ଆନନ୍ଦପୁର,୨୦।୧୦(ସ୍ବ.ପ୍ର.):କେନ୍ଦୁଝର ଜିଲା ଆନନ୍ଦପୁର ଥାନା ଅନ୍ତର୍ଗତ ସମ୍ପର୍କୀୟ ଖୁଡ଼ୀଙ୍କ ଅଶ୍ଳୀଳ ଫଟୋ ଭାଇରାଲ ଅଭିଯୋଗରେ ପୁତୁରାକୁ ପୋଲିସ ଗିରଫ କରିଛି। ଗିରଫ ଅଭିଯୁକ୍ତ ଜଣଙ୍କ ହେଲେ ବିଜୟ ମହାନ୍ତ। ପୋଲିସ ସୂଚନା ମୁତାବକ ନିଜ ସମ୍ପର୍କୀୟ ଖୁଡ଼ୀଙ୍କର ମୋବାଇଲରେ ଥିବା ଫେସ୍ବୁକ୍ ଆପ୍କୁ ଅପଡେଟ୍ କରିବା ବାହାନାରେ ମୋବାଇଲରେ ଥିବା ଅଶ୍ଳୀଳ ଫଟୋକୁ ଅଭିଯୁକ୍ତ ଭାଇରାଲ କରି ଦେଇଥିଲେ। ଏ ନେଇ ପୀଡ଼ିତା ଆନନ୍ଦପୁର ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ନଂ. ୨୬୪/୨୨ରେ ମାମଲା ରୁଜୁ କରି ଅଭିଯୋଗକାରୀ ଓ ଅଭିଯୁକ୍ତଙ୍କ ମୋବାଇଲ୍ ଯାଞ୍ଚ କରିଥିଲା। ପରେ ମୋବାଇଲ, ସିମ୍କାର୍ଡ଼କୁ ଜବତ କରିବା ସହ ଅଭିଯୁକ୍ତଙ୍କୁ କୋର୍ଟଚାଲାଣ କରିଛି। ଅନ୍ୟପକ୍ଷରେ ଅଭିଯୁକ୍ତ ବିଜୟ ନିଜ ଖୁଡ଼ୀର ବିୟୋଗରେ ମୁଖାଗ୍ନି ଦେଇଥିବା ବେଳେ ଖୁଡ଼ିର ନବମୀ କ୍ରିୟା ଦିନ ଗିରଫ ହୋଇ ଦଶାହରେ କୋର୍ଟଚାଲାଣ ହୋଇଥିଲେ। ଫଳରେ ଖୁଡ଼ୀଙ୍କ ଦଶାହ କ୍ରିୟାକର୍ମରେ ଯୋଗଦେଇ ପାରି ନ ଥିଲେ।
