ଜମନକିରା,୮।୫(ଡି.ଏନ୍.ଏ.): ସମ୍ବଲପୁର ଜିଲା ଜମନକିରା ଥାନା ବଡ଼ମାଳ ପଞ୍ଚାୟତ ନୂଆଁଡିହି ଗ୍ରାମରେ ଏକ ଅଘଟଣ ଘଟିଛି। ସ୍ବାମୀ ଏକ ଇଟାରେ ସ୍ତ୍ରୀଙ୍କ ମୁଣ୍ଡକୁ ଛେଚି ହତ୍ୟା କରିଛନ୍ତି। ଏହି ଘଟଣାରେ ଜମନକିରା ପୋଲିସ ଅଭିଯୁକ୍ତ ସ୍ବାମୀକୁ ଗିରଫ କରି ସୋମବାର କୋର୍ଟ ଚାଲାଣ କରିଛି। ତେବେ ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଥିବା ପୋଲିସ ପକ୍ଷରୁ କୁହାଯାଇଛି।
ପୋଲିସର ସୂଚନା ମୁତାବକ, ନୂଆଁଡ଼ିହି ଗ୍ରାମରେ ଅଭିଯୁକ୍ତ ସନାତନ ଧୁରୁଆ(୪୦), ସ୍ତ୍ରୀ ଏବଂ ପୁଅ, ଝିଅଙ୍କ ସହ ରହୁଥିଲେ। ହେଲେ ଝିଅ(୧୮ ବର୍ଷ) କୁଚିଣ୍ଡାରେ ଜଣଙ୍କ ଘରେ କାମ କରି ସେଠାରେ ରହୁଥିଲେ। ଘଟଣା ଦିନ ପୁଅ ଗାଁର ଅନ୍ୟ ଜଣଙ୍କ ଘରକୁ ଶୋଇବାକୁ ଯାଇଥିଲେ। ଏଭଳସ୍ଥିତରେ ସ୍ବାମୀ ସନାତନ ଏବଂ ସ୍ତ୍ରୀ ପୁଷ୍ପା(୩୫) ଶନିବାର ରାତିରେ ଖାଇ ଶୋଇବା ବେଳେ ସେମାନଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ସ୍ବାମୀ ସନାତନ ଏକ ଇଟାରେ ପୁଷ୍ପାଙ୍କ ମୁଣ୍ଡକୁ ଛେଚି ଦେଇଥିଲା। ଫଳରେ ଘଟଣା ସ୍ଥଳରେ ପୁଷ୍ପାଙ୍କ ମୃତ୍ୟୁ ଘଟିଥିଲା। ସକାଳେ ପୁଅ ଘରକୁ ଆସି ମା’ଙ୍କ ମୃତଦେହ ପଡ଼ିଥିବା ଦେଖି ଗାଁ ଲୋକଙ୍କ ସହାୟତାରେ ପୋଲିସକୁ ଖବର ଦେଇଥିଲେ। ଏଥିସହ ଭଉଣୀକୁ ମଧ୍ୟ ଘଟଣା ସମ୍ପର୍କରେ ଅବଗତ କରିଥିଲେ। ପୋଲିସ ପହଞ୍ଚି ମୃତଦେହ ଜବତ କରି କୁଚିଣ୍ଡା ଡାକ୍ତରଖାନାରେ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଏନେଇ ଜମନକିରା ଥାନା ପୋଲିସ ଏକ ମାମଲା ରୁଜୁ କରି ଘଟଣାର ଅଧିକ ତଦନ୍ତ ଚଳାଇଛି।
