ଓ୍ବାଶିଂଟନ,୫ା୧: ଆମେରିକା ଭେନେଜୁଏଲା ଉପରେ ସାମରିକ କାର୍ଯ୍ୟାନୁଷ୍ଠାନ ସ୍ବରୂପ ଏହାର ରାଷ୍ଟ୍ରପତି ନିକୋଲାସ ମାଦୁରୋ ଓ ସ୍ତ୍ରୀ ସିଲିଆ ଫ୍ଲୋରେସ୍ଙ୍କୁ ନାର୍କୋ ଟେରରିଜମ୍ ଅଭିଯୋଗର ବିଚାର ପାଇଁ ନିଜ ଦେଶକୁ ନେଇଯାଇଛି। ମାଦୁରୋଙ୍କୁ କ୍ଷମତାଚ୍ୟୁତ କରାଯାଇଥିବା ଆମେରିକା ଦାବି କରିଛି। ଏବେ ଭେନେଜୁଏଲାକୁ ଆମେରିକା ସାମୟିକ ଭାବେ ଶାସନ କରିବ ବୋଲି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ କହିଥିଲାବେଳେ ସମସ୍ୟା ସୃଷ୍ଟି କରୁଥିବା ଅନ୍ୟ ପଡୋଶୀମାନେ ମଧ୍ୟ ଅନୁରୂପ ଦଶା ଭୋଗିପାରନ୍ତି ବୋଲି ଚେତାବନୀ ଦେଇଛନ୍ତି। ଭେନେଜୁଏଲା ନିଶାଦ୍ରବ୍ୟ ଉତ୍ପାଦନ କରିବା ସହ ଉତ୍ପାଦନକାରୀମାନଙ୍କୁ ସୁରକ୍ଷା ଦେଉଥିଲା ଏବଂ ନିଶାଦ୍ରବ୍ୟ ପ୍ରେରଣ କରି ଆମେରିକୀୟମାନଙ୍କ ଜୀବନ ନଷ୍ଟ କରୁଥିଲା ବୋଲି ଟ୍ରମ୍ପ୍ ଅଭିଯୋଗ କରିଛନ୍ତି। ସେଥିପାଇଁ ଭେନେଜୁଏଲା ଉପରେ କାର୍ଯ୍ୟାନୁଷ୍ଠାନ ଯଥାର୍ଥ ବୋଲି ସେ ଦର୍ଶାଇଛନ୍ତି। ଏବେ ମେକ୍ସିକୋ, କ୍ୟୁବା ଏବଂ କଲମ୍ବିଆ ବିରୋଧରେ କିଛି କରିବାକୁ ହେବ ବୋଲି ଟ୍ରମ୍ପ୍ କହିଛନ୍ତି। ମେକ୍ସିକୋକୁ ଏହାର ରାଷ୍ଟ୍ରପତି କ୍ଲାଉଡିଆ ଶେଇନ୍ବମ୍ ଶାସନ କରୁନାହାନ୍ତି, ବରଂ ପ୍ରଭାବଶାଳୀ ନିଶା ବ୍ୟବସାୟୀମାନେ ଚଳାଉଛନ୍ତି। ତେଣୁ ମେକ୍ସିକୋ ଉପରେ କିଛି ହେବାକୁ ଯାଉଥିବା ଟ୍ରମ୍ପ୍ ଚେତାବନୀ ଦେଇଛନ୍ତି। କ୍ୟୁବା ସମ୍ପର୍କରେ ଆମେରିକା ରାଷ୍ଟ୍ରପତି ଅନୁରୂପ ମନ୍ତବ୍ୟ ଦେବା ସହ ଏହାକୁ ଏକ ବିଫଳ ରାଷ୍ଟ୍ର ବୋଲି କହିଛନ୍ତି। କଲମ୍ବିଆକୁ ସମାଲୋଚନା କରି ଟ୍ରମ୍ପ୍ କହିଛନ୍ତି, ଏହି ଦେଶ ଅନୂ୍ୟନ ୩ଟି ବୃହତ୍ କୋକେନ୍ ଫ୍ୟାକ୍ଟ୍ରିକୁ ଚଳାଉଛି। କଲମ୍ବିଆ ରାଷ୍ଟ୍ରପତି ଗୁଷ୍ଟାଭୋ ପେଟ୍ରୋ କୋକେନ୍ ତିଆରି କରି ଆମେରିକା ପଠାଉଥିବା ଟ୍ରମ୍ପ୍ କହିଛନ୍ତି।
Dharitri – The Largest & Most Trusted Odia Daily
