ନୂଆଦିଲ୍ଲୀ,୫।୨: ସଂସଦର ବଜେଟ ଅଧିବେଶନର ସପ୍ତମ ଦିନରେ ମଧ୍ୟ ଗୃହରେ ହୋହଲ୍ଲା ଜାରି ରହିଛି। ଗୁରୁବାର ଲୋକ ସଭା କାର୍ଯ୍ୟ ସକାଳ ୧୧ଟାରେ ଆରମ୍ଭ ହୋଇଥିଲା। କିନ୍ତୁ ଏହାକୁ ତୁରନ୍ତ ମୁଲତବୀ କରାଯାଇଥିଲା। ରାଜ୍ୟ ସଭାରେ ଏକ ବଡ଼ ହଟ୍ଟଗୋଳ ଦେଖିବାକୁ ମିଳିଥିଲା। ରାଜ୍ୟ ସଭାରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖାର୍ଗେ କହିଥିଲେ, ରାହୁଲ ଗାନ୍ଧୀଙ୍କୁ ଲୋକସଭାରେ କହିବାକୁ ଦିଆଯାଉନାହିଁ। ଜେପି ନଡ୍ଡା ଉତ୍ତର ଦେଇଥିଲେ, ଲୋକ ସଭା କଥା ରାଜ୍ୟ ସଭାକୁ ଆଣନ୍ତୁ ନାହିଁ। କଂଗ୍ରେସ ଦଳ ଅହଂକାରରୁ ଦୂରେଇ ରହିବା ଉଚିତ। ଜଣେ ଅଜ୍ଞାନ ପିଲା ପାଖରେ ଦଳକୁ ବନ୍ଧକ ପକାନ୍ତୁନାହିଁ।
କାର୍ଯ୍ୟକାଳ ସମୟରେ, ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ ଖାର୍ଗେଙ୍କୁ କହିଥିଲେ, ଚାରି ଦିନ ହେଲା। ରାହୁଲ ଗାନ୍ଧୀ ନିୟମ ପାଳନ କରୁ ନାହାନ୍ତି। ନିଜେ ବୁଝି ଆପଣ ତାଙ୍କୁ କାହିଁକି ବୁଝାଉନାହାଁନ୍ତି ବୋଲି ଖାର୍ଗେଙ୍କୁ ସେ ପାଲଟା ପ୍ରଶ୍ନ କରିଛନ୍ତି।
ସଂସଦର ବଜେଟ ଅଧିବେଶନ ଏଥର ବହୁତ ହଙ୍ଗାମା ହୋଇଛି ପ୍ରଧାନମନ୍ତ୍ରୀ ମୋଦିଙ୍କ ଭାଷଣ ବୁଧବାର ଲୋକ ସଭାରେ ପ୍ରଦାନ କରାଯିବାର କାର୍ଯ୍ୟକ୍ରମ ଥିଲା। କିନ୍ତୁ ବିରୋଧୀଙ୍କ ହଟ୍ଟଗୋଳ ଯୋଗୁ ଏହାକୁ ସ୍ଥଗିତ ରଖାଯାଇଛି। ପ୍ରଧାନମନ୍ତ୍ରୀ ମୋଦି ଆଜି ଗୁରୁବାର ରାଜ୍ୟ ସଭାରେ ତାଙ୍କର ଅଭିଭାଷଣ ଦେଇପାରନ୍ତି।
ଲୋକସଭାରେ ବର୍ତ୍ତମାନ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଉପରେ ଆଲୋଚନା ଚାଲିଛି। ରାହୁଲ ଗାନ୍ଧୀଙ୍କ ଭାଷଣ ପ୍ରଥମ ଦୁଇ ଦିନରେ ବହୁତ ହଟ୍ଟଗୋଳ ସୃଷ୍ଟି କରିଥିଲା। ଏହା ଫଳରେ ବୁଧବାର ୮ ଜଣ ସାଂସଦଙ୍କୁ ନିଲମ୍ବନ କରାଯାଇଥିଲା।
ରାଜ୍ୟସଭାରେ ଭାଷଣ ଦେଇ ଖାର୍ଗେ କହିଛନ୍ତି, ବିରୋଧୀ ଦଳ ନେତାଙ୍କୁ କହିବାକୁ ଦିଆଯାଉ ନାହିଁ। ଉଭୟ ଗୃହର ବୈଠକ ହେଲେ ହିଁ ସଂସଦ ଗଠିତ ହୁଏ। ଲୋକ ସଭା ଏବଂ ରାଜ୍ୟ ସଭା ଉଭୟ ସଂସଦର ସ୍ତମ୍ଭ। ତଥାପି ନିଜର ଭୁଲକୁ ଲୁଚାଇବା ପାଇଁ, ସରକାର ଗୋଟିଏ ଗୃହକୁ କାର୍ଯ୍ୟ କରିବାକୁ ଦେଉନାହାଁନ୍ତି ଏବଂ ଏହାକୁ ପଙ୍ଗୁ କରିଦେଇଛନ୍ତି। ମୋଦି ସରକାର ଦେଶକୁ ବିଶ୍ୱାସଘାତକତା କରୁଛନ୍ତି ଏବଂ ଏହାକୁ ଅପମାନିତ କରୁଛନ୍ତି। ଏହା ଦେଶ ଏବଂ ଗଣତନ୍ତ୍ର ପାଇଁ ଆଦୌ ଭଲ ନୁହେଁ।
Dharitri – Odisha’s No.1 Odia Daily
