ଜେରୁଜେଲମ,୨୦।୬:ଯୁଦ୍ଧ ଯୋଗୁ ଇସ୍ରାଏଲ ଏବଂ ଇରାନ ବହୁତ କ୍ଷତି ସହିଛି। କିନ୍ତୁ ଉଭୟ ଦେଶ ବର୍ତ୍ତମାନ ଥମିବାର ସ୍ଥିତିରେ ନ ଥିବା ପରି ମନେ ହେଉଛି। ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଏକ ବୟାନ ଦେଇ ସମାଲୋଚନାର ଶିକାର ହୋଇଛନ୍ତି। ଗୁରୁତ୍ୱପୂର୍ଣ୍ଣ କଥା ହେଉଛି ଇସ୍ରାଏଲର ଲୋକମାନେ ନିଜେ ସେମାନଙ୍କ ପ୍ରଧାନମନ୍ତ୍ରୀଙ୍କ ବିରୋଧରେ ପ୍ରତିକ୍ରିୟା ପ୍ରକାଶ କରିଥିଲେ। ନେତାନ୍ୟାହୁ ତାଙ୍କ ପୁଅର ବିବାହ ସ୍ଥଗିତ ରଖିବା ଯୁଦ୍ଧର ‘ବ୍ୟକ୍ତିଗତ ମୂଲ୍ୟ’ ଭାବରେ ବର୍ଣ୍ଣନା କରିଥିଲେ।
ଇରାନ ଇସ୍ରାଏଲର ସୋରୋକା ହସ୍ପିଟାଲ ଉପରେ ଆକ୍ରମଣ କରିଥିଲା। ଏହା ପରେ ନେତାନ୍ୟାହୁ ହସ୍ପିଟାଲ ପରିଦର୍ଶନ କରିବାକୁ ଆସିଥିଲେ। ନେତାନ୍ୟାହୁ ଏହି ସମୟରେ କହିଥିଲେ, ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଜର୍ମାନୀ ଯେପରି ବ୍ରିଟେନ ଉପରେ ଆକ୍ରମଣ କରିଥିଲା, କିନ୍ତୁ ବ୍ରିଟେନର ଲୋକମାନେ ସେମାନଙ୍କର ମନୋବଳକୁ ଦୃଢ଼ ରଖିଥିଲେ। ଆମକୁ ମଧ୍ୟ ସେହିପରି ଆମର ମନୋବଳକୁ ଦୃଢ଼ ରଖିବାକୁ ପଡିବ। ଯୁଦ୍ଧରେ ଲୋକମାନେ ପ୍ରାଣ ହରାଉଛନ୍ତି। ସମସ୍ତେ ବ୍ୟକ୍ତିଗତ ମୂଲ୍ୟ ଦେଉଛନ୍ତି। ମୋ ପରିବାର ମଧ୍ୟ ଏଥିରୁ ଖସି ପାରି ନାହାନ୍ତି।
ନେତନ୍ୟାହୁଙ୍କ ବୟାନ ପରେ ତାଙ୍କୁ ସମାଲୋଚନାର ସମ୍ମୁଖୀନ ହେବାକୁ ପଡିଥିଲା। ଇସ୍ରାଏଲୀ ଲୋକମାନେ ସୋସିଆଲ ମିଡିଆରେ ବହୁ ସଂଖ୍ୟାରେ ପ୍ରତିକ୍ରିୟା ପ୍ରକାଶ କରିଥିଲେ। ଲୋକମାନେ ଅଭିଯୋଗ କରିଛନ୍ତି, ନେତାନ୍ୟାହୁ ଜନସାଧାରଣଙ୍କ ସମସ୍ୟା ବଦଳରେ ନିଜକୁ ପ୍ରାଥମିକତା ଦେଉଛନ୍ତି। ଏହା ମଧ୍ୟ ଦାବି କରାଯାଇଛି ଯେ ନେତାନ୍ୟାହୁ ତାଙ୍କ ପୁଅର ବିବାହ ପାଇଁ ଛୁଟି ନେବାକୁ ଯୋଜନା କରିପାରନ୍ତି। ତଥାପି, ଏ ବିଷୟରେ କୌଣସି ସରକାରୀ ସୂଚନା ମିଳିନାହିଁ।
ଆମେରିକା ଇରାନ ଏବଂ ଇସ୍ରାଏଲ ମଧ୍ୟରେ ଯୁଦ୍ଧରେ ବହୁତ ଆଗ୍ରହ ଦେଖାଉଛି। ଏହା ଇସ୍ରାଏଲ ପକ୍ଷରୁ ଯୁଦ୍ଧ ଲଢ଼ିପାରିବ। ହ୍ବାଇଟ ହାଉସ ପ୍ରେସ ସଚିବ କାରୋଲିନ ଲେଭିଟ ଏକ ପ୍ରେସ ବ୍ରିଫିଂରେ କହିଛନ୍ତି, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆଗାମୀ ଦୁଇ ସପ୍ତାହ ମଧ୍ୟରେ ଇରାନ ଉପରେ ଆକ୍ରମଣ ନିର୍ଦ୍ଦେଶ ଦେବେ କି ନାହିଁ ତାହା ନିଷ୍ପତ୍ତି ନେବେ।
