ବ୍ରହ୍ମପୁର ଅଫିସ,୨୨ା୬: ଅତୀତରେ ଗଞ୍ଜାମ ଜିଲାରୁ ହୋଇଥିବା ପୂର୍ବତନ ବାଚସ୍ପତିମାନଙ୍କ ପରବର୍ତ୍ତୀ ରାଜନୀତି ଓଲଟପାଲଟ ହୋଇଯାଇଛି। ଏହି ଜିଲାର ଲାଲ ମୋହନ ପଟ୍ଟନାୟକ ୧୯୪୬ରୁ ୫୨ ପର୍ଯ୍ୟନ୍ତ ପ୍ରଥମ ବାଚସ୍ପତି ହୋଇଥିଲେ। ପରବର୍ତ୍ତୀ ପର୍ଯ୍ୟାୟରେ ସେ ରାଜନୈତିକ ଚିତ୍ରପଟ୍ଟରୁ ଅଦୃଶ୍ୟ ହେଲେ। ୧୯୬୧ ନିର୍ବାଚନରେ କୋଦଳାରୁ ବିଧାୟକ ଲିଙ୍ଗରାଜ ପାଣିଗ୍ରାହୀ ବିଧାନସଭାରେ ଜିଲାର ଦ୍ୱିତୀୟ ବାଚସ୍ପତି ପଦ ପାଇଥିଲେ। ପରେ ସେ ମଧ୍ୟ ରାଜନୀତିରୁ ଉଭେଇଗଲେ। ୧୯୮୦ ନିର୍ବାଚନରେ ଭଞ୍ଜନଗର କଂଗ୍ରେସ ବିଧାୟକ ସୋମନାଥ ରଥ ସେହି ସାମ୍ବିଧାନିକ ପଦ ପାଇଁ ନିର୍ବାଚିତ ହୋଇଥିଲେ। ରଥ ମଧ୍ୟ ମାତ୍ର ଦୁଇବର୍ଷରେ ଓହରି ଯାଇଥିଲେ। ୧୯୯୫ ନିର୍ବାଚନରେ ଚିକିଟିର ସ୍ବାଧୀନ ବିଧାୟକ ହୋଇଥିବା ଚିନ୍ତାମଣି ଦ୍ୟାନ ସାମନ୍ତରା ୯୬ରୁ ୪ ବର୍ଷ ବାଚସ୍ପତି ହେଲେ। ପରବର୍ତ୍ତୀ ନିର୍ବାଚନଗୁଡ଼ିକରେ ସେ ଲଗାତର ଭାବେ ପରାସ୍ତ ହେଲେ। ଏବେ ସେ ସକ୍ରିୟ ରାଜନୀତିରୁ ଏକପ୍ରକାର ଦୂରେଇଛନ୍ତି।
୨୦୧୯ ନିର୍ବାଚନରେ ଦିଗପହଣ୍ଡି ବିଧାୟକ ସୂର୍ଯ୍ୟ ନାରାୟଣ ପାତ୍ର ଏହି ଜିଲାରୁ ପଞ୍ଚମ ବାଚସ୍ପତି ହୋଇଥିଲେ। ଚଳିତ ମାସ ପ୍ରଥମ ସପ୍ତାହରେ ଅସୁସ୍ଥତା ଆଳରେ ସେ ପଦବୀରୁ ଇସ୍ତଫା ଦେଲେ। ସେହି ପଦ ଭଞ୍ଜନଗର ବିଧାୟକ ବିକ୍ରମ କେଶରୀ ଆରୁଖଙ୍କୁ ମିଳିଛି। ୬ ଥର ବିଧାୟକ ଏବଂ ୩ ଥର କ୍ୟାବିନେଟ ମନ୍ତ୍ରୀ ହୋଇ ଅନେକ ଗୁରୁତ୍ୱପୂର୍ଣ୍ଣ ବିଭାଗ ସେ ଦକ୍ଷତାର ସହ ସମ୍ଭାଳିଥିଲେ। ହଠାତ୍ ଅନ୍ୟ ମନ୍ତ୍ରୀମାନଙ୍କ ଭଳି ସେ ମଧ୍ୟ ଇସ୍ତଫା ଦେଲେ ଏବଂ ତାଙ୍କୁ ବାଚସ୍ପତି କରାଯିବାର ଘୋଷଣା କରାଗଲା। ରାଜନୈତିକ କ୍ଷେତ୍ରରେ ଆରୁଖଙ୍କ ଅଭିଜ୍ଞତା ରହିଛି। ତେଣୁ ବିଧାନସଭା ନିରପେକ୍ଷ ଭାବେ ଚଳାଇବା ଆଶା କରାଯାଇଛି।
ବାଚସ୍ପତି ପଦ ଛାଡ଼ିଥିବା ସୂର୍ଯ୍ୟ ପାତ୍ରଙ୍କ ବିଷୟରେ ବିଭିନ୍ନ ଆଲୋଚନା ହେଉଛି। ଦିଗପହଣ୍ଡିର ରାଜନୈତିକ ଚିତ୍ର ନେଇ ଚର୍ଚ୍ଚାର ବିଷୟ ପାଲଟିଛି। ତେବେ ଜିଲାରୁ ହୋଇଥିବା ପୂର୍ବତନ ବାଚସ୍ପତିମାନଙ୍କ ପରିବର୍ତ୍ତିତ ରାଜନୀତି ପ୍ରସଙ୍ଗ ଉଠୁଛି।
ଅପରପକ୍ଷରେ ଭଞ୍ଜନଗର ବିଧାନସଭା କ୍ଷେତ୍ରରୁ ସର୍ବାଧିକ ୬ ଥର ଲଗାତର ଭାବେ ବିଧାୟକ ହୋଇଛନ୍ତି ବିକ୍ରମ ଆରୁଖ। ତଥ୍ୟାନୁସାରେ ୧୯୫୭ ନିର୍ବାଚନରେ କମ୍ୟୁନିଷ୍ଟ ପାର୍ଟିରୁ ଗୋବିନ୍ଦ୍ର ପ୍ରଧାନ ନିର୍ବାଚିତ ହୋଇଥିଲେ। ୧୯୬୧ରେ କଂଗ୍ରେସରୁ ମାଗୁଣି ଚରଣ ପ୍ରଧାନ ଜିତିଥିଲେ। ୧୯୬୭ରେ ଦୀନବନ୍ଧୁ ବେହେରା କଂଗ୍ରେସ ବିଧାୟକ ହୋଇଥିଲେ। ୧୯୭୧, ୭୪ ଓ ୮୦ ନିର୍ବାଚନରେ କଂଗ୍ରେସ ବିଧାୟକ ହୋଇଥିଲେ ସୋମନାଥ ରଥ। ୭୭ ନିର୍ବାଚନରେ ଜାମି ସୁବାରାଓ ପୃଷ୍ଟି ଜନତା ପାର୍ଟିରୁ ଜିତିଥିଲେ। ୧୯୮୫ରେ ଉମାକାନ୍ତ ମିଶ୍ର କଂଗ୍ରେସରୁ ନିର୍ବାଚିତ ହୋଇଥିବା ବେଳେ ୧୯୯୦ ନିର୍ବାଚନରେ ଜନତା ଦଳରୁ ରାମକୃଷ୍ଣ ଗୌଡ଼ ଭଞ୍ଜନଗର ବିଧାୟକ ହୋଇଥିଲେ। ୧୯୯୫ରୁ ୨୦୧୯ ପଯର୍ର୍ୟନ୍ତ ହୋଇଥିବା ୬ ନିର୍ବାଚନରେ ଆରୁଖ ଥରେ ଜନତା ଦଳରୁ ଓ ୫ ଥର ବିଜେଡିରୁ ବିଧାନସଭାକୁ ନିର୍ବାଚିତ ହୋଇଛନ୍ତି। ଏହି ଟାଣୁଆ ରାଜନେତାଙ୍କ ଆଗାମୀ ନିର୍ବାଚନ ଓ ରାଜନୈତିକ ସ୍ଥିତି ନେଇ ଚର୍ଚ୍ଚା ପରିସରକୁ ଆସିଛି।
