ଇସଲାମାବାଦ, ୨୨୧୦: ପାକିସ୍ତାନକୁ ଫେରିବାର କିଛି ଘଣ୍ଟା ମଧ୍ୟରେ ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫ ତାଙ୍କ କାର୍ଯ୍ୟକାଳର ସଫଳତା ବିଷୟରେ କହିବା ସହିତ ୧୯୯୮ରେ ଆଣବିକ ପରୀକ୍ଷଣ କରି ଭାରତର ଆଣବିକ ବିସ୍ଫୋରଣକୁ ସେ କିପରି ଉପଯୁକ୍ତ ଉତ୍ତର ଦେଇଥିଲେ,ସେ ସମ୍ପର୍କରେ ସୂଚନା ଦେଇଛନ୍ତି। ତେବେ ଆଣବିକ ପରୀକ୍ଷଣ ନ କରିବାକୁ ତାଙ୍କୁ ୫ ବିଲିୟନ ଡଲାର ଅଫର ଆମେରିକା ରାଷ୍ଟ୍ରପତି ବିଲ କ୍ଲିଣ୍ଟନ ଦେଇଥିଲେ ବୋଲି ସେ କହିଛନ୍ତି।
୧୯୯୮ରେ ଯେତେବେଳେ ଭାରତ ଆଣବିକ ପରୀକ୍ଷଣର ଜବାବ ପାକିସ୍ତାନ ଦେବାକୁ ଚାହୁଁଥିଲା ସେତେବେଳେ ସରିଫଙ୍କ ଉପରେ ବିଦେଶୀ ସରକାରଙ୍କ ପକ୍ଷରୁ ପ୍ରବଳ ଚାପ ପକାଯାଇଥିବା କହିଛନ୍ତି। ସେ କହିଛନ୍ତି, ବୈଦେଶିକ କାର୍ଯ୍ୟାଳୟରେ ଏକ ରେକର୍ଡ ରହିଥିବ କ୍ଲିଣ୍ଟନ ମୋତେ ୫ ବିଲିୟନ ଡଲାର ପ୍ରଦାନ କରିବାକୁ କହିଥିଲେ। ୧୯୯୯ରେ ଏହା ଘଟିଥିଲା ମୋତେ ମଧ୍ୟ ଏକ ବିଲିୟନ ଡଲାର ଦିଆଯାଇଥାନ୍ତା, କିନ୍ତୁ ମୁଁ ପାକିସ୍ତାନୀ ମାଟିରେ ଜନ୍ମ ହୋଇଛି ଏବଂ ଏହା ମୋତେ ପାକିସ୍ତାନର ବିରୁଦ୍ଧରେ କୌଣସି କାର୍ଯ୍ୟ କରିବାକୁ ଦେଇ ନ ଥିଲା।
ତାଙ୍କର ମୁଖ୍ୟ ପ୍ରତିଦ୍ୱନ୍ଦ୍ୱୀ ଇମ୍ରାନ ଖାନଙ୍କୁ ଲକ୍ଷ୍ୟ କରି ସେ କହିଛନ୍ତି, ମୋତେ କୁହ, ଯଦି ମୋ ସ୍ଥାନରେ ଅନ୍ୟ କେହି ଥାଆନ୍ତେ, ତେବେ ଆମେରିକାର ରାଷ୍ଟ୍ରପତିଙ୍କ ଚାପ ଆଗରେ ନୋଇଯାଇଥାନ୍ତେ। ବିଭିନ୍ନ ଚାପ ସତ୍ତ୍ୱେ ମୁଁ ଆଣବିକ ପରୀକ୍ଷଣ କରିଛି ଏବଂ ଆଣବିକ ପରୀକ୍ଷଣ କରି ଭାରତକୁ ଉପଯୁକ୍ତ ଉତ୍ତର ଦେଇଥିଲି।
