ସୋନପୁର,୪।୬(ମୃତ୍ୟୁଞ୍ଜୟ ଶତପଥୀ): ସରକାର ପରିବର୍ତ୍ତନ ହାଓ୍ବା ସତ୍ତ୍ୱେ ବିଜେଡିର ହେବିଓ୍ବେଟ୍ ନେତା ତଥା ପ୍ରାକ୍ତନ ମନ୍ତ୍ରୀ ନିରଞ୍ଜନ ପୂଜାରୀ ସୋନପୁର ବିଧାନସଭା ଆସନରୁ ବିଜୟୀ ହୋଇଛନ୍ତି। ସେ କ୍ରମାଗତ ଭାବେ ଷଷ୍ଠ ଥର ପାଇଁ ବିଜୟୀ ହୋଇ ରେକର୍ଡ ସୃଷ୍ଟି କରିଛନ୍ତି। ବିଜେଡି ବିଧାୟକ ପ୍ରାର୍ଥୀ ନିରଞ୍ଜନ ପୂଜାରୀଙ୍କୁ ୯୭ହଜାର ୫୪୦ଖଣ୍ଡ ଭୋଟ ମିଳିଥିବା ବେଳେ ତାଙ୍କର ନିକଟତମ ପ୍ରାର୍ଥୀ ଭାଜପାର ପ୍ରମୋଦ ମହାପାତ୍ରଙ୍କୁ ୮୨ହଜାର ୪୧୯ଖଣ୍ଡ ଭୋଟ ମିଳିଛି। ସେହିପରି କଂଗ୍ରେସ ପ୍ରାର୍ଥୀ ପ୍ରିୟବ୍ରତ ସାହୁ ୨୦ହଜାର ୧୩୧ଖଣ୍ଡ ଭୋଟ ପାଇଛନ୍ତି। ନିରଞ୍ଜନ ୧୫ହଜାର ୧୨୧ଖଣ୍ଡ ଭୋଟ ବ୍ୟବଧାନରେ ବିଜୟୀ ହୋଇଛନ୍ତି। ନିରଞ୍ଜନଙ୍କୁ ଡୁଙ୍ଗୁରିପାଲି ବ୍ଲକରେ ଅପେକ୍ଷାକୃତ କମ ଭୋଟ ମିଳିଥିବା ବେଳେ ସୁବର୍ଣ୍ଣପୁର ସହର, ତରଭା ଓ ସୋନପୁର ବ୍ଲକରେ ଅଧିକ ଭୋଟ ମିଳିଛି। ବିଜୟ ପରେ ନିରଞ୍ଜନ ଜିଲାର ଇଷ୍ଟଦେବୀ ମା’ ସୁରେଶ୍ୱରୀଙ୍କୁ ଦର୍ଶନ କରି ଆଶୀର୍ବାଦ ଭିକ୍ଷା କରିଛନ୍ତି। ଅନ୍ୟପକ୍ଷେ ଭାଜପା ଏମ୍ପି ପ୍ରାର୍ଥୀନୀ ସଙ୍ଗୀତା କୁମାରୀ ସିଂହଦେଓଙ୍କୁ ସୁବର୍ଣ୍ଣପୁର ଜିଲାରୁ ଅଧିକ ଭୋଟ ମିଳିଛି।
