ପୁରୀ ଅଫିସ,୧୦।୯: ଦିନ ଥିଲା, କେହି ପାରିବାରିକ ନିର୍ଯାତନା ଯୋଗୁ ତ ଆଉ କେହି ପରିବାରକୁ ହରାଇବା ଦୁଃଖରେ ରାସ୍ତାକୁ ଚାଲିଆସି ଭିକ୍ଷାବୃତ୍ତିକୁ ଆପଣେଇଥିଲେ। ଭୋକର ଜ୍ୱାଳା ମେଣ୍ଟାଇବାକୁ ବଡ଼ଦାଣ୍ଡରେ ଖରାବର୍ଷାର ଦାଉ ସହୁଥିଲେ। ଏବେ କିନ୍ତୁ ସେମାନେ ଆଉ କାହା ଆଗେ ହାତ ପାତୁନାହାନ୍ତି। ସ୍ବାବଲମ୍ବୀ ହୋଇ ଦୁଇ ପଇସା ରୋଜଗାର କରିବା ସହ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି। ତେବେ ଏ ନେଇ ପୁରୀ ଜିଲା ପ୍ରଶାସନ ଏବଂ ଓଡ଼ିଶା ପତିତା ଉଦ୍ଧାର ସମିତିର ଅବଦାନ ଓ ସହଯୋଗକୁ ସେମାନେ ଭୁଲି ନାହାନ୍ତି।
ପୁରୀ ସହରର ବଡ଼ଦାଣ୍ଡ ସମେତ ବିଭିନ୍ନ ସ୍ଥାନରେ ଅନେକ ମହିଳା ଓ ପୁରୁଷ ଭିକ୍ଷାବୃତ୍ତି କରୁଥିଲେ। ଏମାନଙ୍କୁ ଜିଲା ପ୍ରଶାସନ ଉଦ୍ଧାର କରି ଓଡ଼ିଶା ପତିତା ଉଦ୍ଧାର ସମିତି ସହାୟତାରେ ନୀଳାଦ୍ରି ନିଳୟ ଆଶ୍ରୟସ୍ଥଳୀରେ ରଖିଛି। ସେମାନେ ଯେପରି ଭିକ୍ଷା ବୃତ୍ତି ଛାଡ଼ି ସମ୍ମାନର ସହିତ ସମାଜରେ ବଞ୍ଚିପାରିବେ ସେଥିଲାଗି ପ୍ରଶାସନ ପକ୍ଷରୁ ଧୂପ କାଠି, ଝାଡୁ, ସିଏଫ୍ଏଲ୍ ବଲ୍ବ ତିଆରି ସହ ବିଭିନ୍ନ ପ୍ରକାର ଚିତ୍ରକଳା ପ୍ରସ୍ତୁତ କରିବାର ତାଲିମ ଦିଆଯାଉଛି। ତାଲିମପ୍ରାପ୍ତ ମହିଳା ଓ ପୁରୁଷମାନେ ଜୀବିକା ପାଇଁ ଏଭଳି ନାନା ପ୍ରକାରର ସାମଗ୍ରୀ ତିଆରି କରି ଅର୍ଥ ଉପାର୍ଜନ କରୁଛନ୍ତି। ଏଠାକାର ଅନ୍ତେବାସୀ କେନ୍ଦ୍ରାପଡ଼ା ପଟ୍ଟାମୁଣ୍ଡାଇର ବାସନ୍ତୀ ସାହୁ କହିଛନ୍ତି, ପାରିବାରିକ ନିର୍ଯାତନା ଯୋଗୁ ଘରୁ ଚାଲି ଆସିଥିଲି। କାମଧନ୍ଦା ନ ପାଇ ପୁରୀ ବଡ଼ଦାଣ୍ଡରେ ଭିକ୍ଷାବୃତ୍ତି କରୁଥିଲି। ତେବେ ଏଠାକୁ ମୋତେ ଅଣାଯିବା ପରେ ନୂଆ ଜୀବନ ପାଇବା ସହ ମାନସିକ ଶାନ୍ତି ଅନୁଭବ କରୁଛି। ସ୍ବାବଲମ୍ବୀ ହୋଇ ବଞ୍ଚିବାର ଅନୁଭବ ମଧ୍ୟ ନିଆରା। ପରିବାର ନିଜ ସହ ନ ଥିଲେ କ’ଣ ହେଲା ଏଠାରେ ସମସ୍ତେ ମୋ’ ପରିବାର ଭଳି। ଏକାଠି ରହୁଛୁ ଓ ଖୁସି ଅଛୁ। ନୀଳାଦ୍ରି ନିଳୟର ପୁରୀ ପ୍ରୋଜେକ୍ଟ ମ୍ୟାନେଜର ବ୍ରଜକିଶୋର ସାମନ୍ତରାୟ କହିଛନ୍ତି, ପୁରୀ ସହରରେ ଏଭଳି ୪ଟି ନିଳୟ ରହିଛି। ଭିକ୍ଷାବୃତ୍ତି କରୁଥିବା ବ୍ୟକ୍ତିଙ୍କୁ ଅଣାଯାଇ ଏଠାରେ ରଖାଯାଉଛି। ବାଲିଗୁଆଳିସ୍ଥିତ ନୀଳାଦ୍ରି ନିଳୟରେ ଏବେ ୪୯ ଜଣ ଅନ୍ତେବାସୀ ରହିଛନ୍ତି। ଏମାନଙ୍କ ମଧ୍ୟରୁ ୩୧ଜଣ ପୁରୁଷ ଓ ୧୮ ଜଣ ମହିଳା। ଜିଲା ପ୍ରଶାସନର ଭିନ୍ନକ୍ଷମ ସଶକ୍ତୀକରଣ ବିଭାଗ ପକ୍ଷରୁ ଦିନ ପିଛା ପ୍ରତି ବ୍ୟକ୍ତିଙ୍କ ବାବଦକୁ ୩୩ ଟଙ୍କା ମିଳୁଛି। ଏଥିରେ ଖାଦ୍ୟ ପାନୀୟ ସହ ସାବୁନ ତେଲ ଭଳି ଖର୍ଚ୍ଚ ମଧ୍ୟ ସାମିଲ। ସ୍ବାଭାବିକ ଭାବେ ଜଣେ ବ୍ୟକ୍ତି ଏହି ସ୍ବଳ୍ପ ଟଙ୍କାରେ ଚଳିବା କଷ୍ଟକର। ଏଥିପାଇଁ ଏମାନଙ୍କୁ ସ୍ବାବଲମ୍ବୀ କରାଯାଉଛି। ପୁରୁଷ ଓ ମହିଳା ଉଭୟେ ସ୍ବାବଲମ୍ବୀ ହେବାକୁ ଆଗ୍ରହ ଦେଖାଉଛନ୍ତି। ସରକାରୀ ସ୍ତରରେ ପ୍ରୋତ୍ସାହନ ମିଳୁଛି। ତେବେ ସରକାରୀ ସହାୟତା ରାଶି ବୃଦ୍ଧି କରାଯିବା ସହ ଅଧିକ ସଂଖ୍ୟକ ପ୍ରଶିକ୍ଷଣ ଶିବିର ଖୋଲାଗଲେ ଅଧିକ ବ୍ୟକ୍ତି ଉପକୃତ ହୋଇପାରନ୍ତେ। ଭିକ୍ଷାବୃତ୍ତି କରୁଥିବା ବ୍ୟକ୍ତିଙ୍କୁ ଉଦ୍ଧାର କରିବା ପାଇଁ ଏକ ଏନ୍ଜିଓକୁ ଦାୟିତ୍ୱ ଦିଆଯାଇଛି। ସମ୍ପୃକ୍ତ ସଂସ୍ଥା ଉଦ୍ଧାର କରି ଆଣି ନୀଳାଦ୍ରି ନିଳୟରେ ଛାଡ଼େ। କାହାରି ପରିବାର ଲୋକେ ଚିହ୍ନଟ କରି ନିଜ ପରିଜନଙ୍କୁ ଏଠାରୁ ନେବାକୁ ଚାହିଁଲେ ଠିକ ଭାବେ ଯାଞ୍ଚ କରି ସମ୍ପୃକ୍ତ ବ୍ୟକ୍ତିଙ୍କୁ ପରିବାର ଲୋକଙ୍କୁ ହସ୍ତାନ୍ତର କରାଯାଏ। ସାମାଜିକକର୍ମୀ ଶ୍ୟାମ ପ୍ରକାଶ ସେନାପତି କହିଛନ୍ତି, ଭିକ୍ଷା ବୃତ୍ତି ଛାଡ଼ି ଅନେକ ବ୍ୟକ୍ତି ସମ୍ମାନର ସହ ସମାଜରେ ରହିବାର ସୁଯୋଗ ପାଇଛନ୍ତି ଏହା ନିହାତି ଖୁସିର କଥା। ସ୍ବାବଲମ୍ବୀ ହେବାର ପ୍ରଚେଷ୍ଟା ଏଭଳି ଭାବେ ରହିଲେ ଦିନେ ଭିକ୍ଷାବୃତ୍ତି ସମ୍ପୂର୍ଣ୍ଣ ଭାବେ ଲୋପ ପାଇଯିବ।
