କେନ୍ଦୁଝର,୨୬ା୪(ସ୍ବ.ପ୍ର.): କେନ୍ଦୁଝର ସଦର ଥାନା ଅନ୍ତର୍ଗତ ବାଉରୀପଦା ପଞ୍ଚାୟତ ମନୋହରପୁର ଗ୍ରାମରେ ସୋମବାର ବିଳମ୍ବିତ ରାତିରେ ଏକ ହତ୍ୟାକାଣ୍ଡ ଘଟିଛି। ଜଣେ ଯୁବକଙ୍କୁ ଚାରିଜଣ ଯୁବକ ଲୁହାଛଡ଼ରେ ପିଟିପିଟି ହତ୍ୟା କରିଛନ୍ତି। ମୃତକ ହେଲେ ମନୋହରପୁର ଗ୍ରାମର ଭାଗ୍ୟଧର ଘଣା(୩୯)।
ସୂଚନାଯୋଗ୍ୟ, ସୋମବାର ୪ଜଣ ଯୁବକ କାରରେ ଆସି ଭାଗ୍ୟଧରଙ୍କ ସହିତ ଫୋନରେ କଥା ହୋଇଥିଲେ। ରାତିରେ ଭାଗ୍ୟଧରଙ୍କୁ ମନହରପୁର ପୋଖରୀ ପାଶର୍ବକୁ ଡାକିଥିଲେ। ଭାଗ୍ୟଧର ସାହିର ତରଣୀସେନ ଦେହୁରୀଙ୍କ ଧରି ବାଇକରେ ସେଠାକୁ ଯାଇଥିଲେ। ସେଠାରେ ଉପସ୍ଥିତ ଯୁବକମାନେ ମଦ ପିଇଥିଲେ। ପରେ ଅନ୍ୟ ୨ ଯୁବକ ଗାଡିରୁ ଲୁହାଛଡ଼ ଆଣିଥିଲେ। ଏହା ଜାଣିପାରି ତରଣୀ ପଳାଇଚାଲ ମାରିପକେଇବେ ବୋଲି କହିବା ବେଳେ ସେମାନେ ଭାଗ୍ୟଧରଙ୍କୁ କାବୁ କରିନେଇଥିଲେ। ତରଣୀ ଖସିଆସି ବିଶ୍ବନାଥପୁର ଗ୍ରାମରେ ପହଞ୍ଚି ଲୋକଙ୍କୁ ଏହି ଘଟଣା ଜଣାଇଥିଲା। ସଦର ଥାନାକୁ ଖବର ଦେବାରୁ ଘଟଣାସ୍ଥଳରେ ସଦର ଥାନା ଏସ୍ଆଇ ସୂର୍ଯ୍ୟକାନ୍ତ ପାତ୍ର ଓ ଗ୍ରାମବାସୀ ପହଞ୍ଚି ଥିଲେ। ସେତେବେଳକୁ ଯୁବକମାନେ ଭାଗ୍ୟଧରଙ୍କ ମୁଣ୍ତପଛପଟକୁ ଲୁହାଛଡରେ ପିଟିପିଟି ହତ୍ୟାକରି ଫେରାର ହୋଇଯାଇଥିଲେ। ଠିକା କାମକୁ ନେଇ ଏହି ହତ୍ୟାକାଣ୍ଡ ହୋଇଥିବା ଜଣାପଡିଛି। ପୋଲିସ ଏକ ହତ୍ୟା ମାମଲା ରୁଜୁ କରି ୨ଜଣ ଅଭିଯୁକ୍ତଙ୍କୁ ଧରିଥିବା ବେଳେ ଅନ୍ୟ ଦୁଇଜଣଙ୍କୁ ଖୋଜୁଛି।
