ଇସଲାମାବାଦ,୧୦।୧୦: ଦୁବାଇରେ ଥିବା ଏସୀୟ କ୍ରିକେଟ ପରିଷଦ (ACC) ମୁଖ୍ୟାଳୟରେ ଏସିଆ କପ ଟ୍ରଫିକୁ ବନ୍ଦ କରି ରଖାଯାଇଛି। ACC ମୁଖ୍ୟ ମୋହସିନ ନକଭି ନିର୍ଦ୍ଦେଶ ଦେଇଛନ୍ତି ଯେ ତାଙ୍କ ଅନୁମୋଦନ ବିନା ଟ୍ରଫିକୁ ସ୍ଥାନାନ୍ତରିତ କରାଯିବା ଉଚିତ ନୁହେଁ, ଭାରତକୁ ହସ୍ତାନ୍ତର କରିବା ତ ଦୂରର କଥା।
ଏସିଆ କପ ଜିତିବା ପରେ, ଭାରତୀୟ ଦଳ ନକଭିଙ୍କଠାରୁ ଟ୍ରଫି ଗ୍ରହଣ କରିବାକୁ ମନା କରିଦେଇଥିଲା। ନକଭି ଏହାକୁ ତାଙ୍କ ସହିତ ନେଇଯାଇଥିଲେ, ଏବଂ ଏହା ସେବେଠାରୁ ACC କାର୍ଯ୍ୟାଳୟରେ ଅଛି। ସେପ୍ଟେମ୍ବର ୨୮ରେ ଦୁବାଇରେ ହୋଇଥିବା ଏସିଆ କପ ଫାଇନାଲରେ ଭାରତ ପାକିସ୍ତାନକୁ ପରାସ୍ତ କରିଥିଲା।
ନକଭି ପାକିସ୍ତାନ କ୍ରିକେଟ ବୋର୍ଡ (PCB) ର ଅଧ୍ୟକ୍ଷ ଏବଂ ତାଙ୍କ ଦେଶର ଗୃହମନ୍ତ୍ରୀ ମଧ୍ୟ। ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଶୀର୍ଷରେ ପହଞ୍ଚିଛି।
ନକଭିଙ୍କ ନିକଟତର ଏକ ସୂତ୍ର PTI କୁ କହିଛି, ‘ଆଜି ପର୍ଯ୍ୟନ୍ତ, ଟ୍ରଫିଟି ଦୁବାଇର ACC କାର୍ଯ୍ୟାଳୟରେ ଅଛି, ଏବଂ ନକଭି ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି ଯେ ଏହା ତାଙ୍କ ଅନୁମୋଦନ ଏବଂ ବ୍ୟକ୍ତିଗତ ଉପସ୍ଥିତି ବିନା କାହାକୁ ହସ୍ତାନ୍ତର କରାଯିବା ଉଚିତତ୍ ନୁହେଁ।’ ନକଭି ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି ଯେ କେବଳ ସେ ବ୍ୟକ୍ତିଗତ ଭାବରେ ଟ୍ରଫି (ଯେତେବେଳେ ଏହା ହେବ) ଭାରତୀୟ ଦଳ କିମ୍ବା ବିସିସିଆଇ (ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ)କୁ ହସ୍ତାନ୍ତର କରିବେ।
ଭାରତ ଏବଂ ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନାର ଛାୟାରେ ଏସିଆ କପ ଖେଳାଯାଇଥିଲା। ଭାରତୀୟ ଖେଳାଳିମାନେ ସମଗ୍ର ଟୁର୍ଣ୍ଣାମେଣ୍ଟରେ ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇ ନଥିଲେ। ଏହା ବ୍ୟତୀତ, ନକଭି ସୋସିଆଲ ମିଡିଆରେ ରାଜନୈତିକ ବୟାନ ମଧ୍ୟ ଦେଇଥିଲେ।
ବିସିସିଆଇ ତାଙ୍କ ଟ୍ରଫି ନେବାର କାର୍ଯ୍ୟକୁ କଡ଼ା ବିରୋଧ କରିଥିଲା ଏବଂ ଆସନ୍ତା ମାସରେ ଆଇସିସି ବୈଠକରେ ଏହି ପ୍ରସଙ୍ଗ ଉଠାଇବାକୁ ନିଷ୍ପତ୍ତି ନେଇଥିଲା। ନକଭିଙ୍କୁ ନିନ୍ଦା କରିବା ଏବଂ ତାଙ୍କୁ ଆଇସିସି ନିର୍ଦ୍ଦେଶକ ପଦରୁ ହଟାଇବା ପାଇଁ କଡ଼ା କାର୍ଯ୍ୟାନୁଷ୍ଠାନ ନିଆଯାଇପାରେ ବୋଲି କଳ୍ପନାଜଳ୍ପନା ଜୋର ଧରିଛି।
Dharitri – Odisha’s No.1 Odia Daily
