ଜି.ଉଦୟଗିରି,୨୬ା୮(ଶିଶିର ପଟ୍ଟନାୟକ/ଚିନ୍ମୟ କୁମାର ସେଠୀ): କନ୍ଧମାଳ ଜିଲା ଜି.ଉଦୟଗିରି ଅଞ୍ଚଳର ମୁସଲମାନ ସମ୍ପ୍ରଦାୟ ପକ୍ଷରୁ ବୁଧବାର ମହମ୍ମଦଙ୍କ ଜନ୍ମଦିନ ଅବସରରେ ଶାନ୍ତି ପଦଯାତ୍ରା ଓ ଧାର୍ମିକ ସଭା ମହାଆଡ଼ମ୍ବରରେ ଆୟୋଜିତ ହୋଇଯାଇଛି। ସ୍ଥାନୀୟ ଜାମା ମସ୍ଜିଦରୁ ବାହାରିଥିବା ଏହି ଶାନ୍ତି ପଦଯାତ୍ରା ପଠାଣ ସାହି ମଦରସା ଓ ଆଖପାଖ ଅଞ୍ଚଳ ପରିକ୍ରମା କରି ମସଜିଦ ପ୍ରାଙ୍ଗଣରେ ଶେଷ ହୋଇଥିଲା, ଯେଉଁଥିରେ ଶତାଧିକ ଲୋକ ଅଂଶଗ୍ରହଣ କରିଥିଲେ।
ଏହି ଅବସରରେ ଅନୁଷ୍ଠିତ ଧାର୍ମିକ ଆଲୋଚନା ସଭାରେ ଜାମା ମସ୍ଜିଦର ଇମାମ ହାମିଦ ରଜା, ପୂର୍ବତନ ଇମାମ ମହମ୍ମଦ ତାଜମଲ ହୁସେନ ରିଜଓ୍ବି ଓ ପୂର୍ବତନ ମୌଲବୀ ଅବଦୁଲ ସତାର ଯୋଗଦେଇ ୍ମହମ୍ମଦଙ୍କ ଜୀବନୀ, ମାନବ ସେବା ଓ ଭାଇଚାରା ଉପରେ ଆଲୋକପାତ କରିଥିଲେ। ସମାଜରୁ ଅନ୍ଧବିଶ୍ୱାସ ଦୂର କରିବା, ଶ୍ରମିକଙ୍କୁ ଉଚିତ ସମ୍ମାନ ଓ ପ୍ରାପ୍ୟ ଦେବା, ଭୋକିଲା ଓ ଆର୍ଥିକ ଅସୁବିଧାରେ ଥିବା ଲୋକଙ୍କୁ ସାହାଯ୍ୟ କରିବା ଏବଂ ନିଜ ଆୟର କିଛି ଅଂଶ ଗରିବଙ୍କ କଲ୍ୟାଣରେ ବ୍ୟୟ କରିବା ପାଇଁ ସେମାନେ ଆହୱାନ ଦେଇଥିଲେ।
ମସ୍ଜିଦ୍ ସଭାପତି ମହମ୍ମଦ ଜାମିଲ, ସମ୍ପାଦକ ସୟଦ କରିମ୍ଙ୍କ ସମେତ ସମ୍ପ୍ରଦାୟର ଅନେକ ବ୍ୟକ୍ତି ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ। ଆଇଆଇସି ବିଜୟ କୁମାର ସାଇଁଙ୍କ ନେତୃତ୍ୱରେ ସ୍ଥାନୀୟ ପୋଲିସ ବାହିନୀ ସମ୍ପୂର୍ଣ୍ଣ ସହଯୋଗ କରିବାରୁ କାର୍ଯ୍ୟକ୍ରମଟି ଶାନ୍ତିଶୃଙ୍ଖଳାର ସହ ସମ୍ପନ୍ନ ହୋଇଥିଲା।