ବଅଁରପାଳ, ୭।୧ (ଡି.ଏନ.ଏ.): ଅନୁଗୋଳ ଜିଲାରେ ଥିବା ରାଷ୍ଟ୍ରାୟତ୍ତ ଉଦ୍ୟୋଗ ନାଲ୍କୋ ଶନିବାର ପ୍ରତିଷ୍ଠା ଦିବସ ପାଳନ କରିବ। ଚଳିତବର୍ଷ କମ୍ପାନୀ ୪୩ ବର୍ଷରେ ପଦାର୍ପଣ କରୁଛି। ଏହି ପ୍ରତିଷ୍ଠା ଦିବସ ପାଳନ ଅବସରରେ ନାଲ୍କୋ ପକ୍ଷରୁ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହେବ। ଗୋପବନ୍ଧୁ ପାର୍କରେ ୨ ଦିନ ଧରି ସାଂସ୍କୃତିକ କାର୍ଯ୍ୟକ୍ରମ ଚାଲିବ। ପୂର୍ଣ୍ଣ କ୍ଷମତାରେ ଚାଲୁଥିବା ଏହି ରାଷ୍ଟ୍ରାୟତ୍ତ ଉଦ୍ୟୋଗରେ ଆଲୁମିନିୟମ ଉତ୍ପାଦନ ବୃଦ୍ଧି ପାଇବା ସହ ଚଳିତବର୍ଷ କମ୍ପାନୀ ୨୯ଶହ କୋଟି ଟଙ୍କାର ଲାଭ ଅର୍ଜନ କରିଛି।
ଆଲୁମିନିୟମ ଶିଳ୍ପ କ୍ଷେତ୍ରରେ ନାଲ୍କୋ ବେଶ୍ ସୁନାମ ଅର୍ଜନ କରିଛି। ଏଠାରୁ ଉତ୍ପାଦିତ ଆଲୁମିନିୟମର ଚାହିଦା ବିଶ୍ୱ ବଜାରରେ ରହିଛି। ଉତ୍ପାଦନ ପରି ରପ୍ତାନି କ୍ଷେତ୍ରରେ ମଧ୍ୟ କମ୍ପାନୀକୁ ବଡ଼ ସଫଳତା ମିଳିପାରିଛି। ଚଳିତ ଆର୍ଥିକ ବର୍ଷରେ ସ୍ମେଲଟର ଓ ସିପିପିରୁ କାଷ୍ଟ ମେଟାଲ ଏବଂ ହଟ୍ ମେଟାଲ ଧାର୍ଯ୍ୟଲକ୍ଷ୍ୟ ଅନୁଯାୟୀ ଉତ୍ପାଦନ କରାଯାଇଛି। ସ୍ମେଲଟରରେ ଥିବା ସମସ୍ତ ୯୬୦ ପଟ୍ କାର୍ଯ୍ୟକ୍ଷମ ଥିବାବେଳେ ସିପିପିର ୧୦ ୟୁନିଟ୍ ମଧ୍ୟରୁ ୭ଟି ଚାଲୁଛି। ବିଭିନ୍ନ କ୍ଷେତ୍ରରେ ଅର୍ଜନ କରିଥିବା ସଫଳତା ପାଇଁ ସ୍ମେଲଟର ପ୍ଲାଣ୍ଟକୁ କଳିଙ୍ଗ ସୁରକ୍ଷା ପୁରସ୍କାର ଓ ସିପିପିକୁ ଶକ୍ତିର ଉତ୍କୃଷ୍ଟ ଉପଯୋଗୀ ପୁରସ୍କାର ପ୍ରଦାନ କରାଯାଇଛି। ଉତ୍କଳ ଡି କୋଲ୍ ବ୍ଲକ ସହ ନାଲ୍କୋର ଲାଇଫ ଲାଇନ କୁହାଯାଉଥିବା ଲିନ୍ସଲରୀ ପ୍ରୋଜେକ୍ଟ ଦ୍ରୁତଗତିରେ ଆଗେଇ ଚାଲିଛି। ସେହିପରି ପ୍ଲାଣ୍ଟ ପାରିପାର୍ଶ୍ୱିକ ଅଞ୍ଚଳରେ ଶିକ୍ଷା, ସ୍ବାସ୍ଥ୍ୟ, ପାନୀୟଜଳ ବଣ୍ଟନ ଓ ଉନ୍ନୟନ ଦିଗରେ ସହଯୋଗ କରାଯାଉଥିବା ନାଲ୍କୋ ପକ୍ଷରୁ ସୂଚନା ଦିଆଯାଇଛି।
ସମସ୍ତ ପଟ୍ କାର୍ଯ୍ୟକ୍ଷମ ରହିଛି
ବର୍ତ୍ତମାନ ପୂର୍ଣ୍ଣ କ୍ଷମତାରେ ପ୍ଲାଣ୍ଟ ଚାଲିଛି। ସମସ୍ତ ପଟ୍ କାର୍ଯ୍ୟକ୍ଷମ ଥିବାରୁ ଉତ୍ପାଦନ ବୃଦ୍ଧି ପାଉଛି। ଆଲୁମିନିୟମ ଉତ୍ପାଦନ କ୍ଷେତ୍ରରେ ନାଲ୍କୋ ଏକ ସଫଳତାର ନାମ। ଚଳିତବର୍ଷ ଏହି ରାଷ୍ଟ୍ରାୟତ୍ତ ଉଦ୍ୟୋଗ ଭଲ ଲାଭ ହାସଲ କରିପାରିଛି।
-ଭୀମସେନ ପ୍ରଧାନ, ନିର୍ବାହୀ ନିର୍ଦ୍ଦେଶକ, ନାଲ୍କୋ
ପାରିପାର୍ଶ୍ୱିକ ଅଞ୍ଚଳର ବିକାଶ ହେଉଛି
ନାଲ୍କୋ ଏକ ଲାଭଦାୟକ ସଂସ୍ଥା। ସବୁକ୍ଷେତ୍ରରେ ଏହି ଉଦ୍ୟୋଗ ସଫଳତା ହାସଲ କରିଚାଲିଛି। ପାରିପାର୍ଶ୍ୱିକ ଅଞ୍ଚଳର ବିକାଶ ଦିଗରେ ମଧ୍ୟ ନାଲ୍କୋ ଧ୍ୟାନ ଦେଉଛି। ଏହି ପ୍ଲାଣ୍ଟ ଅଧିକରୁ ଅଧିକ ଉନ୍ନତି କରୁ।
-ସୁନୀଲ ମହାପାତ୍ର, ଡିଜିଏମ୍, ନାଲ୍କୋ
ନୂତନ ନିଯୁକ୍ତି ଉପରେ ଧ୍ୟାନ ଦିଆଯାଉ
ନବରତ୍ନ ଉଦ୍ୟୋଗ ନାଲ୍କୋ ୪୩ ବର୍ଷରେ ପହଞ୍ଚିଥିଲେ ମଧ୍ୟ ସର୍ବାଧିକ ଲାଭ ଓ ଉତ୍ପାଦନରେ ରେକର୍ଡ ହାସଲ କରୁଛି। କିନ୍ତୁ ବର୍ତ୍ତମାନ ବହୁ କର୍ମଚାରୀ ଅବସର ନେଉଥିବାରୁ ନୂତନ ନିଯୁକ୍ତି ଓ ରକ୍ଷଣାବେକ୍ଷଣ ଉପରେ ଧ୍ୟାନ ଦିଆଯିବା ଦରକାର।
-ବିଭବ ଜେନା, ସାଧାରଣ ସମ୍ପାଦକ, ନାଲ୍କୋ ଶ୍ରମିକ କଂଗ୍ରେସ ୟୁନିୟନ
ଉନ୍ନତି ପାଇଁ ସହଯୋଗ ଲୋଡ଼ା
ନାଲ୍କୋ ଯୋଗୁ ପାରିପାର୍ଶ୍ୱିକ ଅଞ୍ଚଳର ବିକାଶ ଘଟୁଛି। ବହୁ ବେକାର ଯୁବତୀ ଯୁବକଙ୍କୁ ନିଯୁକ୍ତି ମିଳିଥିବା ବେଳେ ଅନେକେ ପରୋକ୍ଷରେ ରୋଜଗାରକ୍ଷମ ହୋଇପାରିଛନ୍ତି। ତେଣୁ ଅଧିକରୁ ଅଧିକ ସହଯୋଗ ଏହି ପ୍ଲାଣ୍ଟର ବିକାଶକୁ ତ୍ୱରାନ୍ବିତ କରିପାରିବ।
-ବିନୋଦ ସାମଲ, ସାଧାରଣ ସମ୍ପାଦକ, ଆଲୁମିନିୟମ ମଜଦୁର ସଂଘ
