ଭୁବନେଶ୍ୱର,୧୮।୪: ପୁଣି ପ୍ରାର୍ଥୀ ଘୋଷଣା କରିଛି ବିଜେଡି। ପଞ୍ଚମ ପର୍ଯ୍ୟାୟ ବିଧାନସଭା ତାଲିକାରେ ୯ଜଣ ବିଧାୟକଙ୍କ ନାଁ ଘୋଷଣା କରାଯାଇଛି। ସବୁଠାରୁ ବଡ଼ କଥା ହେଲା, ଖୋଦ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ତାଲିକାରେ ଅଛନ୍ତି। ହିଞ୍ଜିଳି ପରେ ଏବେ ମୁଖ୍ୟମନ୍ତ୍ରୀ କଣ୍ଟାବାଂଜିରୁ ଲଢିବା ନେଇ ଘୋଷଣା କରିଛନ୍ତି।
୨୦୧୯ ନିର୍ବାଚନରେ ମଧ୍ୟ ମୁଖ୍ୟମନ୍ତ୍ରୀ ୨ଟି ଆସନରୁ ଲଢିବା ନେଇ ଘୋଷଣା କରିଥିଲେ। ଗୋଟିଏ ପାରମ୍ପରିକ ଆସନ ହିଞ୍ଜିଳି ହୋଇଥିବାବେଳେ ଅନ୍ୟଟି ବଜେପୁର ଆସନ ଥିଲା। ଦୁଇଟି ଆସନରୁ ମୁଖ୍ୟମନ୍ତ୍ରୀ ବଡ଼ ବ୍ୟବବଧାନରେ ବିଜୟୀ ହୋଇଥିଲେ। ହିଞ୍ଜିଳିରୁ ପିତାମ୍ବର ଆଚାର୍ଯ୍ୟଙ୍କ ଠାରୁ ବହୁ ପରିମାଣରେ ଭୋଟ ଜିତି ବିଜୟୀ ହୋଇଥିଲେ। ତେବେ ଦୁଇଟି ଆସନରୁ ଜିତିବା ପରେ ସେ ବିଜେପୁର ଆସନ ଛାଡି ଦେଇଥିଲେ। ଯେଉଁଠି ପରେ ଉପ ନିର୍ବାଚନ ଅନୁଷ୍ଠିତ ହୋଇଥିଲା। ତେବେ ଏଥର ମଧ୍ୟ ମୁଖ୍ୟମନ୍ତ୍ରୀ ଦୁଇଟି ଆନସରୁ ପ୍ରାର୍ଥୀ ହୋଇଛନ୍ତି। ତେବେ ଆସନ୍ତୁ ଜାଣିବା କଣ୍ଟାବାଂଜି ନବୀନ କାହିଁକି ଦ୍ୱିତୀୟ ଅପସନ ଭାବେ ବାଛିଲେ।
ବଲାଙ୍ଗୀର ଜିଲା ହେଉ କି କଣ୍ଟାବାଂଜି ବିଧାନସଭା ମଣ୍ଡଳୀ ବିଜେଡିର ଗଡ଼ ନୁହେଁ। ତେବେ କାହିଁକି ବିଜେଡି ସୁପ୍ରିମୋ ଏହି ଆସନକୁ ନିଜର ଦ୍ୱିତୀୟ ଅପସନ ଭାବରେ ବାଛିଲେ? ତେବେ ୨୦୦୯ ଓ ୨୦୧୯ ନିର୍ବାଚନରେ କଂଗ୍ରେସର ସନ୍ତୋଷ ସିଂହ ସାଲୁଜା କଣ୍ଟାବାଂଜିରୁ ୨-୨ ଥର ଲଢି ବିଜୟୀ ହୋଇଛନ୍ତି। ସେତେବେଳେ ସେ ବିଜେଡିର ଅୟୁବ ଖାନଙ୍କୁ ଟକ୍କର ଦେଇଥିଲେ। ଯିଏକି ମାତ୍ର ୩୮୬୮ ଭୋଟ ହାତେଇ ପାରିଥିଲେ।
ବଲାଙ୍ଗୀରରେ ୫ଟି ବିଧାନସଭା ନିର୍ବାଚନ ମଣ୍ଡଳୀ ରହିଛି। ଯେଉଁଠି ୨୦୧୯ରେ କଂଗ୍ରେସ ୨ସିଟ୍ କବଜା କରିଥିଲା। ବଲାଙ୍ଗୀର ବିଧାନସଭା ଆସନକୁ ନରସିଂହ ମିଶ୍ର କବଜା କରିଥିବାବେଳେ କଣ୍ଟାବାଂଜିକୁ ସାଲୁଜା ଅକ୍ତିଆର କରିଥିଲେ। ସେହପିରି ଭାଜପା ଲୋହିସିଂହା ଓ ବିଜେଡି ଟିଟଲାଗଡ ଓ ପାଟନାଗଡ ଅକ୍ତିଆର କରିଥିଲା। ତେବେ ବଲାଙ୍ଗୀର ଲୋକ ସଭା ସିଟ୍ରୁ ଭାଜପାର ସଙ୍ଗୀତା ସିଂହ ଦେବ ବିଜୟୀ ହୋଇଥିଲେ। ତେବେ ଏହି ହିସାବରେ ଦେଖିଲେ କଣ୍ଟାବାଂଜି ହେଉ କି ବଲାଙ୍ଗୀର ଆସନ ବିଜେଡିର ଗଡ ନୁହେଁ।
ରାଜନୈତିକ ମହଲରେ ଚର୍ଚ୍ଚା ହେଉଛି କି, ବିଜେଡି ସୁପ୍ରିମୋ ଏହି ଆସନରେ ଦଳର ଶକ୍ତି ବଢେଇବାକୁ ଆଉ ଚଳିତ ନିର୍ବାଚନରେ ହାତେଇବାକୁ ଏହାକୁ ବାଛିଛନ୍ତି। ବଲାଙ୍ଗୀର କଳାହାଣ୍ଡି, ବୌଦ୍ଧ, ସୁବର୍ଣ୍ଣପୁର, ନୂଆପଡା ଓ ବରଗଡ ସୀମାକୁ ଲାଗି ରହିଛି। କନ୍ଧମାଳ ବି ଏହି ଜିଲା ଠୁ ବେଶୀ ଦୂରରେ ନୁହେଁ। ତେବେ କଣ୍ଟାବାଂଜିରେ ସିଏମ ପ୍ରାର୍ଥୀ ହେଲେ ଏହାର ପ୍ରଭାବ ସୀମାବର୍ତ୍ତୀ ଜିଲା ଅର୍ଥାତ୍ ପୁରା ପଶ୍ଚିମ ଓଡିଶାାରେ ପଡିବ । ଏହିସବୁ ଜିଲାର ୪ ଲୋକ ସଭା ଆସନ ସହ ୨୮ ବିଧାସଭା ଆସନରେ ପ୍ରଚାର ଅଭିଯାନ ଜୋରଦାର ହୋଇପାରିବ। ୨୦୧୯ରେ ବିଜେଡି ବଲାଙ୍ଗୀର, ବରଗଡ, କଳାହାଣ୍ଡିର ଲୋକ ସଭା ଆସନରେ ପରାଜିତ ହୋଇଥିଲା। ଯାହା ଏବେ ସୁପ୍ରିମୋଙ୍କ ଦ୍ୱାରା ସମ୍ଭବ ହେବ ବୋଲି ଚର୍ଚ୍ଚା ହେଉଛି। ଏଥର ଏହି ୩ ଲୋକ ସଭା ଆସନରେ ବିଜେଡି ବଡ଼ ବ୍ୟବଧାନରେ ଜିତିବ ବୋଲି ଆକଳନ କରାଯାଉଛି। ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, କଣ୍ଟାବାଂଜିରୁ ମୁଖ୍ୟମନ୍ତ୍ରୀ ଲଢିବା ଦ୍ୱାରା ଏହା ପୁରା ପଶ୍ଚିମ ଓଡିଶାରେ ଥିବା ବିଜେଡି ସଂଗଠନକୁ ମଜବୁତ କରିବା ସହ ଦଳୀୟ କର୍ମୀଙ୍କ ମନୋବଳ ବଢାଇବ।
