ନୂଆଦିଲ୍ଲୀ: ମଣିଷଙ୍କ ଭଳି ଛତୁ ମଧ୍ୟ ପରସ୍ପର ସହ କଥା ହୋଇପାରନ୍ତି। ୟୁନିଭରର୍ସିଟି ଓ୍ବେଷ୍ଟ ଅଫ୍ ଇଂଲଣ୍ଡର ପ୍ରଫେସର ଆଣ୍ଡ୍ର୍ୟୁ ଆଡାମାଟଜକିଙ୍କ ଦ୍ୱାରା କରାଯାଇଥିବା ଗବେଷଣାରୁ ଏହା ଜାଣିବାକୁ ମିଳିଛି। କଥା ମାଧ୍ୟମରେ ଛତୁମାନେ ମଧ୍ୟ ଭାବର ଆଦାନ ପ୍ରଦାନ କରନ୍ତି। ବିଶେଷକରି ଇନୋକି, ସ୍ପ୍ଲିଟ୍ ଗିଲ୍, ଗୋଷ୍ଟ ଏବଂ କାଟରପିଲାର ଛତୁରେ ଇଲେକ୍ଟ୍ରିକ୍ ଇମ୍ପଲ୍ସେସ୍ (ବିଦ୍ୟୁତ୍ ସଂବେଗ) ସୃଷ୍ଟି ହୁଏ। ଏହା ମାଧ୍ୟମରେ ଛତୁମାନେ ପରସ୍ପର ସହ କଥା ହୋଇଥାନ୍ତି। କାଠ ପାଚନ କରୁଥିବା ଛତୁ କାଠ ସଂସ୍ପର୍ଶରେ ଆସିଲେ ଛତୁରେ ବିଦ୍ୟୁତ ସଂବେଗର ବେଗ ଦ୍ରୁତ ବେଗରେ ବୃଦ୍ଧି ପାଉଥିବା ଗବେଷକ ଦାବି କରିଛନ୍ତି। ଛତୁରେ ଇଲେକ୍ଟ୍ରିକାଲ୍ ସ୍ପାଇକ୍ସ୍ ମଧ୍ୟ ଉତ୍ପନ୍ନ ହେଉଥିବା ଗବେଷଣାରୁ ଜଣାପଡ଼ିଛି। ମଣିଷ ବ୍ୟବହାର କରୁଥିବା ଶବ୍ଦ ଓ ଛତୁର ଶବ୍ଦ ମଧ୍ୟରେ କୌଣସି ସାମଞ୍ଜସ୍ୟ ନ ଥିଲେ ମଧ୍ୟ ଛତୁ ବ୍ୟବହାର କରୁଥିବା ପାଖାପାଖି ୫୦ଟି ଶବ୍ଦ ମାନବ ଶବ୍ଦାବଳୀ ସହ ମେଳ ଖାଉଛି। ସାଧାରଣ ଭାବେ ଇଂଲିଶ ଶବ୍ଦରେ ୪.୮ ଲେଟର ରହିଥାଏ। କିନ୍ତୁ ଛତୁ ବ୍ୟବହାର କରୁଥିବା ଶବ୍ଦରେ ପାଖାପାଖି ୫.୯୭ ଲେଟର ରହିଛି। ଏହା ଜରିଆରେ ଛତୁର ମନ ଓ ଚେତନାଶକ୍ତି ଅଛି ବୋଲି ଜଣାପଡ଼ୁଥିବା ଆଡାମାଟଜକି କହିଛନ୍ତି। କଥା ହେବା ପାଇଁ ୫୦ ଶବ୍ଦ ମଧ୍ୟରୁ ୧୫-୨୦ଟି ଶବ୍ଦ ହିଁ ଛତୁ ବହୁଳମାତ୍ରାରେ ବ୍ୟବହାର କରନ୍ତି। ଛତୁର ଚେର (ଜୁଲୋଜିକାଲ ଟର୍ମ ମାଇସେଲିୟମ୍) ଇଲେକ୍ଟ୍ରିକାଲି ଚାର୍ଜଡ୍ ହେବା ଫଳରେ ମାଇସେଲିୟମ୍ ଟିପ୍ ଜରିଆରେ ଅନ୍ୟ ମାଇସେଲିୟମ୍କୁ ଇଲେକ୍ଟ୍ରୋଡ୍ ସଂଚାରିତ ହୋଇଥାଏ। ଛତୁ ପରସ୍ପର ସହ କଥା ହେବା ସାଙ୍ଗକୁ ୫୦ ଶବ୍ଦ ବ୍ୟବହାର କରିବା କଥା ମନରେ କୌତୂହଳ ସୃଷ୍ଟି କରୁଥିବାବେଳେ ଏନେଇ ଅଧିକ ଗବେଷଣାର ଆବଶ୍ୟକ ବୋଲି ୟୁନିଭର୍ସିଟି ଅଫ୍ ଏକ୍ସଷ୍ଟର ଏବଂ ବ୍ରିଟିଶ୍ ମାଇକୋଲୋଜିକାଲ ସୋସାଇଟିଜ୍ ଫଙ୍ଗାଲ ବାୟୋଲୋଜି ରିସର୍ଚ୍ଚ କମିଟିର ସଦସ୍ୟ ଡାନ୍ ବେବବର କହିଛନ୍ତି।
