ମୁମ୍ବାଇ: ବଲିଉଡ୍ ନାୟକ ସୁଶାନ୍ତ ସିଂ ରାଜପୁତଙ୍କ ମୃତ୍ୟୁକୁ ପାଖାପାଖି ୩ ମାସ ବିତି ଯାଇଥିବା ବେଳେ ଏବେବି ଏହା ରହସ୍ୟ ଘେରରେ ରହିଛି । ପ୍ରକୃତରେ ଏହା ହତ୍ୟା କି ଆତ୍ମହତ୍ୟା ତାହା ସ୍ପଷ୍ଟ ହୋଇପାରି ନାହିଁ । ଦେଶର ସବୁଠାରୁ ବଡ ୩ ଯାଞ୍ଚଏଜେନ୍ସି ସିବିଆଇ, ଏନ୍ସିବି ଓ ଇଡି ଆରମ୍ଭରୁ ଏହାର ଯାଞ୍ଚରେ ଲାଗି ପଡିଛନ୍ତି । ଅନ୍ୟପଟେ ଏହି ଘଟଣାକୁ ନେଇ ନିର୍ମାଣ ହେବାକୁ ଥିବା ଫିଲ୍ମର ଘୋଷଣା ସରିଲାଣି । ଶୁଣିବାକୁ ମିଳିଛି ଏହାର ପ୍ରଯୋଜନା ଭାର ସମ୍ଭାଳିଛନ୍ତି ସରଳା ସାରାଗୋଇ ଓ ରାହୁଲ ଶର୍ମା । ଆଉ ଏହାର ନିର୍ଦ୍ଦେଶନା ଦେବେ ଦିଲିପ ଗୁଲାଟି । ଜୁବୈର ଖାଁ ଏଥିରେ ସୁଶାନ୍ତଙ୍କ ଚରିତ୍ରରେ ନଜର ଆସିବେ । ସୁଶାନ୍ତଙ୍କ ମୃତ୍ୟୁ ମାମଲାର ମୁଖ୍ୟ ଅଭିଯୁକ୍ତ କୁହାଯାଉଥିବା ରିଆ ଚକ୍ରବତ୍ତୀଙ୍କ ଭୂମିକାରେ ଶ୍ରେୟା ଶୁକ୍ଳା ନଜର ଆସିବେ ବୋଲି ଜଣାପଡିଛି । ଶ୍ରେୟା ଏହା ପୂର୍ବରୁ ଏକ ୱେବ ସିରିଜରେ କାମ କରି ସାରିଛନ୍ତି । ଶକ୍ତି କପୁର ଏଥିରେ ଜଣେ ସିବିଆଇ ଅଧିକାରୀ ଭୂମିକାରେ ନଜର ଆସିବେ । ଅରୁଣ ବକ୍ସି ସୁଶାନ୍ତଙ୍କ ପିତା ଭୂମିକାରେ ଓ ଅମନ ବର୍ମା ଜଣେ ଇଡି ଅଧିକାରୀ ଭାବେ ଆସିବେ ବୋଲି ଜଣାପଡିଛି । ବହୁ ପରିଚିତ ଅଭିନେତା ଆସରାନି ଓ ସୁଧା ଚନ୍ଦ୍ରନ ଏହି ଫିଲ୍ମରେ କିଛି ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିପାରନ୍ତି । ଏବେ ଫିଲ୍ମର କାଷ୍ଟ ଓ କ୍ରିୟୁ ଏକ ପ୍ରକାର ସ୍ଥିର ହୋଇ ସାରିଥିବା ବେଳେ ଏବେ ରିଲିଜ୍ ଡେଟ୍କୁ ଅପେକ୍ଷା ।
