ପୁରୀ ଅଫିସ, ୧୧।୭: ରଥ, ପଥ, ସେବାୟତ ସମସ୍ତେ ପ୍ରସ୍ତୁତ। ସୋମବାର ରଥଯାତ୍ରା। ବଡ଼ଦାଣ୍ଡରେ ଗଡ଼ିବ ତିନିରଥ। ଏଥର କୋଭିଡ୍ କଟକଣା ଦୃଷ୍ଟିରୁ ବିନା ଭକ୍ତରେ ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ଘୋଷଯାତ୍ରା ହେଉଥିବା ବେଳେ ସେବାୟତମାନେ ରଥ ଟାଣିବେ। ଚତୁର୍ଦ୍ଧାମୂର୍ତ୍ତି ରତ୍ନବେଦି ଛାଡ଼ି ରଥରେ ବିଜେ ହୋଇ ଜନ୍ମବେଦି (ଶ୍ରୀଗୁଣ୍ଡିଚା ମନ୍ଦିର)କୁ ବୁଲିଯିବେ। ପୂର୍ବ ନିର୍ଦ୍ଧାରିତ ନୀତିକାନ୍ତି ଅନୁଯାୟୀ, ସୋମବାର ପୂର୍ବାହ୍ନ ୮ଟା ୧୫ରେ ମଙ୍ଗଳାର୍ପଣ ସରିବା ପରେ ୮ଟା ୩୦ରେ ପହଣ୍ଡି ଆରମ୍ଭ ହେବ। ୧୧ଟା ୩୦ରେ ପହଣ୍ଡି ସରିବ, ମଧ୍ୟାହ୍ନ ୧୨ରୁ ୧୨ଟା ୩୦ ମଧ୍ୟରେ ମଦନମୋହନ ବିଜେ କରିବେ। ଅପରାହ୍ନ ୧ଟା ପୂର୍ବରୁ ଚିତାଲାଗି ହୋଇ ୨ଟା ସୁଦ୍ଧା ଛେରାପହଁରା ସରିବ। ୩ଟା ସୁଦ୍ଧା ଚାରମାଳ ଫିଟା, ଘୋଡ଼ା ଓ ସାରଥୀ ଲାଗିବ। ଅପରାହ୍ନ ୩ଟାରେ ରଥଟଣା ଆରମ୍ଭ ହେବ।
