ନୂଆଦିଲ୍ଲୀ,୬।୩: ଆଉ ୨ଦିନ ପରେ ବିଶ୍ୱ ପାଳନ କରିବ ଅନ୍ତର୍ଜାତୀୟ ମହିଳା ଦିବସ। ତେବେ ଆମେ ଆଜି ଆପଣଙ୍କୁ ଏପରି Buisness Woman ଙ୍କ ବିଷୟରେ କହିବାକୁ ଯାଉଛୁ, ଯିଏ କି କେବେ କଲେଜ ଯାଇ ନାହାନ୍ତି କିନ୍ତୁ ଆଜି ସେ ଭାରତର ଧନୀ ମହିଳାଙ୍କ ତାଲିକାରେ ଶୀର୍ଷରେ ଅଛନ୍ତି। କେବଳ ଏତିକି ନୁହେଁ, ବିଶ୍ୱରେ ଧନୀ ବ୍ୟକ୍ତିଙ୍କ ତାଲିକାରେ ସେ ସାମିଲ୍ ଅଛନ୍ତି।
ସେ ହେଉଛନ୍ତି ଜିନ୍ଦଲ ଗ୍ରୁପର ମାଲିକାଣୀ Savitri Jindal। ସାବିତ୍ରୀଙ୍କ ଜୀବନ ସଂଘର୍ଷରେ ପରିପୂର୍ଣ୍ଣ । ଯେତେବେଳେ ତାଙ୍କୁ ୫୫ବର୍ଷ ହୋଇଥିଲା, ତାଙ୍କ ସ୍ବାମୀ ଓମ ପ୍ରକାଶ ଜିନ୍ଦଲଙ୍କ ଦେହାନ୍ତ ହୋଇଥିଲା। ଓମ ପ୍ରକାଶ ଜିନ୍ଦଲ ଗ୍ରୁପର ପ୍ରତିଷ୍ଠାତା ଥିଲେ। ସ୍ବାମୀଙ୍କ ମୃତ୍ୟୁ ପରେ ସାବିତ୍ରୀ ସମ୍ପୂର୍ଣ୍ଣ ଭାଙ୍ଗି ଯାଇଥିଲେ, ତଥାପି ସେ ହାର ମାନି ନ ଥିଲେ। ସେ ଏକାକୀ ନିଜର ୯ ସନ୍ତାନର ଯତ୍ନ ନେଉଥିଲେ।
ଫୋର୍ବସ ବିଲିୟନେୟାର ତାଲିକା ୨୦୨୩ ଅନୁଯାୟୀ ଜିନ୍ଦଲ ଗ୍ରୁପ ଚେୟାରମ୍ୟାନ ସାବିତ୍ରୀ ଜିନ୍ଦଲ ହେଉଛନ୍ତି ଭାରତର ସବୁଠାରୁ ଧନୀ ମହିଳା। ସେ ଭାରତର ସବୁଠାରୁ ଧନୀ ମହିଳାଙ୍କ ତାଲିକାରେ ୭ମ ସ୍ଥାନରେ ଅଛନ୍ତି। ଏଥିସହ ସେ ଦୁନିଆର ସବୁଠାରୁ ଧନୀ ବ୍ୟକ୍ତିଙ୍କ ତାଲିକାରେ ୫୦ତମ ସ୍ଥାନ ଦଖଲ କରିଛନ୍ତି। ସାବିତ୍ରୀଙ୍କ ପାଖରେ ୧୭ ବିଲିୟନ ଡଲାର (୧୩କୋଟି ୩୧ ଲକ୍ଷ ୫୦ହଜାର ଟଙ୍କାର ସମ୍ପତ୍ତି ରହିଛି। ୧୯୭୦ରେ ସେ ଜିନ୍ଦଲ ଗ୍ରୁପର ପ୍ରତିଷ୍ଠାତା ଓମପ୍ରକାଶ ଜିନ୍ଦଲଙ୍କୁ ବିବାହ କରିଥିଲେ। ସ୍ବାମୀଙ୍କ ମୃତ୍ୟୁ ପରେ ସେ ପୁରା ବ୍ୟବସାୟର କମାଣ ନିଜ ହାତରେ ଧରିଥିଲେ।
ସାବିତ୍ରୀଙ୍କୁ ବର୍ତ୍ତମାନ ୮୩ବର୍ଷ ବୟସ। କିନ୍ତୁ ଦେଶର ସବୁଠାରୁ ଏହି ଧନୀ ମହିଳା କେବେ ବି କଲେଜ ମାଟି ମାଡି ନାହାନ୍ତି। ଏହା ସତ୍ତ୍ୱେ ସ୍ବାମୀଙ୍କ ହଠାତ୍ ମୃତ୍ୟୁରେ ଭାଙ୍ଗି ନ ପଡି ପ୍ରଫେଶନାଲ ବିଜନେସ ମହିଳା ପରି ସବୁକାମ ବୁଝିଥିଲେ। ସାବିତ୍ରୀଙ୍କ ପାଇଁ ଏହା ସହଜ ନ ଥିଲା। ଗଣମାଧ୍ୟମକୁ ସାକ୍ଷାତକାର ଦେଇ ସେ କହିଛନ୍ତି, ଜିନ୍ଦଲ ପରିବାରରେ ଅଧିକାଂଶ ମହିଳା ଘରର ଦାୟିତ୍ୱ ନିଅନ୍ତି। ଆଉ ପୁରୁଷମାନେ ବ୍ୟବସାୟ କରନ୍ତି। ଏହି କାରଣରୁ ତାଙ୍କୁ ସ୍ବାମୀଙ୍କ ବ୍ୟବସାୟ ପରିଚାଳନା ପାଇଁ କଠିନ ପରିଶ୍ରମ କରିବାକୁ ପଡିଥିଲା।
ସ୍ବର୍ଗତ ଓମ ପ୍ରକାଶ ଜିନ୍ଦଲ ସ୍ବଦେଶୀ ନିର୍ମାତା ଭାବରେ ଜିନ୍ଦଲ ଗ୍ରୁପକୁ ହରିୟାଣାର ହିସାରରେ ପ୍ରତିଷ୍ଠିତ କରିଥିଲେ। ଆଜି ଏହି ଗ୍ରୁପ୍ ଭାରତର ସବୁଠାରୁ ବଡ ବ୍ୟବସାୟ ଗ୍ରୁପ୍ ମଧ୍ୟରୁ ଗୋଟିଏ। ସାବିତ୍ରୀଙ୍କ ୯ଜଣ ସନ୍ତାନଙ୍କ ମଧ୍ୟରୁ ୪ଜଣ ପୁଅ କମ୍ପାନୀର ବିଭିନ୍ନ ଦାୟିତ୍ୱରେ ଅଛନ୍ତି। ଇସ୍ପାତ, ଶକ୍ତି, ଭିତ୍ତିଭୂମି, ସିମେଣ୍ଟ ଏବଂ ଅନ୍ୟାନ୍ୟ ବିଭିନ୍ନ କ୍ଷେତ୍ରରେ ଜିନ୍ଦଲ ଗ୍ରୁପ ନିଜର ପରିଚୟ ସୃଷ୍ଟି କରିଛି।
