ଜେରୁଜେଲମ,୨୦।୩: ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଶୁକ୍ରବାର ଆମେରିକାକୁ ଇରାନ ସହିତ ଯୁଦ୍ଧକୁ ଟାଣି ନେଇଥିବା ଦାବିକୁ ଖାରଜ କରିଦେଇଛନ୍ତି। ସେ ଏହି ରିପୋର୍ଟଗୁଡ଼ିକୁ ‘ମିଥ୍ୟା ଖବର’ ବୋଲି କହିଛନ୍ତି। ଏକ ସାମ୍ବାଦିକ ସମ୍ମିଳନୀରେ ଭାଷଣ ଦେଇ ସେ କହିଛନ୍ତି, ୨୦ ଦିନର ଯୁଦ୍ଧ ପରେ, ଇରାନ ପାଖରେ ଏବେ ବାଲିଷ୍ଟିକ କ୍ଷେପଣାସ୍ତ୍ର ନିର୍ମାଣ କରିବାର କ୍ଷମତା ନାହିଁ କିମ୍ବା ୟୁରାନିୟମ ସମୃଦ୍ଧ କରିବାର କ୍ଷମତା ନାହିଁ।
ନେତାନ୍ୟାହୁ ଦୃଢ଼ ଭାବରେ କହିଛନ୍ତି ଯେ, ଇସ୍ରାଏଲ ଏହି ସଂଘର୍ଷରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ସାମିଲ କରିଛି ବୋଲି ଦାବି କରିବା ଭୁଲ। ଟ୍ରମ୍ପଙ୍କୁ କେହି କିଛି କହିପାରିବେ ଆପଣ ଭାବିପାରୁଛନ୍ତି ବୋଲି ସେ ପାଲଟା ପ୍ରଶ୍ନ କରିଛନ୍ତି
ନେତାନାହୁ ପ୍ରକାଶ କରିଛନ୍ତି ଯେ, ଟ୍ରମ୍ପ ତାଙ୍କୁ ଇରାନର ଗ୍ୟାସ କ୍ଷେତ୍ର ଉପରେ ଆଉ ଆକ୍ରମଣକୁ ଅସ୍ଥାୟୀ ଭାବରେ ସ୍ଥଗିତ ରଖିବାକୁ ଅନୁରୋଧ କରିଥିଲେ। ଇରାନର ସାଉଥ ପାର୍ସ ଗ୍ୟାସ କ୍ଷେତ୍ର ଉପରେ ଆକ୍ରମଣ କେବଳ ଇସ୍ରାଏଲ ଦ୍ୱାରା କରାଯାଇଥିଲା। ତାଙ୍କ ଅନୁସାରେ, ଏହି ଅପରେଶନରେ ଅନ୍ୟ କୌଣସି ଦେଶ ଭୂମିକା ଗ୍ରହଣ କରିନାହିଁ। ଯୁଦ୍ଧ ଲୋକଙ୍କ ଆଶା ଅପେକ୍ଷା ଶୀଘ୍ର ସମାପ୍ତ ହୋଇପାରେ, ପରିସ୍ଥିତି ଦ୍ରୁତ ଗତିରେ ବିକଶିତ ହେଉଛି ବୋଲି ସେ କହିଛନ୍ତି।
ହର୍ମୁଜ ପ୍ରଣାଳୀ ବନ୍ଦ କରିବା ପାଇଁ ଇରାନର ଧମକକୁ ସମ୍ବୋଧିତ କରି ସେ କହିଥିଲେ, ଏହି ‘ବ୍ଲାକମେଲ’ ସଫଳ ହେବ ନାହିଁ ଏବଂ ବିଶ୍ୱ ଏପରି ପରିସ୍ଥିତି ପାଇଁ ପ୍ରସ୍ତୁତ। ତେଲ ଏବଂ ଗ୍ୟାସ ଯୋଗାଣ ପାଇଁ ହର୍ମୁଜ ପ୍ରଣାଳୀ ଏବଂ ଲୋହିତ ସାଗର ଭଳି ମାର୍ଗ ଉପରେ ନିର୍ଭରଶୀଳତା ହ୍ରାସ କରାଯିବା ଆବଶ୍ୟକ। ସେ ଆରବୀୟ ଉପଦ୍ୱୀପ ଦେଇ ପାଇପଲାଇନ ନିର୍ମାଣ କରି ଇସ୍ରାଏଲ ଏବଂ ଭୂମଧ୍ୟସାଗରୀୟ ଅଞ୍ଚଳରେ ଶକ୍ତି ପରିବହନ କରିବାକୁ ପ୍ରସ୍ତାବ ଦେଇଥିଲେ।
ସେ ଦାବି କରିଥିଲେ ଯେ, ୨୦ ଦିନର ଯୁଦ୍ଧ ସମୟରେ ଇରାନର ସାମରିକ କ୍ଷମତା ଯଥେଷ୍ଟ ହ୍ରାସ ପାଇଛି। ତାଙ୍କ ଅନୁସାରେ, ଇରାନ ଆଉ କ୍ଷେପଣାସ୍ତ୍ର ନିର୍ମାଣ କିମ୍ବା ୟୁରାନିୟମ ସମୃଦ୍ଧ କରିବା ସ୍ଥିତିରେ ନାହିଁ। ଟ୍ରମ୍ପଙ୍କ ସହ ତାଙ୍କ ସମ୍ପର୍କର ପ୍ରଶଂସା କରି ନେତାନ୍ୟାହୁ ଉଲ୍ଲେଖ କରିଥିଲେ ଯେ, ଦୁଇ ନେତାଙ୍କ ମଧ୍ୟରେ ଚମତ୍କାର ସମନ୍ବୟ ରହିଛି।
Dharitri – Odisha’s No.1 Odia Daily
