ବସ୍ ହେଉ ଅଥବା ରେଳ, ଅନେକ ସମୟରେ ସରକାରୀ ଗାଡ଼ିରେ ସିଟ୍ ପାଇଁ ଯାତ୍ରୀମାନଙ୍କ ମଧ୍ୟରେ ଝଗଡ଼ା ଦେଖିବାକୁ ମିଳିଥାଏ। ହେଲେ ଯଦି ବିମାନରେ ସେଭଳି ଘଟେ ତାହା ଚକିତ କରିବା ସ୍ବାଭାବିକ। ଆମେରିକାର କାଲିଫର୍ନିଆର ସାକ୍ରାମେଣ୍ଟୋ ବିମାନବନ୍ଦରରେ ଏଭଳି ଏକ ଘଟଣା ଦେଖିବାକୁ ମିଳିଛି। ସେଠାରେ ଜଣେ ମହିଳା ଏବଂ ତାଙ୍କ ଝିଅଙ୍କ ସିଟ୍ ପାଇଁ ଏଭଳି ଝଗଡ଼ା କରିଥିଲେ ଯେ ବିମାନଟି ବିମାନବନ୍ଦରରେ ଏକ ଘଣ୍ଟା ଧରି ଛିଡ଼ା ହୋଇରହିଥିଲା। ବହୁତ କଷ୍ଟରେ ଉଭୟଙ୍କୁ ବିମାନରୁ ଓହ୍ଲାଇବା ପରେ ଅନ୍ୟ ଯାତ୍ରୀମାନେ ଶାନ୍ତିରେ ନିଶ୍ୱାସ ମାରିଥିଲେ।
ଘଟଣାଟି ଦକ୍ଷିଣପଶ୍ଚିମ ଏୟାରଲାଇନ୍ସର ଏକ ବିମାନର। ଉକ୍ତ ବିମାନଟି କାଲିଫର୍ନିଆର ସାକ୍ରାମେଣ୍ଟୋ ବିମାନବନ୍ଦରରୁ ଉଡାଣ ଭରିବାର ଥିଲା। ହେଲେ ବିମାନର ଯାତ୍ରୀମଧ୍ୟରେ ସେହି ମା-ଝିଅ ରହିଥିଲେ। ସେମାନେ ଟିକେଟ ବୁକ୍ କରିଥିଲେ ହେଁ ସିଟ୍ ଆବଣ୍ଟନ ‘ପ୍ରଥମେ ଆସ, ପ୍ରଥମେ ପାଅ’ ଆଧାରରେ ହୋଇଥିଲା। ଉଭୟ ବହୁତ ବିଳମ୍ବରେ ପହଞ୍ଚିଥିଲେ, ସେଥିପାଇଁ ତାଙ୍କୁ ପାର୍ଶ୍ୱ ସିଟ୍ ମିଳିପାରି ନ ଥିଲା।
ବିମାନଟି ସମ୍ପୂର୍ଣ୍ଣ ପ୍ୟାକ୍ ଥିବାରୁ ସେ ଚାହୁଁଥିବା ଦ୍ୱିତୀୟ ସିଟ୍ ନ ଥିବା କର୍ମଚାରୀମାନେ ତାଙ୍କୁ କହିଥିଲେ। ଏପରିକି ସେମାନେ ଚାହିଁଲେ ଅନ୍ୟ ଏକ ବିମାନରେ ଯାଇପାରିବେ ବୋଲି ପରାମର୍ଶ ଦେଇଥିଲେ। ହେଲେ ଉଭୟ ଜିଦ୍ରେ ଅଟଳ ଥିଲେ। ଅନ୍ୟ ଯାତ୍ରୀଙ୍କ ମଧ୍ୟରୁ କେହି ସିଟ୍ ଛାଡ଼ିବେ ବୋଲି ସେ ଆଶା କରୁଥିଲେ। ଅପରପକ୍ଷେ ବିମାନ କର୍ମଚାରୀ ତାଙ୍କୁ ମନାଇବା ପାଇଁ ବାରମ୍ବାର ଚେଷ୍ଟା କରିଥିଲେ। ମାତ୍ର ସେ ଶୁଣି ନ ଥିଲେ। ଧିରେ ଧିରେ ସେ ବିମାନ କର୍ମଚାରୀଙ୍କ ସହ ଯାତ୍ରୀମାନଙ୍କ ସହ ମଧ୍ୟ ପାଟିତୁଣ୍ଡ କରିବା ଆରମ୍ଭ କରିଥିଲେ। ମା-ଝିଅଙ୍କ ଏଭଳି କାର୍ଯ୍ୟ ଯୋଗୁ ବିମାନଟି ଦୀର୍ଘ ଏକ ଘଣ୍ଟା ଧରି ବିମାନବନ୍ଦରରେ ଛିଡ଼ା ହୋଇଥିଲା।
ବିମାନରେ ସିଟ୍କୁ ନେଇ ଏଭଳି କାଣ୍ଡ ଦେଖି ଅନ୍ୟ ଯାତ୍ରୀମାନେ ଅସନ୍ତୋଷ ପ୍ରକାଶ କରିଥିଲେ। କ୍ରୁ ସଦସ୍ୟମାନେ ଉଭୟଙ୍କୁ ବିମାନରୁ ଓହ୍ଲାଇଦେଇଥିଲେ। ଏହାପରେ ଅନ୍ୟ ଯାତ୍ରୀମାନେ କରତାଳି ଦେଇ ନିଜର ଖୁସି ବ୍ୟକ୍ତ କରିଥିଲେ। ବିମାନରେ ଥିବା ଜଣେ ଯାତ୍ରୀ ଏହି ଘଟଣାର ଭିଡିଓ ପ୍ରସ୍ତୁତ କରିଥିଲେ। ଟିକ୍ଟକ୍ରେ ସେ ଏହାକୁ ଛାଡ଼ିବା ପରେ ତାହା ଭାଇରାଲ ହେଉଛି।
