ଦିଗପହଣ୍ଡି,୧୯ା୧୨(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଗଡ଼ଗୋବିନ୍ଦପୁର ଗ୍ରାମ ତଳସାହିର କେଦାର ବେହେରାଙ୍କ ସ୍ତ୍ରୀ ସୁଜାତାଙ୍କୁ ଗତ ସୋମବାର ଅପରାହ୍ନରେ ଘରେ ପଶି ହତ୍ୟା କରାଯାଇଥିଲା। ହତ୍ୟା ଘଟଣାରେ ସମ୍ପୃକ୍ତ ଥିବା ଜରଡ଼ା ଥାନା ତଣ୍ଡିପୁର ଗ୍ରାମର ହେମନ୍ତ ବେହେରାଙ୍କୁ ଶନିବାର କେ. ନୂଆଗାଁ ଥାନା ପୋଲିସ ଗିରଫ କରି କୋର୍ଟ ଚାଲାଣ କରିଛି।
କେସ୍ ନଂ.୨୮୦/୨୦ ଅନୁଯାୟୀ, ଜାମିନ ଆବେଦନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ୍ ଜେଲ ହାଜତକୁ ପଠାଇ ଦିଆଯାଇଛି। ଘଟଣା ଦିନ ଅପରାହ୍ନରେ ସୁଜାତା ଘରେ ଏକୁଟିଆ ଥିବା ବେଳେ ତାଙ୍କୁ ନିସ୍ତୁକ ମାଡ଼ ମାରି ହତ୍ୟା କରିବା ପରେ ତାଙ୍କ ବେକରୁ ସୁନାଗହଣା ଲୁଟି ନେଇଥିଲେ ଦୁର୍ବୃତ୍ତ। ସୁଜାତାଙ୍କ ଦେଡ଼ଶୁର ପବିତ୍ର ବେହେରା ଏନେଇ କେ. ନୂଆଗାଁ ଥାନାରେ ଏତଲା ଦେଇଥିଲେ। ଥାନା ଆଇଆଇସି ମାଧବାନନ୍ଦ ନାୟକ ଘଟଣାର ତଦନ୍ତ ଚଳାଇଥିଲେ। ଏହି ମାମଲାରେ ୭ ଜଣଙ୍କୁ ଦିଗପହଣ୍ଡି ଥାନାରେ ଅଟକ ରଖାଯାଇ ମାରାଥନ ଜେରା କରାଯିବା ପରେ ପୋଲିସକୁ ସଫଳତା ମିଳିଛି। ଅଭିଯୁକ୍ତ ହେମନ୍ତଙ୍କ ସୂଚନାକୁ ଭିତ୍ତିକରି ଶନିବାର ସକାଳେ ଗଡ଼ଗୋବିନ୍ଦପୁର ଗାଁ ପୋଖରୀ ନିକଟ ଏକ ପଥର ଖୋଲରୁ ପ୍ରାୟ ୫୦ ଗ୍ରାମ ଓଜନର ସୁନା ଗହଣା ସମେତ ଏକ କଲଭର୍ଟ ତଳୁ ଅଭିଯୁକ୍ତଙ୍କ ରକ୍ତ ଲାଗିଥିବା ଶାର୍ଟକୁ ପୋଲିସ ଜବତ କରିଛି।
