ଖାର୍ଗେ କହିଥିଲେ।
