ଭବାନୀପାଟଣା,୫ା୨(ଉତ୍ତମ କୁମାର ଦାଶ): କେନ୍ଦ୍ର ଓ ରାଜ୍ୟ ସରକାରଙ୍କ ଜନହିତକର ଯୋଜନାର ସଫଳ ରୂପାୟନ ନିମନ୍ତେ ଗତ କିଛିବର୍ଷ ହେଲା ସମସ୍ତ ବିଭାଗକୁ ସୁଦୃଢ଼ କରିବା ଉଦ୍ଦେଶ୍ୟରେ ବିଭାଗଗୁଡ଼ିକରେ ପୁନର୍ଗଠନ ପାଇଁ ପଦକ୍ଷେପ ଗ୍ରହଣ କରାଯାଇଛି। ଏହି ପରିପ୍ରେକ୍ଷୀରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗର ମଧ୍ୟ ପୁନର୍ଗଠନ ୨ ବର୍ଷ ତଳେ ବିଭାଗୀୟ ନିର୍ଦ୍ଧାରଣ ସଂଖ୍ୟା ୧୦୧୩୮/ତା୦୬ା୧୨ା୨୦୨୩ କ୍ରମେ କରାଯାଇଛି; ଯେଉଁଥିରେ ରାଜ୍ୟର ୫୩ଟି ଗୋଷ୍ଠୀ ସାମାଜିକ ସୁରକ୍ଷା ଅଧିକାରୀ, ୨୭ଟି ଉପଖଣ୍ଡ ସ୍ତରୀୟ ପଦବୀ, ୧୬ଟି ଅତିରିକ୍ତ ଜିଲା ସାମାଜିକ ସୁରକ୍ଷା ଅଧିକାରୀ, ୨ଟି ଡେପୁଟି ନିର୍ଦ୍ଦେଶକ, ଗୋଟିଏ ଯୁଗ୍ମ ନିର୍ଦ୍ଦେଶକ ପଦବୀ ପୁନର୍ଗଠନ କରାଯାଇଛି। ଏହି ନିର୍ଦ୍ଧାରଣ ଆଧାରରେ ୨୭ଟି ଉପଖଣ୍ଡସ୍ତରୀୟ ପଦବୀ ପୂରଣ କରାଯାଇଛି। ସେଥିମଧ୍ୟରୁ ସମସ୍ତ ଉପଖଣ୍ଡରେ ପଦସ୍ଥାପନ କରାଯାଇ ୧୨ ଉପଖଣ୍ଡସ୍ତରୀୟ ସାମାଜିକ ସୁରକ୍ଷା ଅଧିକାରୀ ଇଣ୍ଟିଗ୍ରେଟେଡ୍ ଇନ୍ଫ୍ରାଷ୍ଟ୍ରକ୍ଚର କମ୍ପ୍ଲେକ୍ସ (ଆଇଆଇସି)ଠାରେ ଅବସ୍ଥାପିତ ହୋଇଛନ୍ତି। ଏମାନଙ୍କର ଏ ପର୍ଯ୍ୟନ୍ତ କୌଣସି କାର୍ଯ୍ୟ ଆବଣ୍ଟନ ବିଭାଗ ଦ୍ୱାରା କରାଯାଇନାହିଁ। କିନ୍ତୁ ଅନ୍ୟ ବ୍ଲକ୍, ଜିଲା ଓ ରାଜ୍ୟସ୍ତରୀୟ ପୁନର୍ଗଠିତ ପଦବୀଗୁଡିକୁ ବିଭାଗ ଅବହେଳାକରି ୨ବର୍ଷ ଧରି ଖାଲି ରଖିଛନ୍ତି। ସମସ୍ତ ଲୋକାଭିମୁଖୀ ଯୋଜନା ବ୍ଲକ୍, ଜିଲା ସ୍ତରରେ ତ୍ୱରାନ୍ବିତ ହେଉଥିବା ବେଳେ ସରକାର ଏହି ସ୍ତରର ପଦବୀ ଅଗ୍ରାଧିକାର ଭିତ୍ତିରେ ପୂରଣ କରିବା ପରିବର୍ତ୍ତେ କେବଳ ଆଇଆଇସି କମ୍ପ୍ଲେକ୍ସ ଓ ଉପଖଣ୍ଡକୁ ଗୁରୁତ୍ୱ ପ୍ରଦାନ କରିଛନ୍ତି। ଇତିମଧ୍ୟରେ ବିଭାଗୀୟ ପଦାଧିକାରୀ ଥିବା ସତ୍ତ୍ୱେ କମ୍ପ୍ଲେକ୍ସର ପରିଚାଳନା ଦାୟିତ୍ୱ କେତେକ ଜିଲାରେ ରେଡ୍କ୍ରସ୍ ଉପରେ ନ୍ୟସ୍ତ କରାଯାଇଛି। ଉକ୍ତ ବିଭାଗର ସାମାଜିକ ସୁରକ୍ଷା ଅଧିକାରୀଙ୍କ ମାଧ୍ୟମରେ ରାଜ୍ୟ ଓ କେନ୍ଦ୍ର ସରକାରଙ୍କ ସମସ୍ତ ସାମାଜିକ ନିରାପତ୍ତା ଯୋଜନା ଅନ୍ତର୍ଗତ ମାସିକ ଭତ୍ତା ରାଜ୍ୟର ହାରାହାରି ୫୭ ଲକ୍ଷ ହିତାଧିକାରୀଙ୍କୁ ଭତ୍ତା ବଣ୍ଟନ, ପରିବାର ମଙ୍ଗଳ ଯୋଜନାରେ ଆର୍ଥିକ ସହାୟତା ପ୍ରଦାନ, ସମସ୍ତ ଦିବ୍ୟାଙ୍ଗ କଲ୍ୟାଣ ଯୋଜନା କାର୍ଯ୍ୟକାରୀ କରାଯାଉଛି। ଏଥିସହ ତୃତୀୟ ଲିଙ୍ଗ, ବରିଷ୍ଠ ନାଗରିକ ଓ ଭିକ୍ଷୁକଙ୍କ ଭଳି ଅବହେଳିତଙ୍କ ନିମନ୍ତେ ଉଦ୍ଦିଷ୍ଟ ଯୋଜନା କାର୍ଯ୍ୟାନ୍ବୟନ କରୁଛନ୍ତି। ତଥାପି ବିଭାଗୀୟ ମନ୍ତ୍ରୀ ଓ ଅଧିକାରୀ ପୁନର୍ଗଠନର ଆବଶ୍ୟକତା ହୃଦ୍ବୋଧ ନ କରିବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ସାଧାରଣରେ ମତପ୍ରକାଶ ପାଇଛି। ଇତିମଧ୍ୟରେ ୧୫ରୁ ଊଦ୍ଧର୍ବ ଜିଲା ସାମାଜିକ ସୁରକ୍ଷା ଅଧିକାରୀ ଡେପୁଟି ନିର୍ଦ୍ଦେଶକ ଓ ଯୁଗ୍ମ ନିର୍ଦ୍ଦେଶକ ପଦକୁ ପଦୋନ୍ନତି ନ ପାଇ ଅବସର ମଧ୍ୟ ନେଇସାରିଲେଣି। ୨ବର୍ଷରୁ ଊଦ୍ଧର୍ବ ସମୟ ବିତିଯାଇଥିଲେ ମଧ୍ୟ ଆଉ କେତେବର୍ଷ ବିଭାଗୀୟ ଅଧିକାରୀ ଅପେକ୍ଷାରେ ରହିବେ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
Dharitri – Odisha’s No.1 Odia Daily
