ଭୁବନେଶ୍ୱର,୧୬ା୫(ଅନିଲ ଦାସ):ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭୁବନେଶ୍ୱରରେ ଏକ ବିଶାଳ ରୋଡ୍ ଶୋ’ କରି ଶକ୍ତି ପ୍ରଦର୍ଶନ କରିଛନ୍ତି। ବିଭିନ୍ନ ସ୍ଥାନରେ ଉପସ୍ଥିତ ଜନତା ମୁଖ୍ୟମନ୍ତ୍ରୀଙ୍କୁ ଦେଖିବାକୁ ଉତ୍କଣ୍ଠାର ସହ ଅପେକ୍ଷା କରିଥିଲେ। ଭୁବନେଶ୍ବର ମଧ୍ୟ ନିର୍ବାଚନମଣ୍ଡଳୀରେ ରୋଡ୍ ଶୋ’ ପାଇଁ ଗୁରୁବାର ସନ୍ଧ୍ୟାରେ ଗଙ୍ଗନଗରଠାରେ ନବୀନଙ୍କ ଗାଡ଼ି ପହଞ୍ଚିଥିଲା। ନବୀନ ଗାଡ଼ି ଉପରକୁ ଉଠି ସେଠାରେ ସମବେତ ହଜାର ହଜାର ଲୋକଙ୍କୁ ଉଦ୍ବୋଧନ ଦେଇଥିଲେ। ରାସ୍ତା ଖଚାଖଚ ଭିଡ଼ ଥିଲା। ରୋଡ୍ ଶୋ’ ବେଳକୁ ଏହି ରାସ୍ତାରେ ସାଧାରଣ ଲୋକ ଓ ଯାନବାହନ ଯାତାୟାତ ବନ୍ଦ ଥିଲା। ମୁଖ୍ୟମନ୍ତ୍ରୀ ଉଦ୍ବୋଧନ ଆରମ୍ଭ କରିବା କ୍ଷଣି ଆମ୍ବୁଲାନ୍ସର ସାଇରନ୍ ବାଜିଥିଲା। ମୁଖ୍ୟମନ୍ତ୍ରୀ ଉଦ୍ବୋଧନ କିଛିକ୍ଷଣ ପାଇଁ ବନ୍ଦକରି ହାତ ହଲାଇ ଆମ୍ବୁଲାନ୍ସକୁ ରାସ୍ତା ଛାଡ଼ିବାକୁ ସୂଚନା ଦେଇଥିଲେ। ତାଙ୍କ ଇସାରା ପାଇବା ମାତ୍ରେ ଲୋକେ କଡ଼େଇ ହୋଇଯାଇଥିଲେ। ପୋଲିସ କର୍ଡନ କରି ଆମ୍ବୁଲାନ୍ସକୁ ବାଟ କଢ଼ାଇ ନେଇଥିଲା। ରୋଡ୍ ଶୋ’ ଭିଡ ମଧ୍ୟରେ ଆମ୍ବୁଲାନ୍ସ ନ ଅଟକି ନିଜ ଗନ୍ତବ୍ୟ ପଥରେ ଚାଲିଯାଇଥିଲା। ଏହା ପରେ ମୁଖ୍ୟମନ୍ତ୍ରୀ ଉପସ୍ଥିତ ଜନତାଙ୍କୁ ଉଦ୍ବୋଧନ ଦେବା ସହ ହାତ ହଲାଇ ଅଭିବାଦନ କରିଥିଲେ। ପ୍ରବଳ ଭିଡ଼ ମଧ୍ୟରେ ମୁଖ୍ୟମନ୍ତ୍ରୀଙ୍କ ରୋଡ୍ ଶୋ ଆଗକୁ ବଢ଼ିଥିଲା। ଗଙ୍ଗନଗର ଛକ ପରେ ଏଲ୍ଆଇସି ଛକ, ଗୋପବନ୍ଧୁ ଛକ, ୟୁନିଟ୍-୮, ଡିଏଭି ସ୍କୁଲ ଛକ, ଏଚ୍ଡିଏଫ୍ସି ଛକ, ବାଲୁଙ୍କେଶ୍ୱର ମନ୍ଦିର ଦେଇ ରୋଡ୍ ଶୋ’ ଆଗକୁ ଚାଲିଥିଲା। ରାସ୍ତାର ଦୁଇକଡ଼ରେ ଶହ ଶହ ଲୋକ ମୁଖ୍ୟମନ୍ତ୍ରୀଙ୍କୁ ସ୍ବାଗତ କରିଥିଲେ। ଏହା ପରେ ମୁଖ୍ୟମନ୍ତ୍ରୀଙ୍କ ରୋଡ୍ ଶୋ’ ମମତାଜ ଅଲ୍ଲୀ ହାଇସ୍କୁଲ, ଶ୍ରୀକ୍ରିଷ୍ଣା କ୍ଲବ, କଳିଙ୍ଗ ଷ୍ଟାଡିୟମ, ନିକୋପାର୍କ ଛକ, ବାୟାବାବା ଲେନ୍, ରୂପାଲି ଛକ, ସତ୍ୟନଗର, ଶ୍ରୀୟା ଛକ, ମାଷ୍ଟର କ୍ୟାଣ୍ଟିନ, ରାଜମହଲ ଛକ ଦେଇ ଶିଶୁ ଭବନ ଛକ ପର୍ଯ୍ୟନ୍ତ ଯାଇଥିଲା। ରାସ୍ତାର ଦୁଇ ପାର୍ଶ୍ୱରେ ଲୋକମାନେ ମୁଖ୍ୟମନ୍ତ୍ରୀଙ୍କ ରୋଡ୍ ଶୋ’କୁ ଦୀର୍ଘ ସମୟ ଧରି ଅପେକ୍ଷା କରିଥିବା ଦେଖାଯାଇଥିଲା। ରୋଡ୍ ଶୋ ବେଳେ ମୁଖ୍ୟମନ୍ତ୍ରୀ ବସ୍ର ଖୋଲା ରୁଫ ଦେଇ ଲୋକଙ୍କୁ ହାତହଲାଇ ଅଭିନନ୍ଦନ ଜଣାଇବା ସହ ଦଳୀୟ ପ୍ରାର୍ଥୀମାନଙ୍କୁ ବହୁ ସଂଖ୍ୟାରେ ଭୋଟ ଦେଇ ବିଜୟୀ କରିବାକୁ ଅନୁରୋଧ କରିଥିଲେ। ଏହି ରୋଡ୍ ଶୋ’ରେ ବିଜେଡି ବରିଷ୍ଠ ନେତା କାର୍ତ୍ତିକ ପାଣ୍ଡିଆନ, ଭୁବନେଶ୍ୱର ଏକାମ୍ର ବିିଧାୟକ ପ୍ରାର୍ଥୀ ଅଶୋକ ଚନ୍ଦ୍ର ପଣ୍ଡା, ମଧ୍ୟ ବିଧାୟକ ପ୍ରାର୍ଥୀ ଅନନ୍ତ ନାରାୟଣ ଜେନାଙ୍କ ସମେତ ବିଜେଡିର ବହୁ ବରିଷ୍ଠ ନେତା ଓ କର୍ମୀ ସାମିଲ ହୋଇଥିଲେ।
