ନୂଆଦିଲ୍ଲୀ,୮।୧୧ : କୁହାଯାଏ ଦିଲ୍ଲୀର ଲୋକମାନେ ଖାଦ୍ୟକୁ ବହୁତ ଭଲ ପାଆନ୍ତି। ଦିଲ୍ଲୀର ପ୍ରାୟ ପ୍ରତ୍ୟେକ ଢାବା, ହୋଟେଲ ଏବଂ ରେଷ୍ଟୁରାଣ୍ଟ କିଛି ବିଶେଷ ଖାଦ୍ୟ ପାଇଁ ପ୍ରସିଦ୍ଧ। ସେହିଭଳି, କନ୍ନଟ ପ୍ଲେସ ଅଞ୍ଚଳର କିଛି ଢାବା ସେମାନଙ୍କର ସୁସ୍ବାଦୁ ତନ୍ଦୁର ଚିକେନ ପାଇଁ ପ୍ରସିଦ୍ଧ। କିନ୍ତୁ ଦୁର୍ଭାଗ୍ୟବଶତଃ ଦିଲ୍ଲୀର ଲୋକମାନେ କିଛି ଦିନ ପାଇଁ ଏହି ସୁସ୍ବାଦୁ ତନ୍ଦୁର ଚିକେନ କିସମର ସ୍ବାଦ ଚାଖି ପାରିବେ ନାହିଁ। କିଛି ଦିନ ପାଇଁ ଏବେ ଦିଲ୍ଲୀରେ ନାନ୍-ରୁଟି-ତନ୍ଦୁରୀ ଚିକେନ ବନ୍ଦ ହୋଇଛି। ଏହାର କାରଣ ହେଉଛି ଦିଲ୍ଲୀରେ ଜିଆରଏପି-୪ କାର୍ଯ୍ୟକାରୀ କରାଯାଇଛି।
ଦିଲ୍ଲୀର ବାୟୁ ପ୍ରଦୂଷଣକୁ ଦୃଷ୍ଟିରେ ରଖି ରବିବାର ଜିଆରଏପି-୪ ଲାଗୁ କରାଯାଇଥିଲା। ଏହା ଲାଗୁ ହେବା ପରେ, ସମସ୍ତ ଜିନିଷ ଯାହା ଧୂଳି ପ୍ରଦୂଷଣକୁ ବଢ଼ାଇଥାଏ ଏନଡିଏମସି ଦ୍ୱାରା ବନ୍ଦ କରାଯାଉଛି। ଏହା ଅନ୍ତର୍ଗତ, ଦିଲ୍ଲୀ-ଏନସିଆରର ଢାବା, ହୋଟେଲ ଏବଂ ରେଷ୍ଟୁରାଣ୍ଟରେ ତନ୍ଦୁର ଚୂଲା ବନ୍ଦ କରିବାକୁ ଏନଡିଏମସି ପ୍ରଥମେ ନୋଟିସ ଦେଇଛି। ଏହା ସହିତ ଚେତାବନୀ ଦିଆଯାଇଛି ଯଦି ଏହି ସମୟ ମଧ୍ୟରେ ଯଦି କେହି ତନ୍ଦୁର ଚୁଲା ଜାଳନ୍ତି, ତେବେ ତାଙ୍କ ବିରୋଧରେ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଜିଆରଏପି-୪ ର ନିୟମ ଅନୁଯାୟୀ, ଏନଡିଏମସି ଏପର୍ଯ୍ୟନ୍ତ ଏହି ଅଞ୍ଚଳରେ ୨୫୪ଜଣଙ୍କ ବିରୁଦ୍ଧରେ ତନ୍ଦୁର ଚୁଲା ଜାଳିବା ପାଇଁ କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ଏନଡିଏମସି ଉପାଧ୍ୟକ୍ଷ ସତୀଶ ଉପାଧ୍ୟାୟ କହିଛନ୍ତି କନ୍ନଟ ପ୍ଲେସ ଏବଂ ଏନଡିଏମସିର ଅନ୍ୟାନ୍ୟ ଅଞ୍ଚଳରେ ଢାବା, ହୋଟେଲ ଏବଂ ରେଷ୍ଟୁରାଣ୍ଟ ମାଲିକମାନଙ୍କୁ ତନ୍ଦୁର ଚୁଲା ନ ଜାଳିବା ଲାଗି ନୋଟିସ ଦିଆଯାଇଛି। ଏହା ସହିତ ଏନଡିଏମସିର ଏନଫୋର୍ସମେଣ୍ଟ ବିଭାଗର ଏକ ଟିମ ଏହାର ଅନୁସନ୍ଧାନ ପାଇଁ ଗଠନ କରାଯାଇଛି। ଏହି ଟିମ ଆସନ୍ତା କିଛି ଦିନ ପାଇଁ କନ୍ନଟ ପ୍ଲେସ ଅଞ୍ଚଳରେ ଅନୁସନ୍ଧାନ କରିବ। ସେ କହିଛନ୍ତି ଦିଲ୍ଲୀର ବାୟୁକୁ ବିଚାରକୁ ନେଇ ଅଙ୍ଗାର ବ୍ୟବହାର କରି ତନ୍ଦୁର ଚୁଲା ଜାଳିବାକୁ ଅନୁମତି ଦିଆଯାଉ ନାହିଁ।
