ନୂଆଦିଲ୍ଲୀ,୧୯।୧୨: ଆଇପିଏଲ୍ ୨୦୨୪ ଲାଗି ଆୟୋଜିତ ମିନି ଅକ୍ସନର ପ୍ରାୟ ଏକ ସପ୍ତାହ ପୂର୍ବରୁ ମୁମ୍ବାଇ ଇଣ୍ଡିଆନ୍ସ ହାର୍ଦ୍ଦିକ ପାଣ୍ଡ୍ୟାଙ୍କୁ ଦଳର ନୂଆ ଅଧିନାୟକ ଭାବେ ନିଯୁକ୍ତ କରିଥିଲା। ଫଳରେ ଦୀର୍ଘ ଏକ ଦଶନ୍ଧି ଧରି ଦଳର ନେତୃତ୍ୱ ନେଇଆସିଥିବା ରୋହିତ ଶର୍ମାଙ୍କୁ ନେଇ ନାନାଦି ଚର୍ଚ୍ଚା ଆରମ୍ଭ ହୋଇଥିଲା। ରୋହିତ ମୁମ୍ବାଇ ଛାଡ଼ିବେ ବୋଲି ଏବଂ ତାଙ୍କୁ ଅନ୍ୟ ଫ୍ରାଞ୍ଚାଇଜକୁ ଟ୍ରେଡ କରିବାକୁ ଯୋଜନା କରାଯାଉଥିବା କୁହାଯାଉଥିଲା। ଏବେ ଏନେଇ ମୁମ୍ବାଇ ପକ୍ଷରୁ ଆଧିକାରୀକ ପ୍ରତିକ୍ରିୟା ସାମ୍ନାକୁ ଆସିଛି।
ରିପୋର୍ଟ ମୁତାବକ, ମୁମ୍ବାଇର ଅଧିକାରୀମାନେ ରୋହିତ ଅନ୍ୟ ଦଳକୁ ଯିବା ଖବର ମିଥ୍ୟା ବୋଲି କହିଛନ୍ତି। କୌଣସି ଖେଳାଳି ମୁମ୍ବାଇ ଛାଡ଼ିବେ ନାହିଁ କିମ୍ବା କାହାକୁ ବି ଟ୍ରେଡ୍ କରାଯିବ ନାହିଁ। ଏପରିକି ହାର୍ଦ୍ଦିକଙ୍କୁ ଅଧିନାୟକ କରାଯିବା ପୂର୍ବରୁ ଦଳର ପ୍ରତିଟି ଖେଳାଳିଙ୍କ ସହ ଆଲୋଚନା କରାଯାଇଥିଲା। ଏହି ନିର୍ଣ୍ଣୟକୁ ନେଇ ରୋହିତ ମଧ୍ୟ ସହମତି ପ୍ରକାଶ କରିଥିଲେ।
କହିରଖୁଛୁ, ଦିଲ୍ଲୀ କ୍ୟାପିଟାଲ୍ସ ଏବଂ ଚେନ୍ନାଇ ସୁପର କିଙ୍ଗ୍ସ ରୋହିତ ଏବଂ ମୁମ୍ବାଇର ଅନ୍ୟ କିଛି ଖେଳାଳିକୁ ଟ୍ରେଡ୍ କରିପାରେ ବୋଲି ଶୁଣିବାକୁ ମିଳୁଥିଲା। ଏବେ ଏହାକୁ ନେଇ ମୁମ୍ବାଇ ପକ୍ଷରୁ ସ୍ପଷ୍ଟୀକରଣ ଦିଆଯାଇଛି।
