ମୁମ୍ବାଇ,୭ ।୧୨: ଦେଶର ସବୁଠାରୁ ବଡ ଉଦ୍ଦ୍ୟୋଗପତି ମୁକେଶ ଅମ୍ବାନୀ ତାଙ୍କ ନାତି ଆକାଶ ଅମ୍ବାନୀ ଓ ଶ୍ଳୋକା ଅମ୍ବାନୀଙ୍କ ପୁଅ ପୃଥ୍ୱୀ ଅମ୍ବାନୀଙ୍କ ପ୍ରଥମ ଜନ୍ମଦିନ ଖୁବ୍ ଧୁମଧାମରେ ପାଳନ କରିବାକୁ ଯାଉଛନ୍ତି । ଏହି ସମୟରେ ପରିବାର ପକ୍ଷରୁ କୋଭିଡ ନିୟମକୁ ବି କଡା କଡି ଭାବେ ପାଳନ କରାଯିବ ବୋଲି ଜଣାପଡିଛି । ପୃଥ୍ୱିଙ୍କ ଜନ୍ମଦିନରେ ଆସିବାକୁ ଥିବା ସମସ୍ତ ଅତିିଥି ସମ୍ପୂର୍ଣ୍ଣ ଭାବେ ଭ୍ୟାକ୍ସିନେଟ ହୋଇଥିବେ । ଜନ୍ମଦିନ ପୂର୍ବରୁ ପରିବାର ପକ୍ଷରୁ ହଜାରେ ଗାଁକୁ ଭୋଜନ ଦିଆଯିବା ସହ ଅନାଥାଶ୍ରମକ ଉପହାର ପଠାଇବାର ବ୍ୟବସ୍ଥା କରାଯାଉଛି ।
୧୦୦ରୁ ଅଧିକ ପୂଜାରୀ ଦେବେ ଆଶୀର୍ବାଦ
ପୃଥ୍ୱିଙ୍କ ଜନ୍ମଦିନରେ ଅମ୍ବାନୀ ପରିବାର ପକ୍ଷରୁ ୧୦୦ରୁ ଅଧିକ ପୂଜାରୀଙ୍କୁ ନିମନ୍ତ୍ରଣ କରାଯାଇଛି । ଏମାନେ ସମସ୍ତେ ଜାମନଗର ଫାର୍ମ ହାଉସରେ ପହଞ୍ଚିବେ । ସେମାନେ ପୃଥ୍ୱିଙ୍କ ପାଇଁ ପୂଜାର୍ଚ୍ଚନା କରିବା ସହ ତାଙ୍କର ସୁସ୍ଥ ଓ ଦୀର୍ଘ ଜୀବନ କାମନା କରି ଆଶୀର୍ବାଦ ପ୍ରଦାନ କରିବେ ।
ପାଖାପାଖି ୧୦୦୦ଗାଁର ୫୦ ହଜାର ଲୋକଙ୍କ ପାଇଁ ପୃଥ୍ୱିଙ୍କ ଜନ୍ମଦିନରେ ଅମ୍ବାନୀ ପରିବାର ପକ୍ଷରୁ ଭୋଜନର ବ୍ୟବସ୍ଥା କରାଯାଇଛି । ଏହାର ଉଦ୍ଦେଶ୍ୟ ହେଉଛି ସମସ୍ତେ ପୃଥ୍ୱିଙ୍କୁ ଆଶୀର୍ବାଦ ଦେବେ ।
ଥାଇଲାଣ୍ଡ ଓ ଇଟାଲୀରୁ ଆସିବେ ରୋଷେୟା
ପୃଥ୍ୱିଙ୍କ ପ୍ରଥମ ଜନ୍ମଦିନକୁ ସ୍ପେଶାଲ କରିବାକୁ ଅମ୍ବାନୀ ପରିବାର କିଛି କମ୍ ରଖି ନାହାନ୍ତି । ଗୋଟିଏ ପଟେ କରୋନା ମହାମାରୀର ଓମିକ୍ରନ୍ ଭାରିଏଣ୍ଟ ବ୍ୟାପି ଚାଲିଥିବା ବେଳେ ଏହି ଜନ୍ମଦିନ ପାର୍ଟି ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଥିବା କୁହାଯାଇଛି । ରୋଷେୟା ବିଦେଶରୁ ଆସୁଥିବାରୁ ସେମାନଙ୍କୁ କିଛିଦିନ ପୂର୍ବରୁ ମୁମ୍ବାଇ ଆସି ରହିବାକୁ ପଡିବ । ଏହି ସମୟରେ ସେମାନଙ୍କର କରୋନା ଟେଷ୍ଟ କରାଯାଇ ସେମାନଙ୍କୁ କ୍ୱାରାଣ୍ଟାଇନରେ ରଖାଯିବ । ଯଦି ସବୁକିଛି ଠିକ୍ ରହିଲା ତେବେ ସେମାନଙ୍କୁ ଖାଦ୍ୟ ପ୍ରସ୍ତୁତ କରିବାକୁ ଅନୁମତି ମିଳିବ ।
ଏହାସହ ପୃଥ୍ୱିଙ୍କ ଜନ୍ମଦିନ ପାର୍ଟିରେ ଯୋଗଦେବାକୁ ଥିବା ଅତିଥିଙ୍କର ମଙ୍ଗଳବାରଠାରୁ ଲଗାତାର ଭାବେ କରୋନା ଯାଞ୍ଚ କରାଯାଇ ଏହାର ରିପୋର୍ଟ ଅମ୍ବାନୀ ପରିବାରର ଡାକ୍ତରଙ୍କୁ ଦିଆଯିବ । ସମସ୍ତଙ୍କ ରିପୋର୍ଟ ନେଗେଟିଭ ଆସିବା ପରେ ଅମ୍ବାନୀଙ୍କ ପ୍ରାଇଭେଟ ଜେଟରେ ସେମାନଙ୍କୁ ଜାମନଗର ଫାର୍ମ ହାଉସକୁ ନିଆଯିବ । ଆଉ ସମସ୍ତ ଅତିଥିଙ୍କୁ କ୍ୱାରାଣ୍ଟାଇନ କରି ରଖାଯିବ । କରୋନାକୁ ଦୃଷ୍ଟିରେ ରଖି ପରିବାରର ସୁରକ୍ଷାକୁ ଦୃଷ୍ଟି ଦେଇ ଅମ୍ବାନୀ ପରିବାର ପକ୍ଷରୁ ଏଭଳି ବ୍ୟବସ୍ଥା କରାଯାଇଛି ।
ବଣ୍ଟାଯିବ କୋଟି କୋଟି ଟଙ୍କାର ଉପହାର
ମୁକେଶ ଅମ୍ବାନୀଙ୍କ ନାତି ପୃଥ୍ୱି ଅମ୍ବାନୀଙ୍କ ଜନ୍ମଦିନରେ ଦେଶର ପ୍ରାୟ ୧୫୦ ଅନାଥାଶ୍ରମରେ ରହୁଥିବା ହଜାର ହଜାର ପିଲାଙ୍କୁ କୋଟି କୋଟି ଟଙ୍କାର ଉପହାର ଦିଆଯିବ ବୋଲି ଜଣାପଡିଛି । ତେବେ ପୃଥ୍ୱିଙ୍କ ପାଇଁ ଯେଉଁ ଖେଳନା ଆସିଛି ତାହା ତାଙ୍କ ମାଆ ଶ୍ଳୋକା ଅମ୍ବାନୀ ନେଦରଲ୍ୟାଣ୍ଡସରୁ ମଗାଇଥିବା ଜଣାପଡିଛି ।
