ନୂଆଦିଲ୍ଲୀ,୨୫।୧୧: କେନ୍ଦ୍ର ସରକାରଙ୍କ ଦ୍ୱାରା ଲାଗୁ କରାଯାଇଥିବା ନୂତନ ଶ୍ରମ ସଂହିତା (Labour Codes) କର୍ମଚାରୀ ନିଯୁକ୍ତି, ଦରମା ଏବଂ ସୁବିଧା କ୍ଷେତ୍ରରେ ଏକ ବଡ଼ ପରିବର୍ତ୍ତନ ଆଣିଛି। ଏହାର ସବୁଠୁ ବଡ଼ ପ୍ରଭାବ ହେଉଛି ‘ଚୁକ୍ତିଭିତ୍ତିକ କର୍ମଚାରୀ’ଙ୍କୁ ଏକ ବର୍ଷରେ ଗ୍ରାଚ୍ୟୁଇଟି ସୁବିଧା ସହିତ ସ୍ଥାୟୀ କର୍ମଚାରୀଙ୍କ ସହ ସମାନ ସୁବିଧା ମିଳିବା।
ନୂଆ ନିୟମ ଅନୁଯାୟୀ, ‘ଚୁକ୍ତିଭିତ୍ତିକ’ କର୍ମଚାରୀମାନେ ବର୍ତ୍ତମାନ ସ୍ଥାୟୀ କର୍ମଚାରୀଙ୍କ ସହ ସମାନ ଦରମା, ଛୁଟି ଏବଂ ସାମାଜିକ ସୁରକ୍ଷା ସୁବିଧା ପାଇବାକୁ ଯୋଗ୍ୟ ହେବେ। ସବୁଠୁ ବଡ଼ କଥା ହେଉଛି, ‘ଚୁକ୍ତିଭିତ୍ତିକ’ କର୍ମଚାରୀମାନେ କେବଳ ଏକ ବର୍ଷର ସେବା ପରେ ଗ୍ରାଚ୍ୟୁଇଟି ପାଇବାକୁ ଯୋଗ୍ୟ ହେବେ, ଯାହା ପୂର୍ବରୁ ୫ ବର୍ଷ ଥିଲା। ଏହି ପରିବର୍ତ୍ତନ ଯୋଗୁଁ କମ୍ପାନୀଗୁଡ଼ିକ ସ୍ଥାୟୀ ଚାକିରି ପରିବର୍ତ୍ତେ ଅଧିକ ସଂଖ୍ୟକ ‘ଚୁକ୍ତିଭିତ୍ତିକ’ କର୍ମଚାରୀ ନିଯୁକ୍ତି କରିବାର ସମ୍ଭାବନା ସୃଷ୍ଟି ହୋଇଛି।
ନିଯୁକ୍ତି ବିଶେଷଜ୍ଞଙ୍କ ମତରେ ସ୍ଥାୟୀ ପଦବୀଗୁଡ଼ିକ ସମ୍ପୂର୍ଣ୍ଣ ରୂପେ ଉଭେଇ ଯିବ ନାହିଁ। କିନ୍ତୁ ଯେଉଁ କ୍ଷେତ୍ରରେ ଖର୍ଚ୍ଚ ନିୟନ୍ତ୍ରଣ ଓ ସାମୟିକ ଚାହିଦା ଅଧିକ, ସେଠାରେ ‘ଚୁକ୍ତିଭିତ୍ତିକ’ ନିଯୁକ୍ତି ବଢ଼ିପାରେ। ମୂଳ କାର୍ଯ୍ୟ ଗୁଡ଼ିକ ପାଇଁ କମ୍ପାନୀଗୁଡ଼ିକ ଦୀର୍ଘମିଆଦୀ ସ୍ଥିରତା ଆବଶ୍ୟକ କରୁଥିବାରୁ ସେଗୁଡ଼ିକ ସ୍ଥାୟୀ ନିଯୁକ୍ତି ଅଧୀନରେ ରହିବ। ଏହାଦ୍ୱାରା ଆଇଟି, ଉତ୍ପାଦନ ଏବଂ ରିଟେଲ୍ କ୍ଷେତ୍ରରେ ପ୍ରୋଜେକ୍ଟ କିମ୍ବା ସିଜିନାଲ୍ କାମ ପାଇଁ ‘ଚୁକ୍ତିଭିତ୍ତିକ’ ନିଯୁକ୍ତି ବଢ଼ିବାର ସମ୍ଭାବନା ଅଛି।
ନୂଆ କୋଡ୍ ସାମାଜିକ ସୁରକ୍ଷା ଦେଉଥିବାରୁ ଅସଙ୍ଗଠିତ କ୍ଷେତ୍ରର କର୍ମଚାରୀଙ୍କ ପାଇଁ ଏହା ଏକ ବଡ଼ ସୁରକ୍ଷା ଆଣିଛି। ତେବେ କମ୍ପାନୀଗୁଡ଼ିକ ଦୀର୍ଘମିଆଦୀ ସ୍ଥାୟୀ କାମ ପାଇଁ ବାରମ୍ବାର ସର୍ଟ-ଟର୍ମ କଣ୍ଟ୍ରାକ୍ଟ ଦେଇ ଅସଦ୍ ଉପାୟ ଅବଲମ୍ବନ ନ କରନ୍ତୁ, ସେଥିପାଇଁ ନିରୀକ୍ଷଣ ଓ ସ୍ୱଚ୍ଛତା ଜରୁରୀ ବୋଲି ବିଶେଷଜ୍ଞମାନେ ମତ ଦେଇଛନ୍ତି।
