କାଠମାଣ୍ଡୁ/ନୂଆଦିଲ୍ଲୀ, ୧୫।୧ : ଭାରତ ସରକାରଙ୍କ ପକ୍ଷରୁ ଉତ୍ତରାଖଣ୍ଡର ଲିପୁଲେଖରେ ସଡ଼କ ପ୍ରଶସ୍ତିକରଣ କାର୍ଯ୍ୟ ଜାରି ରହିଛି। ତେବେ ଏହାକୁ ନେପାଳ ପକ୍ଷରୁ ବିରୋଧ କରାଯାଇଛି। ଭାରତ ପକ୍ଷରୁ ନେପାଳ ସୀମାରେ ହସ୍ତକ୍ଷେପ କରାଯାଉଥିବା ଅଭିଯୋଗ ହୋଇଛି।
ଶାସକ ଏବଂ ବିରୋଧି ନେପାଳର ଅଖଣ୍ଡତା ଉପରେ ଜାଣିଶୁଣି ଭାରତ ହସ୍ତକ୍ଷେପ କରୁଥିବା ଅଭିଯୋଗ ଆଣିଛନ୍ତି। ତେବେ ଏଭଳି ଅଭିଯୋଗକୁ କାଠମାଣ୍ଡୁସ୍ଥିତ ଭାରତୀୟ ଦୂତାବାସ ପକ୍ଷରୁ ଖଣ୍ଡନ କରାଯାଇଛି। ନେପାଳ ସରକାରଙ୍କୁ ଦୁଇ ଦେଶସୀମାର ସ୍ଥିତି ସମ୍ପର୍କରେ ଅବଗତ କରାଇ ଦିଆଯାଇଥିବା ଦୂତାବାସ ପକ୍ଷରୁ କୁହାଯାଇଛି।
ଦୁଇଦେଶ ମଧ୍ୟରେ ଥିବା ସୀମା ବିବାଦକୁ ଶାନ୍ତିପୂର୍ଣ୍ଣ ଭାବେ ବନ୍ଧୁତ୍ୱପୂର୍ଣ୍ଣ ପରିବେଶରେ ଦ୍ୱିପାକ୍ଷିକ ବୁଝାମଣା ଦ୍ୱାରା ସମାଧାନ କରାଯାଉଥିବାର ପ୍ରୟାସ ହେଉଥିବା ଦୂତାବାସ ପକ୍ଷରୁ କୁହାଯାଇଛି।
ଉତ୍ତରାଖଣ୍ଡରେ ଭାରତ, ଚାଇନା ଏବଂ ନେପାଳ ମଧ୍ୟରେ ଥିବା ଟ୍ରାଇଜଙ୍କଶନର ଲିପୁଲେଖ, ଲିମ୍ପୁଆଧୁରା ଏବଂ କଳାପାନି ଅଞ୍ଚଳକୁ ନେପାଳ ନିଜର ଅଂଶ ବିଶେଷ ଭାବେ ଦାବି କରୁଛି। ଏହି ଦାବିକୁ ଠିକ୍ ଦର୍ଶାଇବା ଲାଗି ନେପାଳ ଗତବର୍ଷ ନିଜର ନୂଆ ରାଜନୈତିକ ମ୍ୟାପ୍ ମଧ୍ୟ ଜାରି କରିଥିଲା।
