କେନ୍ଦୁଝର,୧୬ା୩(ସ୍ବ.ପ୍ର.): କେନ୍ଦୁଝର ଜିଲାପାଳଙ୍କ କାର୍ଯ୍ୟାଳୟ ଆଗରେ ମୁଖ୍ୟ ଡ୍ରେନ ଦୀର୍ଘ ବର୍ଷ ହେଲା ଭାଙ୍ଗି ମୁକୁଳା ଅବସ୍ଥାରେ ରହିଛି। ଅସୁରକ୍ଷିତ ଅବସ୍ଥାରେ ପଡ଼ି ରହିଥିଲେ ହେଁ ଏଥିପ୍ରତି କାହାରି ନଜର ପଡୁନାହିଁ। ବିପଦପୂଣ୍ଣର୍ର୍ ଅବସ୍ଥାରେ ଯାତାୟାତ କରୁଥିବା ବେଳେ ଅନେକ ସମୟରେ ଡ୍ରେନ୍ରେ ପଡ଼ି ବହୁ ଲୋକ ଖଣ୍ଡିଆ ଖାବରା ହେଉଛନ୍ତି। ଅନେକ ସମୟରେ ଟ୍ରାଫିକ ସତ୍ତ୍ୱେ ଡ୍ରେନରୁ ତଳକୁ ଓହ୍ଲାଇ ରାସ୍ତାରେ ଚଳାଚଳ କରୁଥିବାରୁ ଦୁର୍ଘଟଣାର ଆଶଙ୍କା ରହୁଛି ବୋଲି ବରିଷ୍ଠ ଖବରଦାତା ପ୍ରଦୀପ ମହାନ୍ତି କହିଛନ୍ତି।
ସୂଚନାଯୋଗ୍ୟ, ଜିଲାପାଳ ଓ ଅନ୍ୟାନ୍ୟ ଜିଲାସ୍ତରୀୟ ଅଫିସକୁ ଦୈନିକ ବହୁ ସଂଖ୍ୟାରେ ଲୋକେ ଆସିଥାନ୍ତି। ବିଶେଷ କରି ଅଭିଯୋଗ ଶୁଣାଣି ଦିନ ଶହରୁ ଊର୍ଦ୍ଧ୍ୱ ଲୋକ ଗାଁ ଗଣ୍ଡାରୁ ଜିଲାପାଳଙ୍କ କାର୍ଯ୍ୟାଳୟକୁ ଆସିଥାନ୍ତି। ଜିଲାପାଳଙ୍କ ଅଫିସ ଆଗରେ ଟ୍ରାଫିକ ଛକ ଥିବାରୁ ସାଧାରଣତଃ ଏହି ଫୁଟ୍ପାଥରେ ଅଫିସ୍କୁ ଯିବା ଆସିବା କରିଥାନ୍ତି। ଟ୍ରାଫିକ ସିଗନାଲ ଅପେକ୍ଷାରେ ଗାଡ଼ି ଜମା ହୋଇ ରହୁଥିବା ସମୟରେ ଲୋକମାନେ ଡ୍ରେନ୍ ଉପରେ ଯିବାଆସିବା କରିଥାନ୍ତି। ଫୁଟ୍ପାଥ ଦେଇ କଟକ ବସ୍ଷ୍ଟାଣ୍ଡ ତଥା ଆଗକୁ ଅନ୍ୟାନ୍ୟ ଅଫିସକୁ ଯାଇଥାନ୍ତି। ସେହିପରି ଛକରେ ବିଭିନ୍ନ ସ୍ଥାନରେ ଆନ୍ଦୋଳନ, ବିକ୍ଷୋଭ, ରାଲି ଆଦି ଅନୁଷ୍ଠିତ ହେଲେ ଭିଡ଼ ଜମିଥାଏ। ବିଶେଷ କରି ମହିଳା ଓ ଶିଶୁମାନେ ଯାତାୟାତରେ ଅସୁବିଧାର ସମ୍ମୁଖୀନ ହୋଇଥାନ୍ତି। ଆନ୍ଦୋଳନ ସମୟରେ ପୋଲିସ ମଧ୍ୟ ବହୁ ସଂଖ୍ୟାରେ ଏହି ସ୍ଥାନରେ ଅସୁବିଧା ଭୋଗ କରେ। ଏଣୁ ଏହାର ତୁରନ୍ତ ମରାମତି କରିବାକୁ ଦାବି ହେଉଛି ା ନଚେତ୍ କୌଣସି ବଡ଼ଧରଣର ଅଘଟଣ ହେଲେ ପ୍ରଶାସନ ଦାୟୀ ରହିବେ ବୋଲି ସାମାଜିକ କର୍ମୀ ଦିଲୀପ ସାହୁ କହିଛନ୍ତି।
