କୋଚି ,୨୨ା୧୧: ପର୍ସନାଲ ଲ’ ଅଧୀନରେ ହେଉଥିବା ମୁସଲମାନ ବିବାହ ପୋକ୍ସୋ (ଯୌନ ଅପରାଧରୁ ଶିଶୁଙ୍କ ସୁରକ୍ଷା) ଆଇନ ବାହାରେ ନୁହେଁ। ବିବାହ ନାଁରେ ନାବାଳିକାଙ୍କ ସହ ଯୌନକ୍ରିୟା ଅପରାଧ ବୋଲି କେରଳ ହାଇକୋର୍ଟ କହିଛନ୍ତି। ଜଣେ ୩୧ ବର୍ଷୀୟ ଯୁବକ ୧୫ ବର୍ଷୀୟା ବାଳିକାଙ୍କୁ ଅପହରଣ କରିନେଇ ତାଙ୍କ ସହ ଯୌନ ସମ୍ପର୍କ ରଖିବାରୁ ସେ ଗର୍ଭବତୀ ହୋଇଥିଲେ। ଉକ୍ତ ନାବାଳିକାଙ୍କୁ ବିବାହ କରିଥିବା ଯୁବକ ଜଣକ ଦାବି କରୁଥିଲେ ହେଁ ତାଙ୍କ ଜାମିନ ଆବେଦନକୁ ହାଇକୋର୍ଟ ଖାରଜ କରିଦେଇଛନ୍ତି। ଜଷ୍ଟିସ୍ ବେଚୁ କୁରିଆନ୍ ଥୋମାସ୍ ଜାମିନ ଖାରଜ କରିବା ଅବସରରେ କହିଛନ୍ତି, ବାଲ୍ୟ ବିବାହ ସମାଜ ପାଇଁ ଅଭିଶାପ। ନାବାଳିକା ବିବାହ କରିଥିଲେ ମଧ୍ୟ ତାଙ୍କ ସହ ଶାରୀରିକ ସମ୍ପର୍କ ରୋକିବା ପୋକ୍ସୋ ଆଇନର ଉଦ୍ଦେଶ୍ୟ ବୋଲି ବିଚାରପତି କହିଛନ୍ତି। ତେଣୁ ମୁସଲମାନ ବିବାହକୁ ପୋକ୍ସୋ ଆଇନରୁ ବାଦ୍ ଦିଆଯାଇପାରିବ ନାହିଁ। ବିବାହର ଗୋଟିଏ ପକ୍ଷ ନାବାଳକ ବା ନାବାଳିକା ହୋଇଥିଲେ, ବିବାହ ବୈଧ ହୋଇଥାଉ ବା ନ ଥାଉ, ଅନ୍ୟ ପକ୍ଷଙ୍କ ବିରୋଧରେ ପୋକ୍ସୋ ଆଇନ ଲାଗୁ ହେବ ବୋଲି ଜଷ୍ଟିସ୍ ଥୋମାସ ତାଙ୍କ ରାୟରେ କହିଛନ୍ତି। ଜାମିନ ଆବେଦନ କରିଥିବା ଅଭିଯୁକ୍ତ ପଶ୍ଚିମବଙ୍ଗର ଖଲେଦୁର ରହମାନ ନାବାଳିକାଙ୍କୁ ୨୦୨୧ ମାର୍ଚ୍ଚ ୧୪ରେ ମହମ୍ମଡାନ୍ ଆଇନରେ ବିବାହ କରିଥିବାରୁ ସେ ତାଙ୍କ ସ୍ତ୍ରୀ ବୋଲି କୋର୍ଟରେ ଦାବି କରିଥିଲେ। ମହମ୍ମଡାନ ଆଇନରେ ୧୮ ବର୍ଷରୁ କମ୍ ବୟସର ଝିଅ ବିବାହ ପାଇଁ ଅନୁମତି ପାଇଥାନ୍ତି। ସେଥିପାଇଁ ତାଙ୍କ ବିରୋଧରେ ପୋକ୍ସୋ ଆଇନରେ ମକଦ୍ଦମା ଚଳାଯାଇପାରିବ ନାହିଁ ବୋଲି ରହମାନ ଯୁକ୍ତି ବାଢ଼ିଥିଲେ। ସୂଚନାଯୋଗ୍ୟ, ନାବାଳିକା ଜଣକ ଗର୍ଭବତୀ ଥିବାରୁ ଇଞ୍ଜେକ୍ଶନ ନେବାକୁ କାଭିୟୁରର ଏକ ଫାମିଲି ହେଲ୍ଥ ସେଣ୍ଟରକୁ ଯାଇଥିବାବେଳେ ଆଧାର କାର୍ଡରୁ ତାଙ୍କ ବୟସ ୧୬ ବର୍ଷ ଜାଣି ହସ୍ପିଟାଲ କର୍ତ୍ତୃପକ୍ଷ ପୋଲିସକୁ ଖବର ଦେଇଥିଲେ। ପୋଲିସ ଅଭିଯୁକ୍ତଙ୍କ ନାମରେ ମାମଲା ଦାଏର କରିଥିଲା।
