ବ୍ରହ୍ମପୁର ଅଫିସ,୭।୩: ରାସ୍ତାରେ କିମ୍ବା ସର୍ବସାଧାରଣ ସ୍ଥାନରେ ମଦ ପିଇବା ଉପରେ ବ୍ରହ୍ମପୁର ପୋଲିସ ପକ୍ଷରୁ କଟକଣା କରାଯାଇଛି। ଏହି କଟକଣା ସୋମବାରଠାରୁ ଲାଗୁ କରାଯାଇଛି। ପୌର ନିର୍ବାଚନକୁ ଶୃଙ୍ଖିଳିତ କରିବା ପାଇଁ ପୋଲିସ ପକ୍ଷରୁ ଏଭଳି ପଦକ୍ଷେପ ନିଆଯାଇଥିବା ବ୍ରହ୍ମପୁର ଏସ୍ଡ଼ିପିଓ ବିଷ୍ଣୁପ୍ରସାଦ ପତି ସୂଚନା ଦେଇଛନ୍ତି।
ଏପରି କି ରାସ୍ତା ଉପରେ ମଦ ପିଉଥିବା ମଦୁଆଙ୍କୁ ପୋଲିସ ସାବଡ଼ କରିବ। ଆଇନ ଉଲ୍ଲଂଘନ କଲେ ୫ ଶହ ଟଙ୍କା ଜରିମାନା ଆଦାୟ କରାଯିବ। ଏହାସହିତ ବେଆଇନ ମଦ ଆସର ପାଇଁ ନିର୍ମାଣ ହୋଇଥିବା ଖଟିସ୍ଥଳକୁ ଭଙ୍ଗା ଯିବ ବୋଲି ମଧ୍ୟ ଏସ୍ଡ଼ିପିଓ କହିଛନ୍ତି। ସହରର ବିଭିନ୍ନ ଥାନା ଅଞ୍ଚଳରେ ପୋଲିସ ପକ୍ଷରୁ ସନ୍ଧ୍ୟାରେ ପାଟ୍ରୋଲିଂକୁ କଡାକଡି କରାଯିବ। ଲୋକଙ୍କୁ ଅଯଥା ଖଟି କରି ଅସାମାଜିକ କାର୍ଯ୍ୟକଳାପ ନ କରିବାକୁ ପୋଲିସ ପକ୍ଷରୁ ପରାମର୍ଶ ଦିଆଯାଇଛି।
ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ବିଭିନ୍ନ ସ୍ଥାନରେ ହିଂସା ହୋଇଥିଲା। ଏହାକୁ ଦୃଷ୍ଟିରେ ରଖି ପୋଲିସ ପକ୍ଷରୁ ଏହି ପଦକ୍ଷେପ ନିଆଯାଇଛି। ଲାଇସେନ୍ସ ପାଇ ବନ୍ଧୁକ ରଖୁଥିବା ଲୋକଙ୍କୁ ବନ୍ଧୁକ ଥାନାରେ ଜମା କରିବା ପାଇଁ ଚିଠି କରାଯାଇଛି। ଏପରି କି ପୌର ନିର୍ବାଚନରେ ଯେପରି ରାଜନୈତିକ ଗଣ୍ଡଗୋଳ ଓ ଗୋଷ୍ଠୀ ସଂଘର୍ଷକୁ ଏଡେଇବା ପାଇଁ ପୋଲିସ ୧୦୭ ଓ ୧୧୦ରେ ନୋଟିସ ଜାରି କରିଛି। ନିର୍ବାଚନ ସମୟରେ କୌଣସି ହିଂସା ଅପରାଧିକ କାର୍ଯ୍ୟକଳାପକୁ ପ୍ରଶୟ ଦିଆଯିବ ନାହିଁ ବୋଲି ପୋଲିସ ପକ୍ଷରୁ କଡ଼ା ଚେତାବନୀ ଦିଆଯାଇଛି।
