ନାଗୌର: ରାମାୟଣରେ ରାବଣର ସାନଭାଇ କୁମ୍ଭକର୍ଣ୍ଣଙ୍କ ବିଷୟରେ ଉଲ୍ଲେଖ ରହିଛି। ସେ ବର୍ଷରେ ଛଅମାସ ଖାଉଥିବା ବେଳେ ଛଅମାସ ଶୋଇଥାନ୍ତି। ଏବେ ରାଜସ୍ଥାନର ନାଗୌରରେ ଏଭଳି ଜଣେ ବ୍ୟକ୍ତି ଚର୍ଚ୍ଚାରେ ଅଛନ୍ତି, ଯିଏ ବର୍ଷର ୩୬୫ ଦିନରୁ ୩୦୦ ଦିନ ଶୋଉଛନ୍ତି। ସ୍ଥାନୀୟ ଲୋକେ ତାଙ୍କୁ ବାସ୍ତବ ଜୀବନର କୁମ୍ଭକର୍ଣ୍ଣ ବୋଲି କହୁଛନ୍ତି।
ବ୍ୟକ୍ତିଜଣଙ୍କ ହେଲେ ନାଗୌର ଜିଲା ଭଦଓ୍ବା ଗ୍ରାମର ୪୨ ବର୍ଷୀୟ ପୁରଖରାମ। ସେ ୨୩ ବର୍ଷରୁ ଆକ୍ସିସ ହାଇପରସୋମନିୟା ନାମକ ଏକ ବିରଳ ରୋଗରେ ପୀଡ଼ିତ। ସାଧାରଣତଃ ଲୋକଙ୍କୁ ଦିନକୁ ୬ରୁ ୮ ଘଣ୍ଟା ଶୋଇବାକୁ ପରାମର୍ଶ ଦିଆଯାଉଥିବା ବେଳେ ପୁରଖରାମ ୨୫ ଦିନ ଲଗାତାର ଭାବେ ଶୋଇଥାନ୍ତି। ଏହି କାରଣରୁ ସେ ମାସକୁ ମାତ୍ର ୫ ଦିନ ନିଜ ଦୋକାନ ଚଳାଇପାରିଥାନ୍ତି।
ପୁରଖରାମଙ୍କ ପରିବାରସଦସ୍ୟ କୁହନ୍ତି, ସେ ଯେତେବେଳେ ଶୋଇପଡ଼ନ୍ତି, ତାଙ୍କୁ ଉଠାଇବା କଷ୍ଟକର ହୋଇପଡେ। ପ୍ରାରମ୍ଭିକ ଦିନରେ ଏହି ସମସ୍ୟା ଦେଖାଦେବାବେଳେ ପରିବାରଲୋକେ ଡାକ୍ତରଙ୍କ ପରାମର୍ଶ ନେଇଥିଲେ। ସେତେବେଳେ ସେ ଦିନକୁ ୧୫ ଘଣ୍ଟା ଶୋଉଥିଲେ। ଧିରେଧିରେ ଶୋଇବାର ଅବଧି କିଛି ଘଣ୍ଟା ବଢ଼ିଥିଲା। ପରେ ଅନେକ ଦିନକୁ ବୃଦ୍ଧି ପାଇଲା। ତେବେ ତାଙ୍କର ଲକ୍ଷଣ ଏତେ ଖରାପ ହେଲା ସେ ଏବେ ସେ ଥରେ ଶୋଇଲେ ୨୦-୨୫ ଦିନ ଶୋଇଯାଇଥାନ୍ତି।
ପୁରଖରାମଙ୍କ ପରିବାରସଦସ୍ୟ ତାଙ୍କୁ ଶୋଇବା ସମୟରେ ଖାଇବାକୁ ଦିଅନ୍ତି ଏବଂ ଗାଧୋଇ ଦିଅନ୍ତି। ବେଳେବେଳେ ସେ କାମ କରୁଥିବା ସମୟରେ ମଧ୍ୟ ଶୋଇପଡ଼ନ୍ତି। ଚିକିତ୍ସା ଏବଂ ଅତ୍ୟଧିକ ନିଦ୍ରା ସତ୍ତ୍ୱେ ତାଙ୍କ ଶରୀର ଅଧିକାଂଶ ସମୟ କ୍ଳାନ୍ତ ରହିଥାଏ। କାମ କରିବାକୁ ତାଙ୍କୁ ଇଚ୍ଛା ନ ଥାଏ। ହେଲେ ସେ ଶୀଘ୍ର ସୁସ୍ଥ ହୋଇ ପୂର୍ବଭଳି ସାଧାରଣ ଜୀବନଯାପନ କରିବେ ବୋଲି ସ୍ତ୍ରୀ ଲିଚ୍ଛମୀ ଦେବୀ ଏବଂ ମା’ କାବେରୀ ଦେବୀ ଆଶା ରଖିଛନ୍ତି।
