ଲକ୍ଷ୍ନୌ,୧୭ା୨: ଲକ୍ଷ୍ନୌସ୍ଥିତ ବାବା ଭୀମ ରାଓ ଆମ୍ବେଦକରସ୍ଥିତ କେନ୍ଦ୍ରୀୟ ବିଶ୍ୱବିଦ୍ୟାଳୟରେ ଶୁକ୍ରବାର ଜନପ୍ରିୟ ବିଜ୍ଞାନ ଲେଖକ ତଥା ବିଜ୍ଞାନ ସଞ୍ଚାରକ ବିରାଟ ରାଜା ପଧାନଙ୍କୁ ପ୍ରଫେସର ହରିଶଙ୍କର ଶ୍ରୀବାସ୍ତବ ଜାତୀୟ ବିଜ୍ଞାନ ସଂଚାରକ ପୁରସ୍କାର ପ୍ରଦାନ କରାଯାଇଛି। ଆଜି ବିଶ୍ୱବିଦ୍ୟାଳୟସ୍ଥିତ ଅଟଳ ବିହାରୀ ବାଜପେୟୀ ଅଡିଟରିୟମଠାରେ ଅନୁଷ୍ଠିତ ଅନ୍ତର୍ଜାତୀୟ ସମ୍ମିଳନୀ ଅବସରରେ ଉତ୍ତର ପ୍ରଦେଶ ସରକାରଙ୍କ ଜଳ ଶକ୍ତି ବିଭାଗୀୟ ମନ୍ତ୍ରୀ ସ୍ବତନ୍ତ୍ର ଦେବ ସିଂହ ମୁଖ୍ୟ ଅତିଥି ଭାବରେ ଯୋଗ ଦେଇ ପଧାନଙ୍କୁ ମାନପତ୍ର, ଉପଢୌକନ, ଅନୁଷ୍ଠାନର ଆଜୀବନ ସଦସ୍ୟତା ଏବଂ ୨୦୦୦୦ ଟଙ୍କାର ପୁରସ୍କାର ରାଶି ପ୍ରଦାନ କରିଥିଲେ। କେନ୍ଦ୍ରୀୟ ବିଶ୍ୱବିଦ୍ୟାଳୟର କୁଳପତି ପ୍ରଫେସର ସଞ୍ଜୟ ସିଂହଙ୍କ ସଭାପତିତ୍ୱରେ ଅନୁଷ୍ଠିତ ଏହି ଉତ୍ସବରେ ଅନ୍ୟମାନଙ୍କ ମଧ୍ୟରେ ପଦ୍ମବିଭୂଷଣ ଅନିଲ ଯୋଶୀ,ନେହୁ ବିଶ୍ୱବିଦ୍ୟାଳୟର ବରିଷ୍ଠ ପ୍ରଫେସର ସରୋଜ କୁମାର ବାରିକ, ପ୍ରଫେସର ରାଣା ପ୍ରତାପ ସିଂହ ପ୍ରମୁଖ ଏହି ସମ୍ମାନ ସମାରୋହରେ ଉପସ୍ଥିତ ଥିଲେ।
ଝାରସୁଗୁଡ଼ା ଜିଲା ଲଖନପୁର ବ୍ଲକ ବେଙ୍କମୁରାଠାରେ ଏକାରାମ ପଧାନ ଓ ଶଙ୍କରାବତି ପଧାନଙ୍କ ଔରସରୁ ଜନ୍ମିତ ଶ୍ରୀ ପଧାନ ୧୯୯୭ରୁ ବିଭିନ୍ନ ବିଜ୍ଞାନ ରଚନାରେ ନିମଗ୍ନ। ସେହିପରି ବିଜ୍ଞାନର ପ୍ରଚାର ପ୍ରସାର ଦିଗରେ ସୁନ୍ଦରଗଡ଼ ଓ ଝାରସୁଗୁଡ଼ା ଜିଲାରେ ସେ ବିଭିନ୍ନ ପ୍ରକାରର କାର୍ଯ୍ୟକ୍ରମ ଆୟୋଜନ କରିଛନ୍ତି। ତାଙ୍କର ଲେଖାଗୁଡିକ ଶୈଶବ, ମନପବନ, ଯୁଗୋପଯୋଗୀ ସୁବର୍ଣ୍ଣଦୀପ,ସଂସାର,ଧରିତ୍ରୀ,ସମାଜ, ପ୍ରଗତିବାଦୀ,ସମୟ,ସକାଳ,ପ୍ରମେୟ ଆଦି ବହୁ ପତ୍ରପତ୍ରିକାରେ ପ୍ରକାଶିତ ଓ ଉଚ୍ଚ ପ୍ରଶଂସିତ ହୋଇଛି।
