ଜମ୍ମୁ,୩।୧: ଜମ୍ମୁ-କଶ୍ମୀରର ସାମ୍ବା ଜିଲାରେ ଅନ୍ତର୍ଜାତୀୟ ସୀମାଠାରୁ ଏକ କିଲୋମିଟର ଦୂରତା ମଧ୍ୟରେ ରାତ୍ରିକାଳୀନ କର୍ଫ୍ୟୁ ଲାଗୁ କରାଯାଇଛି। ସୁରକ୍ଷା ଦୃଷ୍ଟିରୁ ମଙ୍ଗଳବାର ଏହି ଅଞ୍ଚଳରେ ରାତ୍ରିକାଳୀନ କର୍ଫ୍ୟୁ ଲାଗୁ କରାଯାଇଛି। ଅଧିକାରୀଙ୍କ କହିବାନୁସାରେ, ଏହି କର୍ଫ୍ୟୁ ଅଞ୍ଚଳରେ ଦୁର୍ବୃତ୍ତଙ୍କୁ ଧରିବା ପାଇଁ ବିଏସ୍ଏଫ୍ ଯବାନମାନଙ୍କୁ ମୁତୟନ କରାଯାଇଛି। ମଙ୍ଗଳବାର ଏକ ସରକାରୀ ନିର୍ଦ୍ଦେଶନାମାରୁ ଏହି ସୂଚନା ମିଳିଛି। ଉକ୍ତ ନିର୍ଦ୍ଦେଶନାମାରେ କୁହାଯାଇଛି ଯେ, ବର୍ତ୍ତମାନର କୁହୁଡ଼ି ଅବସ୍ଥାରେ ସୀମା ଭିତରକୁ ଅନୁପ୍ରବେଶ କରୁଥିବା ଏବଂ ଡ୍ରୋନ ମାଧ୍ୟମରେ ଅସ୍ତ୍ରଶସ୍ତ୍ର ଚୋରା ଚାଲାଣକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି। ସୂଚନାଯୋଗ୍ୟ, ଜିଲା ମାଜିଷ୍ଟ୍ରେଟ ଅନୁରାଧା ଗୁପ୍ତାଙ୍କ ନିର୍ଦ୍ଦେଶ ଅନୁଯାୟୀ ସାମ୍ବା ଜିଲାର ଅନ୍ତର୍ଜାତୀୟ ସୀମା (ଆଇବି)ଠାରୁ ଏକ କିଲୋମିଟର ପର୍ଯ୍ୟନ୍ତ ଉକ୍ତ ଅଞ୍ଚଳରେ ରାତି ୯ଟାରୁ ସକାଳ ୬ଟା ପର୍ଯ୍ୟନ୍ତ ନାଗରିକଙ୍କ ଗତିବିଧି ଉପରେ ପ୍ରତିବନ୍ଧକ ଲଗାଯାଇଛି। ଏହି ଆଦେଶରେ କୁହାଯାଇଛି ଯେ, ଏହି ସମୟରେ ଉକ୍ ଅଞ୍ଚଳରେ କୌଣସି ବ୍ୟକ୍ତି କିମ୍ବା ବ୍ୟକ୍ତି ଗୋଷ୍ଠୀ ଯାତାୟତ କରିପାରିବେ ନାହିଁ। ଏହି ନିର୍ଦ୍ଦେଶ ତୁରନ୍ତ ପ୍ରଭାବ ସହିତ କାର୍ଯ୍ୟକାରୀ ହୋଇଥିବା ବେଳେ ଏହା ୨ମାସ ପର୍ଯ୍ୟନ୍ତ ଜାରି ରହିବ।
