ନରସିଂହପୁର,୭ା୫(ସ୍ବ.ପ୍ର.): କଟକ ଜିଲା ନରସିଂହପୁର ପଶ୍ଚିମାଞ୍ଚଳ ବନ ବିଭାଗ ଅନ୍ତର୍ଗତ ବାଲିକିଆରୀ ରିଜର୍ଭ ଜଙ୍ଗଲର କମ୍ପାର୍ଟମେଣ୍ଟ ୭ରେ ୩ ଦିନ ଧରି ଚିକିତ୍ସାଧୀନ ଥିବା ଏକ ମାଈ ହାତୀର ଶୁକ୍ରବାର ମୃତ୍ୟୁ ଘଟିଛି। ଉକ୍ତ ସ୍ଥାନରେ ବୁଧବାର ହାତୀଟି ଅସୁସ୍ଥ ହୋଇ ବୁଲୁଥିବାବେଳେ ବନ ବିଭାଗ କର୍ମଚାରୀ ଦେଖିଥିଲେ। ପରେ ସେମାନେ ରେଞ୍ଜର ପ୍ରଫୁଲ୍ଲ କୁମାର ହେହୁରୀଙ୍କୁ ଜଣାଇଥିଲେ। ଦେହୁରୀ ଘଟଣାସ୍ଥଳକୁ ଯାଇ ହାତୀ ଅବସ୍ଥା ଦେଖି ଉପରିସ୍ଥ ଅଧିକାରୀଙ୍କୁ ଅବଗତ କରାଇଥିଲେ । ସ୍ଥାନୀୟ ପ୍ରାଣୀଧନ ଚିକିତ୍ସକ ବିଜୟ କୁମାର ସେନାପତି ପହଞ୍ଚତ୍ ହାତୀର ଚିକିତ୍ସା କରାଇଥିଲେ। ଅତ୍ୟଧିକ ଗ୍ରୀଷ୍ମ ଓ ଜଳାଭାବ କାରଣରୁ ହାତୀଟି ଅସୁସ୍ଥ ହୋଇପଡିଥିବା ସେନାପତି କହିଛନ୍ତି। ତେବେ ସମସ୍ତ ଉଦ୍ୟମ ସତ୍ତ୍ୱେ ହାତୀର ସ୍ବାସ୍ଥ୍ୟାବସ୍ଥାରେ କୌଣସି ପରିବର୍ତ୍ତନ ଆସି ନ ଥିଲା। ମୃତ ହାତୀ ୧୨ରୁ ୧୩ ବର୍ଷର ହେବ ବୋଲି ବନ ବିଭାଗ ତରଫରୁ କୁହାଯାଇଛି। ତା’ର ମୃତଦେହ ବ୍ୟବଚ୍ଛେଦ ପରେ ରିଜର୍ଭ ଜଙ୍ଗଲ ମଧ୍ୟରେ ପୋତି ଦିଆଯାଇଛି।
