ନୂଆଦିଲ୍ଲୀ,୨୦।୬: ପାକିସ୍ତାନର ବୈଦେଶିକ ମନ୍ତ୍ରୀ ଇଶାକ ଡାର ଏକ ସାକ୍ଷାତକାରରେ ବଡ଼ ଖୁଲାସା କରିଛନ୍ତି। ସେ ସ୍ବୀକାର କରିଛନ୍ତି, ଭାରତ ସେମାନଙ୍କର ଏୟାରବେସ ଧ୍ୱଂସ କରିଛି। ଯେତେବେଳେ ଭାରତୀୟ ସେନା ଆକ୍ରମଣ ଆରମ୍ଭ କରିଥିଲା। ପରବର୍ତ୍ତୀ ୪୫ମିନିଟ ମଧ୍ୟରେ ସାଉଦି ପ୍ରିନ୍ସ ଫୈସଲ ବିନ ସଲମାନ ତାଙ୍କ ସହିତ କଥା ହୋଇ ପଚାରିଥିଲେ ଯେ, ସେ ଭାରତର ବୈଦେଶିକ ମନ୍ତ୍ରୀ ଏସ ଜୟଶଙ୍କରଙ୍କ ସହ କଥା ହୋଇ ଆକ୍ରମଣ ବନ୍ଦ କରିବାକୁ ଅନୁରୋଧ କରିବା ଉଚିତ କି ନାହିଁ। ଫୈସଲ ବିନ ସଲମାନ ତାଙ୍କୁ ୨୦-୨୫ ଥର ଫୋନ କରିଥିଲେ।
ଏକ ସାକ୍ଷାତକାରରେ ଇଶାକ ଡାରଙ୍କ ସାମ୍ପ୍ରତିକ ବୟାନ ସ୍ପଷ୍ଟ ଭାବରେ ଦର୍ଶାଉଛି ଯେ, ଅପରେଶନ ସିନ୍ଦୂର ସମୟରେ ପାକିସ୍ତାନର ଅବସ୍ଥା କିପରି ଖରାପ ହୋଇଥିଲା। ଏକ ମୁସଲମାନ ଦେଶ ସେମାନଙ୍କୁ ସାହାଯ୍ୟ କରିବା ପାଇଁ ଆମେରିକା ଆଗରେ ଆଗକୁ ଆସି ପରିସ୍ଥିତିକୁ ସ୍ବାଭାବିକ କରିବାକୁ ପ୍ରସ୍ତାବ ଦେଇଥିଲା। ଏହା ବ୍ୟତୀତ, ଇଶାକ ଡାର ଏହା ମଧ୍ୟ କହିଛନ୍ତି, ତାଙ୍କ ସରକାର ଭାରତ ଦ୍ୱାରା କରାଯାଉଥିବା ଆକ୍ରମଣ ବନ୍ଦ କରିବାକୁ ଆମେରିକାକୁ ମଧ୍ୟ ନିବେଦନ କରିଛି। ଅପରେଶନ ସିନ୍ଦୁର ପରେ, ଭାରତ ପାକିସ୍ତାନୀ ଆକ୍ରମଣର ଜବାବରେ ସେମାନଙ୍କର ଅନେକ ଏୟାରବେସ ଧ୍ୱଂସ କରିଥିଲା, ଯେଉଁଥିରେ ରାୱଲପିଣ୍ଡି ବିମାନବନ୍ଦର ସମେତ ଅନେକ ଅଞ୍ଚଳକୁ ଟାର୍ଗେଟ କରି ବ୍ରହ୍ମୋସ ମିଶାଇଲ୍ ମାଡ଼ କରାଯାଇଥିଲା। ଏହା ନିଜେ ଇଶାକ ଡାର ପ୍ରକାଶ କରିଛନ୍ତି।
ଭାରତ ମେ ୭ ରାତିରେ ଅପରେଶନ ସିନ୍ଦୁର ସମୟରେ ପାକିସ୍ତାନ ଅଧିକୃତ କଶ୍ମୀରରେ ଅବସ୍ଥିତ ଆତଙ୍କବାଦୀ ଆଡ୍ଡାଗୁଡ଼ିକୁ ଟାର୍ଗେଟ କରିଥିଲା। ଏହି ଆକ୍ରମଣରେ ୧୦୦ ଆତଙ୍କବାଦୀଙ୍କ ମୃତ୍ୟୁ ହୋଇଥିବା ନିଶ୍ଚିତ ହୋଇଛି। ଏହି ଆକ୍ରମଣର ଜବାବରେ, ପାକିସ୍ତାନୀ ସେନା ଅସ୍ତ୍ରବିରତି ଉଲ୍ଲଂଘନ କରି ସୀମା ପାରରୁ ଆକ୍ରମଣ ଆରମ୍ଭ କରିଥିଲା। ଏହା ପରେ, ଭାରତୀୟ ସେନା ଆକ୍ରମଣକୁ ତୀବ୍ର କରିଥିଲା ଏବଂ ପାକିସ୍ତାନର ଅନେକ ଏୟାରବେସ୍କୁ ଟାର୍ଗେଟ କରିଥିଲା, ଯେଉଁଥିରେ ପଡ଼ୋଶୀ ଦେଶକୁ ବହୁତ କ୍ଷତି ସହିବାକୁ ପଡିଥିଲା। ଏହାର ପ୍ରମାଣ ସାଟେଲାଇଟ ଚିତ୍ର ମାଧ୍ୟମରେ ମଧ୍ୟ ଦିଆଯାଇଥିଲା।
