ବରଗଡ଼,୧୦।୭(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ବର୍ଷା ଲାଗି ରହିଛି। ବର୍ଷା ଯୋଗୁ ଜିଲାରେ ଜନ ଜୀବନ ପ୍ରଭାବିତ ହୋଇଛି। ଜିଲାର ଗାଁଠୁ ସହର ପର୍ଯ୍ୟନ୍ତ ଅନେକ ଗଳିକନ୍ଦିରେ ବର୍ଷାପାଣି ନିଷ୍କାସିତ ନ ହୋଇ ଜମି ରହିଛି। ଫଳରେ ଯାତାୟାତ ସମସ୍ୟା ଉପୁଜିଛି। ସେହିପରି କେତେକ ସ୍ଥାନରେ ମାଟିଘର ଭାଙ୍ଗିଥିବା ସୂଚନା ମିଳିଥିବାବେଳେ ଉଭୟ ଗାଁ ଏବଂ ସହରର ତଳି ଅଞ୍ଚଳରେ ରହିଥିବା ଘର ଗୁଡ଼ିକ ବର୍ଷାପାଣି ଘେରରେ ରହିଛି। ଫଳରେ ପୂର୍ବାପେକ୍ଷା ବର୍ଷା ପରିମାଣ ହ୍ରାସ ପାଇଥିଲେ ସୁଦ୍ଧା ଏପର୍ଯ୍ୟନ୍ତ ଲୋକଙ୍କ ଦୁର୍ଦ୍ଦଶା ଥମି ନାହିଁ। ବରଗଡ଼ ପୌର ପରିଷଦ ଅଧିନ ୱର୍ଡ଼ ନଂ.୧ ଜୀରା କଲୋନୀ ଭଳି କେତେକ ଅଞ୍ଚଳରେ ଏବେ ମଧ୍ୟ ଲୋକଙ୍କ ଦୁଃଖ ଲାଗି ରହିଛି। ଜୀରା କଲୋନୀ ଜଳମଗ୍ନ ହୋଇଯିବା ପରେ ସେମାନଙ୍କୁ ଉଦ୍ଧାର କରାଯାଇ ସ୍ଥାନୀୟ କମ୍ୟୁନିଟି ସେଣ୍ଟରକୁ ଅଣାଯାଇଥିଲା। ସେଠାକୁ ପୌରାଧ୍ୟକ୍ଷା କଳ୍ପନା ମାଝୀ, ପୌର କାର୍ଯ୍ୟନିର୍ବାହୀ ଅଧିକାରୀ ଦେବାନନ୍ଦ ସାହୁ, ତହସିଲଦାର ସୋନାଲି ପଟ୍ଟନାୟକ, ଉଦ୍ଧବ ସେଟ୍ ପ୍ରମୁଖ ପହଞ୍ଚତ୍ ଚୂଡ଼ା, ଗୁଡ଼ ଏବଂ ରନ୍ଧାଖାଦ୍ୟ ବଣ୍ଟନ କରିଥିଲେ। ସେହିପରି ବରଗଡ଼ ବ୍ଲକ ଅନ୍ତର୍ଗତ ଡାଙ୍ଗ ନଦୀପଡ଼ା ନିବାସୀ ଶମ୍ଭୁ ମହଲାଙ୍କ ଘରକାନ୍ଥ ମଙ୍ଗଳବାର ରାତିରେ ଭାଙ୍ଗିଯାଇଛି। ରାତିରେ ଶୋଇଥିବା ବେଳେ ଏହି ଅଘଟଣ ଘଟିଥିବାବେଳେ ସୌଭାଗ୍ୟକ୍ରମେ ପରିବାର ଲୋକେ ଏକ ବଡ଼ ବିପଦରୁ ରକ୍ଷା ପାଇଛନ୍ତି। ଅନୁରୂପଭାବେ ସ୍ଥାନୀୟ ସୀତାରାମ କର, ମଥିଲା ଭାଟିଙ୍କ ଘର ମଧ୍ୟ ଭାଙ୍ଗିଥିବା ସୂଚନା ମିଳିଛି।
ବରଗଡ଼ ଜିଲାରେ ବୃଷ୍ଟିପାତ ପରିମାଣ
ବର୍ଷା ପରିମାଣ ହ୍ରାସ ପାଇ ବସିଛି। କିନ୍ତୁ ଏବେ ମଧ୍ୟ ବର୍ଷା ଲାଗି ରହିଛି। ସେହିପରି ଲୋକଙ୍କ ଦୁର୍ଦ୍ଦଶା ମଧ୍ୟ ଥମି ନାହିଁ। ବୁଧବାର ଜିଲାରେ ୫୦୦.୧ମିମି ବୃଷ୍ଟିପାତ ରେକର୍ଡ଼ ହୋଇଛି। ସେଥିମଧ୍ୟରୁ ଅମ୍ବାଭୋନା ବ୍ଲକରେ ୨୦, ଅତାବିରାରେ ୫୩, ବରଗଡ଼ରେ ୮୪, ବରପାଲିରେ ୫୩, ଭଟଲିରେ ୩୭, ଭେଡ଼େନରେ ୨୦, ବିଜେପୁରରେ ୪୪, ଗାଇସିଲେଟରେ ୩୦.୧, ଝାରବନ୍ଧରେ ୫୧, ପଦ୍ମପୁରରେ ୨୪, ପାଇକମାଳରେ ୩୦ ଏବଂ ସୋହେଲା ବ୍ଲକରେ ୫୪ମି.ମି ବୃଷ୍ଟିପାତ ରେକର୍ଡ଼ ହୋଇଛି। ଅନ୍ୟପଟେ ମଙ୍ଗଳବାର ଜିଲାରେ ୨୧୪.୪ମିମି ବୃଷ୍ଟିପାତ ହୋଇଥିବା ରେକର୍ଡ଼ କରାଯାଇଥିଲା। ସେଥିରୁ ଅମ୍ବାଭୋନା ବ୍ଲକରେ ୨, ଅତାବିାରେ ୪୫, ବରଗଡ଼ରେ ୨୬.୬, ବରପାଲିରେ ୨୫, ଭଟଲିରେ ୧୩.୬, ଭେଡ଼େନରେ ୨୦.୨, ବିଜେପୁରରେ ୨୧, ଗାଇସିଲେଟରେ ୧୩, ଝାରବନ୍ଧରେ ୨୧, ପଦ୍ମପୁରରେ ୧, ପାଇକମାଳରେ ୧୮ ଏବଂ ସୋହେଲାରେ ୮ମିମି ବୃଷ୍ଟିପାତ ହୋଇଥିବା ରେକର୍ଡ଼ କରାଯାଇଛି। ତେବେ ସୋମବାର ଜିଲାରେ ସର୍ବାଧିକ ୫୫୪.୬ମିମି ବୃଷ୍ଟିପାତ ହୋଇଥିବା ସରକାରୀଭାବେ ରେକର୍ଡ କରାଯାଇଥିଲା। ସେଥିରୁ ଅମ୍ବାଭୋନାରେ ୮୯, ଅତାବିରାରେ ୯୭, ବରଗଡ଼ରେ ୭୩, ବରପାଲିରେ ୧୫, ଭଟଲିରେ ୧୫୯, ଭେଡ଼େନରେ ୧୦, ବିଜେପୁରରେ ୧୭.୫, ଗାଇସିଲେଟରେ ୫.୧, ଝାରବନ୍ଧରେ ୨୭, ପଦ୍ମପୁରରେ ୯, ପାଇକମାଳରେ ୨୩ ଏବଂ ସୋହେଲା ବ୍ଲକରେ ୩୦ମିମି ବୃଷ୍ଟିପାତ ହୋଇଥିବା ରେକର୍ଡ଼ କରାଯାଇଥିଲା।
