ବଲାଙ୍ଗୀର,୯ା୬(ସୁନିଲ କୁମାର ମହାନ୍ତି): ବଲାଙ୍ଗୀର ସହର ଗାନ୍ଧୀ ନଗର ପଡା ଏନ୍ ଏଚ ୨୬ ନମ୍ବର ରାସ୍ତାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ହୋଇଛି । ମା’-ଝିଅ ଦୁଇ ଜଣଙ୍କ ଜୀବନ ଯାଇଥିବା ଜଣାପଡିଛି ।
ସୂଚନା ଅନୁଯାୟୀ, ମା’ ଝିଅ ଏକ ସ୍କୁଟିରେ ଯାଉଥିବା ବେଳେ ରାସ୍ତା ଉପରେ ପଡ଼ିଥିବା ବନ୍ଧ ଖୋଳା ମାଟିରେ ସ୍କୁଟି ଚକ ସ୍ଲିପ୍ ହୋଇଥିଲା । ଏହି ସମୟରେ ପଛପଟୁ ଆସୁଥିବା ଏକ ଟ୍ରକ ଧକ୍କା ଦେଇ ଫେରାର ହୋଇଯାଇଥିବା ଜଣାପଡିଛି । ଦୁର୍ଘଟଣା ଏତେ ଭୟଙ୍କର ରହିଥିଲା ଯେ, ଘଟଣାସ୍ଥଳରେ ମା’ ସୁନୀତା ନାଗ ଓ ଝିଅ ଶ୍ରୁତି ନାଗ ( ତାଲପାଲି ପଡା)ଙ୍କ ମୃତ୍ୟୁ ହୋଇଥିବା ଜଣାପଡିଛି ।
କିଛି ଦିନ ହେଲା ବଲାଙ୍ଗୀର ସହରର ୧୧ଟି ଜଳାଶୟର ମାଟି ଉନ୍ନୟନ କାମ ଏବେ ଚାଲିଛି । ବଲାଙ୍ଗୀର ପୌପରିଷଦ ପକ୍ଷରୁ ଏହି ଉନ୍ନୟନ କାମ କରାଯାଉଛି । ଶନିବାର ଜଳାଶୟ ମାଟି ଉନ୍ନୟନ କାମକୁ ନେଇ ବିଜେଡି ଓ କଂଗ୍ରେସ ମୁହାଁ ମୁହିଁ ହୋଇଥଲେ । ଜଳାଶୟ ର ମାଟି ସ୍ଥାନାନ୍ତରଣ ବେଳେ ସହରର ବିଭିନ୍ନ ରାସ୍ତା ଉପରେ ମାଟି ପଡ଼ିବା ଯୋଗୁଁ ରାସ୍ତା କାଦୁଅମୟ ହେବା ଯୋଗୁଁ ଜନ ଅସନ୍ତୋଷ ଦେଖାଦେଇଥିଲା । କାଦୁଅମୟ ପିଚୁ ରାସ୍ତାରେ ଏବେ ଲୋକେ ଯିବାଆସିବା କଲା ବେଳକୁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି ।
ଆଜି ସକାଳୁ ଏକ ଘରୋଇ ହସପିଟାଲରେ କାମ କରୁଥିବା ମା’ଙ୍କୁ ସ୍କୁଟିରେ ତାଙ୍କ ଝିଅ ଛାଡିବାକୁ ନେଲାବେଳେ ବଲାଙ୍ଗିର ସମ୍ବଲପୁର ରାସ୍ତା ଗାନ୍ଧୀନଗର ପଡା ଠାରେ ଦୁର୍ଘଟଣା ଘଟିଥିଲା । ପିଚୁ ରାସ୍ତାରେ ମା’ ଝିଅ ସ୍କୁଟିରେ ଯାଉଥିବା ବେଳେ ରାସ୍ତା ଉପରେ ପଡ଼ିଥିବା ଜଳାଶୟର କାଦୁଅ ମାଟିରେ ସ୍କୁଟି ସ୍ଲିପ୍ କରିଯାଇଥିଲା ।ମାଆ ଓ ଝିଅ ତଳେ ପଡ଼ିଯିବା ପରେ ମୁଣ୍ଡ ଉପରେ ଟ୍ରକ ଚଢି ଯାଇଥିବା କୁହାଯାଉଛି । ଦୁର୍ଘଟଣାସ୍ଥଳରେ ପୋଲିସ ପହଞ୍ଚି ଶବକୁ ଉଦ୍ଧାର କରି ଭୀମ ଭୋଇ ମେଡିକାଲ କଲେଜ ଓ ହସ୍ପିଟାଲକୁ ନେଇଥିବା ଜଣାପଡିଛି । ଅନ୍ୟ ପଟେ ଟାଉନ୍ ପୋଲିସ ଦୁର୍ଘଟଣାକୁ ନେଇ ତଦନ୍ତ କରୁଥିବା ଜଣାପଡିଛି ।
