ନୂଆଦିଲ୍ଲୀ, ୧।୫: ସର୍ବବୃହତ୍ ସର୍ଚ୍ଚ ଇଞ୍ଜିନ୍ ଗୁଗଲ ନିୟମିତ ବ୍ୟବଧାନରେ ଛୋଟ ଛୋଟ ପରିବର୍ତ୍ତନ ମାଧ୍ୟମରେ ନିଜ ଗ୍ରାହକଙ୍କୁ ବାନ୍ଧି ରଖିବାକୁ ପ୍ରୟାସ ଜାରି ରଖିଛି। ନିକଟରେ ଗୁଗଲ ଡକ୍ୟୁମେଣ୍ଟ ଆପ୍ଲିକେଶନ ବ୍ୟବହାରକାରୀଙ୍କ ପାଇଁ ନୂଆ ଫିଚର ଆଣିଛି। ଏଣିକି ୟୁଜର୍ସ ଏଥିରେ ନିଜ ପସନ୍ଦ ମୁତାବକ ଇମୋଜି ଯୋଡ଼ିପାରିବେ, ଯାହା ସେମାନଙ୍କୁ ନୂଆ ଅନୁଭୂତି ପ୍ରଦାନ କରିବ ବୋଲି ଗୁଗଲ ପକ୍ଷରୁ କୁହାଯାଇଛି।
ବିଶ୍ୱବ୍ୟାପୀ ବିଭିନ୍ନ ବିଷୟରେ ସୂଚନା ଜାଣିବା ପାଇଁ ଗୁଗଲ ସର୍ଚ୍ଚ ଇଞ୍ଜିନ୍ ଭରସାଯୋଗ୍ୟ ମାଧ୍ୟମ ପାଲଟିଛି। ୟୁଜର୍ସଙ୍କ ଦାବି ଅନୁଯାୟୀ ଆପ୍ଲିକେଶନଗୁଡ଼ିକୁ ନିୟମିତ ବ୍ୟବଧାନରେ ଅପଡେଟ୍ କରିବା ଦିଗରେ ଗୁଗଲ୍ ବେଶ୍ ଆଗୁଆ। ଏହି ପରିପ୍ରେକ୍ଷୀରେ ଗୁଗଲ ନିଜ ଡକ୍ୟୁମେଣ୍ଟ ଆପ୍ଲିକେଶନକୁ ଅପ୍ଡେଟ୍ କରିବା ସହ ଏଥିରେ ନୂଆ ଫିଚର ଯୋଡ଼ିଛି। ଏବେ ଗୁଗଲ ୟୁଜର୍ସ ଡକ୍ୟୁମେଣ୍ଟ ଲେଖିବା ସମୟରେ ଇମୋଜି ବ୍ୟବହାର କରିପାରିବେ। ଏଥିଲାଗି ଅନ୍ୟ ସ୍ଥାନରୁ ଇମୋଜି ଆଣିବା ଆବଶ୍ୟକ ପଡ଼ିବ ନାହିଁ। କାରଣ ଗୁଗଲ ଡକ୍ୟୁମେଣ୍ଟରେ ଇମୋଜି ଯୋଡ଼ି ଦିଆଯାଇଛି। ଫଳରେ ନିଜ ପସନ୍ଦର ଇମୋଜି ବ୍ୟବହାର କରି ଜଣେ ବ୍ୟବହାରକାରୀ ମନର ଭାବନା ବ୍ୟକ୍ତ କରିପାରିବେ।
୨୦୦୬ ମାର୍ଚ୍ଚ ୯ରେ ପ୍ରଥମ ଥର ପାଇଁ ଗୁଗଲ ଡକ୍ୟୁମେଣ୍ଟ ଆପ୍ଲିକେଶନ ଆରମ୍ଭ ହୋଇଥିଲା। ସାଧାରଣତଃ କୌଣସି କଣ୍ଟେଣ୍ଟ ଲେଖିବା ପାଇଁ ଗୁଗଲ ଡକ୍ୟୁମେଣ୍ଟ ଆପ୍ଲିକେଶନ ବ୍ୟବହାର କରାଯାଏ। ଏହା ଦେୟମୁକ୍ତ। ଗୁଗଲ ଡକ୍ୟୁମେଣ୍ଟରେ ଉଲ୍ଲେଖିତ ତଥ୍ୟକୁ ଗୋଟିଏ ସମୟରେ ଏକାଧିକ ବ୍ୟକ୍ତି ଦେଖିପାରିବେ। ଏଥିରେ ଆବଶ୍ୟକ ସଂଶୋଧନ କିମ୍ବା ତଥ୍ୟ ଯୋଡ଼ିପାରିବା ସୁବିଧା ରହିଛି। ଏହାକୁ ୧୦୦ ଭାଷାରେ ବ୍ୟବହାର କରାଯାଇପାରୁଛି।
