ନନ୍ଦପୁର/ପାଡୁଆ,୩ା୬(ତୁଷାର କାନ୍ତ ମହାନ୍ତି/ଶଙ୍କର ପୂଜାରୀ): କୋରାପୁଟ ଜିଲା ନନ୍ଦପୁର ବ୍ଲକ ସଦର ମହକୁମାରେ ନିର୍ବାଚନ ପରଠୁ ଶିତଳାବସ୍ଥାରେ ଥିବା ବିଜୁ ଜନତା ଦଳ ବୁଧବାର ଶକ୍ତି ପ୍ରଦର୍ଶନ କରିଛି । ପଟାଙ୍ଗି ବିଧାୟକ ରାମଚନ୍ଦ୍ର କାଡାମ ବ୍ଲକ ପ୍ରଶାସନକୁ ହାତବାରିଶି କରି ମନମୁଖୀ କାର୍ଯ୍ୟ କରୁଥିବା, ନିର୍ବାଚିତ ପ୍ରତିନିଧିଙ୍କୁ ଅଣଦେଖା ଓ ଅସମ୍ମାନ, ବ୍ଲକ ଅଞ୍ଚଳର ବିକାଶ କାର୍ଯ୍ୟରେ ଶିଥିଳତା, ଭତ୍ତା ପର୍ଯ୍ୟନ୍ତ ସବୁଥିରେ ଅନିୟମିତତା ଦର୍ଶାଇ ଏହି ଆନ୍ଦୋଳନ କରାଯାଇଛି । ହଜାର ସଂଖ୍ୟାରେ ବିଜେଡି କର୍ମୀ ନନ୍ଦପୁର ସର୍ବେଶ୍ଵର ମନ୍ଦିର ଠାରୁ ଶୋଭାଯାତ୍ରାରେ ଆସି ବ୍ଲକ କାର୍ଯ୍ୟାଳୟ ସମ୍ମୁଖରେ ବିଧାୟକଙ୍କ କୁଶ ପୁତ୍ତଳିକା ଦାହ କରିବା ସହ ପ୍ରାୟ ଦୁଇ ଘଣ୍ଟା ଧରି ବ୍ଲକ କାର୍ଯ୍ୟାଳୟକୁ ଘେରାଉ କରି ରଖିଥିଲେ।
ବ୍ଲକ ଫାଟକ ସମ୍ମୁଖରେ ବିଧାୟକ ଓ ବ୍ଲକ ପ୍ରଶାସନ ଉଦ୍ଦେଶ୍ୟରେ ନାରାବାଜି କରିବା ସହ ଆଗାମୀ କାର୍ଯ୍ୟବଳିରେ ସଂଶୋଧନ କରନ୍ତୁ । ନଚେତ୍ ବିଜେଡି ବ୍ଲକରେ କୌଣସି କାର୍ଯ୍ୟ କରାଇ ଦେବ ନାହିଁ ବୋଲି ଚେତାବନୀ ଦେଇଥିଲେ । ବ୍ଲକ ବିଜେଡି ସଭାପତି କାଶୀନାଥ ଗୋଲରୀଙ୍କ ତତ୍ତ୍ଵାବଧାନରେ ଅନୁଷ୍ଠିତ କାର୍ଯ୍ୟକ୍ରମରେ ପୂର୍ବତନ ଏମପି ତଥା ଜିଲ୍ଲା ବିଜେଡି ସଭାପତି ଜିନୋ ହିକକା, ପୂର୍ବତନ ବିଧାୟକ ପ୍ରଫୁଲ୍ଲ ପାଙ୍ଗି, ପୀତମ ପାଢ଼ୀ, ଜିଲ୍ଲାପରିଷଦ ଅଧ୍ୟକ୍ଷା ସସ୍ମିତା ମେଲକା, ଜିଲ୍ଲା ମହିଳା ସଭାନେତ୍ରୀ ପାର୍ବତୀ ମସ୍ତି, ଜୋନାଲ ମହିଳା ସଭାନେତ୍ରୀ ଲତା ରାୟ, ଉର୍ମିଳା ମୁଦୁଲି, ପଟାଙ୍ଗି ନିର୍ବାଚନ ମଣ୍ଡଳୀର ସମସ୍ତ ବିଜେଡି ସମର୍ଥିତ ନିର୍ବାଚିତ ପ୍ରତିନିଧି, ନନ୍ଦପୁର ବ୍ଲକ ଅଧ୍ୟକ୍ଷା ସାବିତ୍ରୀ କାର୍ତୁଲ ଉପାଧ୍ୟକ୍ଷ ଗୋପାଳ ହନ୍ତାଳ, ବରିଷ୍ଠ ବିଜେଡି କର୍ମୀ ଗୋପାଳ କୃଷ୍ଣ ବେବର୍ତ୍ତା, ଜଗନ୍ନାଥ ପାଙ୍ଗି, କାର୍ତ୍ତିକ ଖେମୁଣ୍ଡୁ, ପ୍ରଭାତ ଗୁରୁମାଇଙ୍କ ସମେତ ୨୩ ପଞ୍ଚାୟତର ବିଜୁ ଜନତା ଦଳର କର୍ମୀ ସାମିଲ ଥିଲେ।
ସୂଚନା ଥାଉକି, ଗତ ଶନିବାର ସରପଞ୍ଚ ସମିତି ସଭ୍ୟ ଜିଲାପାଳଙ୍କୁ ପତ୍ରଲେଖି ସାମୂହିକ ଇସ୍ତଫା ଧମକ ଓ ବ୍ଲକ କାର୍ଯ୍ୟଳୟରେ ଅନୁଷ୍ଠିତ ବିଧାୟକଙ୍କ ନିର୍ବାଚନ ମଣ୍ଡଳୀ ସ୍ତରୀୟ ସମୀକ୍ଷା ବୈଠକରେ ବ୍ଲକ ଅଧ୍ୟକ୍ଷାଙ୍କୁ ସାମିଲ ନକରିବା ଅଭିଯୋଗ ହୋଇଛି। ସେହିପରି ବିଧାୟକ କୁଲାରସିଂ ପଞ୍ଚାୟତ ସରପଞ୍ଚଙ୍କ ସ୍ୱାମୀଙ୍କୁ ଧକ୍କା ମାରିବା ଘଟଣା ଓ ନନ୍ଦପୁର ବିଜେଡିର ବିଧାୟକଙ୍କୁ ଖୋଲା ଚିଠି ପ୍ରଦାନ ପରେ ବିଜେଡି ତରଫରୁ ଆଗାମୀ ପଞ୍ଚାୟତ ନିର୍ବାଚନ ଆଗରୁ ନିଜର ଉପସ୍ଥିତି ଜାହିର କରିବାକୁ ଏଭଳି ଶୋଭାଯାତ୍ରା ଓ ଘେରାଉ କାର୍ଯ୍ୟକ୍ରମ ଆୟୋଜନ କରାଯାଇଥିଲା ବୋଲି ବୁଦ୍ଧିଜୀବୀ ମତପ୍ରକାଶ କରିଛନ୍ତି। ନନ୍ଦପୁର ପୋଲିସ ଉପଖଣ୍ଡ ଅଧିକାରୀ ଦେବେନ୍ଦ୍ର ମଲ୍ଲିକ, ଥାନାଧିକାରୀ ତ୍ରିନାଥ ତୋଟା ପାଡ଼ିଆ ପୋଲିସ ଦଳ ସହ ଉପସ୍ଥିତ ରହି ପରିସ୍ଥିତି ଉପରେ କଡା ନଜର ରଖିଥିଲେ ।
