ଦାରିଙ୍ଗବାଡି, ୨୭।୧୧ (ଅରୁଣ ସାହୁ):ପ୍ରକାଶ ପାଇଥିବା ଓଏଫ୍ଏସ୍ ପରୀକ୍ଷାରେ କନ୍ଧମାଳ ଜିଲା ଦାରିଙ୍ଗବାଡିର ନିକେଶ ପ୍ରଧାନ ଉତ୍ତୀର୍ଣ୍ଣ ହୋଇଛନ୍ତି । ସେ ୧୨୭ ତମ ସ୍ଥାନ ଅଧିକାର କରି ନିଜ ଅଞ୍ଚଳ ଓ ସାରା ରାଜ୍ୟ ପାଇଁ ସୁନାମ ଆଣିଛନ୍ତି । ତାଙ୍କର ଏହି ସଫଳତା ପାଇଁ ସେ ତାଙ୍କ ବାପା ଓ ମା ’ ଏବଂ ପ୍ରାଥମିକ ଶିକ୍ଷା ଆରମ୍ଭ କରିଥିବା ଓଡ଼ିଶା ବ୍ରିଗେଡ ବିଦ୍ୟାଳୟର ଶିକ୍ଷୟିତ୍ରୀଶିକ୍ଷକଙ୍କୁ ଶ୍ରେୟ ଦେଇଛନ୍ତି । ସେ ତାଙ୍କ ଶିକ୍ଷା ଆରମ୍ଭରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ବ୍ରିଗେଡ ବିଦ୍ୟାଳୟରେ ପଢିବା ପରେ ସେ ଫୁଲବାଣୀଠାରେ ରହିଥିବା ନବୋଦୟ ବିଦ୍ୟାଳୟରେ ଦ୍ୱାଦଶ ଏବଂ ପରେ ଭୁବନେଶ୍ୱର ଓୟୁଏଟିରେ ଜଙ୍ଗଲ ଓ ପରିବେଶ ସମ୍ପର୍କିତ ଶିକ୍ଷାରେ ସେ ଡିଗ୍ରୀ ହାସଲ କରିଥିଲେ। ନିକେଶଙ୍କ ସଫଳତା ପାଇଁ ଓଡ଼ିଶା ବ୍ରିଗେଡ ବିଦ୍ୟାଳୟର ପ୍ରିନ୍ସପାଲ କାହ୍ନୁଚରଣ ପାଢ଼ୀ ଏବଂ ଭାଇସ ପ୍ରିନ୍ସପାଲ ଦିନେଶ କୁମାର ସାହୁ ଗର୍ବ ଅନୁଭବ କରୁଛନ୍ତି ବୋଲି କହିଛନ୍ତି । ଏହା ପୂର୍ବରୁ ମଧ୍ୟ ବିଦ୍ୟାଳୟରେ ଏକାଧିକ ଛାତ୍ର ଡାକ୍ତର, ଇଞ୍ଜିନିୟର ଏବଂ ରାଜ୍ୟ ପ୍ରଶାସନିକ ଅଧିକାରୀ ଭାବେ କାର୍ଯ୍ୟରତ ବୋଲି ସେ କହିଛନ୍ତି । ଏହି ପରୀକ୍ଷାରେ ଉତ୍ତୀର୍ଣ୍ଣ ହେବା ପରେ ସେ ଫରେଷ୍ଟ ରେଞ୍ଜର ଭାବେ ସିଧା ସରକାରଙ୍କ ଦ୍ୱାରା ଦାୟିତ୍ୱ ତୁଲାଇବେ । ପ୍ରକାଶ ଯେ, ଦାରିଙ୍ଗବାଡିର ପୂର୍ବତନ ସେନା ଅଧିକାରୀ ରାଜେଶ ପ୍ରଧାନଙ୍କ ପୁତ୍ର ହେଉଛନ୍ତି ନିକେଶ। ନିକେସଙ୍କ ମା’ ସୁନ୍ଦରୀ ନାୟକ ଓଡ଼ିଶା ସରକାରଙ୍କ ସ୍ବାସ୍ଥ୍ୟବିଭାଗରେ ଉକ୍ତ ବ୍ଲକ ବ୍ରାହ୍ମଣୀଗାଁ ଅଞ୍ଚଳରେ କାର୍ଯ୍ୟରତ ରହିଛନ୍ତି । ଦୁହିଁଙ୍କ ପ୍ରେରଣା ଓ ପରାମର୍ଶରେ ନିକେଶ ଭଲ ପାଠ ପଢିବା ସହ ଗୋଟିଏ ଥର ଓଏଫ୍ଏସ୍ ପରୀକ୍ଷା ଦେଇ ସଫଳତା ପାଇଥିବା ସେ କହିଛନ୍ତି।
