ନୂଆଦିଲ୍ଲୀ,୬।୨: ଜମ୍ମୁ-କଶ୍ମୀରର ଲୋକ ସଭା ଏବଂ ବିଧାନସଭା ନିର୍ବାଚନ ମଣ୍ଡଳୀ ସୀମାରେ ବ୍ୟାପକ ପରିବର୍ତ୍ତନ ଲାଗି ସୀମା ନିର୍ଦ୍ଧାରଣ କମିଶନ ପ୍ରସ୍ତାବ ଦେଇଛନ୍ତି। କମିଶନ ପ୍ରସ୍ତୁତ କରିଥିବା ଚିଠା ରିପୋର୍ଟ ଉପରେ ମତାମତ ପାଇଁ ଏହାକୁ ଉକ୍ତ କେନ୍ଦ୍ରଶାସିତ ଅଞ୍ଚଳର ୫ ଆସୋସିଏଟ୍ ମେମ୍ବରଙ୍କୁ ପ୍ରଦାନ କରାଯାଇଛି। ଉକ୍ତ ରିପୋର୍ଟ ଅନୁଯାୟୀ ଅନନ୍ତନାଗ ସଂସଦୀୟ କ୍ଷେତ୍ରରେ ଜମ୍ମୁ ଅଞ୍ଚଳର ରାଜୌରି ଏବଂ ପୁଞ୍ଚ୍କୁ ସାମିଲ କରିବାକୁ ପ୍ରସ୍ତାବ ଦିଆଯାଇଛି। ଏହା ବ୍ୟତୀତ କଶ୍ମୀର ଡିଭିଜନ୍ରେ ଥିବା ନିର୍ବାଚନ ମଣ୍ଡଳୀଗୁଡ଼ିକରେ ବ୍ୟାପକ ପରିବର୍ତ୍ତନ କରାଯିବ। ଜମ୍ମୁ-କଶ୍ମୀର ରାଜ୍ୟ ବିଧାନସଭାର ଅଧିକାଂଶ ଆସନ ଉଚ୍ଛେଦ ହେବ। ସେଥିରେ ପ୍ରବାସୀ କଶ୍ମୀର ପଣ୍ଡିତମାନଙ୍କ ପାରମ୍ପରିକ ନିର୍ବାଚନ ମଣ୍ଡଳୀ ହବ୍ବା କାଡାଲ ରହିଛି। ଶ୍ରୀନଗରର ଖାନ୍ୟାର, ସୋନଓ୍ବର ଏବଂ ହଜରତବଲ୍ ବିଧାନସଭା ଆସନକୁ ବାଦ୍ ଦେଲେ ଅନ୍ୟ ଆସନଗୁଡ଼ିକର ସୀମା ବଦଳିବା ସହ କେତେକ ନୂଆ ଆସନରେ ମିଶିଯିବ। ସେହିପରି ଚନ୍ନାପୋରା ଏବଂ ଶ୍ରୀନଗର ଦକ୍ଷିଣ ନୂଆ ନିର୍ବାଚନ ମଣ୍ଡଳୀ ହେବ ବୋଲି ଚିଠା ରିପୋର୍ଟରେ ପ୍ରସ୍ତାବ ରହିଛି। ହବ୍ବା କାଡାଲର ଭୋଟରଙ୍କୁ ତିନୋଟି ନୂଆ ନିର୍ବାଚନ ମଣ୍ଡଳୀ ମଧ୍ୟରେ ଭାଗ କରାଯିବ।
ସେହିପରି ବଡ୍ଗାମ ଜିଲାର ୫ ବିଧାନସଭା ଆସନର ସୀମା ନିର୍ଦ୍ଧାରଣ ହେବା ସହ ବାରମୁଲ୍ଲା ସଂସଦୀୟ କ୍ଷେତ୍ରରେ ମିଶ୍ରଣ ହେବ ଏବଂ କେତେକ ଅଞ୍ଚଳ ଅଲଗା ହୋଇ ନୂଆ ନିର୍ବାଚନ ମଣ୍ଡଳୀ ଗଠନ ହେବ। ଉତ୍ତର କଶ୍ମୀରର ସାଙ୍ଗ୍ରାମା ଆସନକୁ ଅନ୍ୟ ନିର୍ବାଚନ ମଣ୍ଡଳୀରେ ମିଶାଇ ଦିଆଯାଇଛି। ପୁଲ୍ଓ୍ବାମା, ଟ୍ରାଲ ଏବଂ ଶୋପିଆନ୍ର କେତେକ ଅଞ୍ଚଳ ଅନନ୍ତନାଗ ଲୋକ ସଭା ନିର୍ବାଚନ ମଣ୍ଡଳୀ ଅନ୍ତର୍ଗତ ହୋଇଥିବାବେଳେ ଏବେ ତାହା ଶ୍ରୀନଗର ସଂସଦୀୟ କ୍ଷେତ୍ର ଅନ୍ତର୍ଭୁକ୍ତ ହେବାକୁ ଯାଉଛି। ଏହି ଚିଠା ରିପୋର୍ଟକୁ ଆସୋସିଏଟ୍ ସଦସ୍ୟ ଫାରୁକ୍ ଅବଦୁଲ୍ଲା, ହାସନୈନ ମାସୁଦି, ଆକବର ଲୋନ୍(ନ୍ୟାଶନାଲ କଂଗ୍ରେସର ଲୋକ ସଭା ଏମ୍ପି), ଜିତେନ୍ଦ୍ର ସିଂ ଏବଂ ଯୁଗଳ କିଶୋର (ଭାଜପା ଏମ୍ପି)ଙ୍କ ପାଖକୁ ପଠାଯାଇଛି। ସେମାନଙ୍କୁ ଫେବୃୟାରୀ ୧୪ ସୁଦ୍ଧା ମତାମତ ଦାଖଲ କରିବାକୁ କୁହାଯାଇଛି। ଏହା ପରେ ଉକ୍ତ ରିପୋର୍ଟକୁ ସର୍ବସାଧାରଣଙ୍କ ଅବଗତି ନିମନ୍ତେ ପ୍ରକାଶ କରାଯିବ। ଜମ୍ମୁ-କଶ୍ମୀର ରାଜ୍ୟକୁ ଦୁଇଟି କେନ୍ଦ୍ରଶାସିତ ଅଞ୍ଚଳରେ ବିଭକ୍ତ କରାଯିବା ପରେ ନିର୍ବାଚନ ମଣ୍ଡଳୀଗୁଡ଼ିକର ସୀମା ନିର୍ଦ୍ଧାରଣ ଲାଗି ୨୦୨୦ ମାର୍ଚ୍ଚ ୬ରେ ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତି ରଞ୍ଜନା ଦେଶାଇଙ୍କ ଅଧ୍ୟକ୍ଷତାରେ କମିଶନ ଗଠନ କରାଯାଇଥିଲା। ଏଥିରେ ମୁଖ୍ୟ ନିର୍ବାଚନ କମିଶନ ସୁଶୀଲ ଚନ୍ଦ୍ରା ଏବଂ ରାଜ୍ୟ ନିର୍ବାଚନ କମିଶନ କେ.କେ. ଶର୍ମା ସଦସ୍ୟ ରହିଛନ୍ତି। ଗତବର୍ଷ ଫେବୃୟାରୀ ୧୮ ଏବଂ ଡିସେମ୍ବର ୨୦ରେ କମିଶନ ଆସୋସିଏଟ୍ ସଦସ୍ୟମାନଙ୍କ ସହ ଦୁଇଥର ବୈଠକ କରିଥିଲେ।
