ଦୁବାଇ,୨।୧୧: କିଙ୍ଗସ ଏକାଦଶ ପଞ୍ଜାବ ବିପକ୍ଷରେ ବିଜୟ ସହ ମହେନ୍ଦ୍ର ସିଂ ଧୋନୀଙ୍କ ଚେନ୍ନାଇ ସୁପର କିଙ୍ଗ୍ସ ଆଇପିଏଲ ୨୦୨୦ରେ ନିରାଶାଜନକ ଯାତ୍ରା ଶେଷ କରିଛି। ପୁରା ଟୁର୍ନାମେଣ୍ଟରେ ମହେନ୍ଦ୍ର ସିଂ ଧୋନୀ ଅନେକ ଦଳର ଖେଳାଳିଙ୍କୁ ତାଙ୍କ ଜର୍ସି ଦେଉଥିବାର ନଜର ଆସିଥିଲେ। ଶେଷ ମ୍ୟାଚ୍ରେ ଏହାର କାରଣ ବିଷୟରେ ଖୁଲାସା କରିଛନ୍ତି ମାହି। ମ୍ୟାଚ ପରେ ସମୀକ୍ଷକ ହର୍ଷ ଭୋଗଲେ ଧୋନୀଙ୍କୁ ପଚାରିଥିଲେ, ଆପଣଙ୍କ ପାଖରେ କିଛି ଜର୍ସି ବାକି ଅଛି କି, କାରଣ ଟୁର୍ନାମେଣ୍ଟରେ ସମସ୍ତେ ଆପଣଙ୍କଠାରୁ ଜର୍ସି ନେଉଥିବାର ଦେଖାଯାଇଛି। ଏହାର ଉତ୍ତରରେ ଧୋନୀ କହିଛନ୍ତି, ମୁଁ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଛି, ତେବେ ସେମାନେ ନିଶ୍ଚୟ ଭାବିଥିବେ ଯେ ମୁଁ ମଧ୍ୟ ଆଇପିଏଲରୁ ଅବସର ନେଉଛି କିନ୍ତୁ ଏହା ଆଦୌ ନୁହେଁ। ୨୦୨୧ ଆଇପିଏଲରେ ଖେଳିବେ କି ନାହିଁ ବୋଲି ହର୍ଷ ଭୋଗଲେ ପଚାରିଥିଲେ, ମାହି ଉତ୍ତର ଦେଇ କହିଥିଲେ, ପରବର୍ତ୍ତୀ ସିଜିନ୍ ଆରମ୍ଭ ହେବାକୁ ମାତ୍ର ୫ ମାସ ବାକି ଅଛି ଏବଂ କୌଣସି ଲକ୍ଡାଉନ୍ ନାହିଁ। ତେଣୁ ଏହା ମଧ୍ୟରେ ଦଳକୁ ଅଧିକ ମଜଭୁତ କରିବା ପାଇଁ ଚେଷ୍ଟା କରାଯିବ। କିଙ୍ଗସ ଏକାଦଶ ପଞ୍ଜାବ ବିପକ୍ଷ ମ୍ୟାଚ ପୂର୍ବରୁ ଟସ୍ ସମୟରେ ଏମଏସ ଧୋନୀ ଘୋଷଣା କରିଥିଲେ ଯେ, ସେ ଆଇପିଏଲରେ ଖେଳିବା ଜାରି ରଖିବେ ଏବଂ ଏବେ ଅବସର ନେବାକୁ ତାଙ୍କର କୌଣସି ଉଦ୍ଦେଶ୍ୟ ନାହିଁ।
