ଲାହୋର,୧୦।୮: ବଲିଉଡ୍ ମୁଭି ‘ହିନ୍ଦି ମିଡିୟମ’ରେ ନଜର ଆସିଥିବା ଅଭିନେତ୍ରୀ ସବା କମରଙ୍କୁ ମିଳିଛି ହତ୍ୟା ଧମକ। ସୂଚନାଯୋଗ୍ୟ, ପାକିସ୍ତାନର ଲାହୋରରେ ଥିବା ଐତିହାସିକ ଓ୍ବାଜିର ଖାନ ମସଜିଦରେ ପାକିସ୍ତାନୀ ଅଭିନେତ୍ରୀ ସବା କମରଙ୍କୁ ମ୍ୟୁଜିକ ଭିଡିଓ ଶୁଟିଂ ପାଇଁ ଅନୁମତି ମିଳିଥିଲା। ସେଠାରେ ସେ ଶୁଟିଂ କରିବା ପରେ ଏବେ ସବାଙ୍କୁ ଏହି ଅନୁମତି ପ୍ରଦାନ କରିଥିବା ୨ ଅଧିକାରୀଙ୍କୁ ନିଲମ୍ବିତ କରାଯାଇଛି। ଏହାସହ ମସଜିଦର ପବିତ୍ରତା ନଷ୍ଟ କରିଥିବା ଅଭିଯୋଗରେ ସବା କମର ଓ ଗାୟକ ବିଲାଲ ସଇଦଙ୍କ ବିରୋଧରେ ଏଫ୍ଆଇଆର୍ ଦିଆଯାଇଛି। ଏହାକୁ ନେଇ ଅଭିନେତ୍ରୀ ସବା କମରଙ୍କୁ ସୋସିଆଲ ମିଡିଆରେ ହତ୍ୟା ଧମକ ଦିଆଯାଇଛି ବୋଲି ଜଣାପଡିଛି। ମନ୍ତ୍ରୀ ସଇଦ ହସନ ଶାହ କହିଛନ୍ତି ଯେଉଁମାନେ ମସଜିଦର ପବିତ୍ରତାକୁ ଭଙ୍ଗ କରିଛନ୍ତି ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। କାରଣ ମସଜିଦର ପବିତ୍ରତା ଭଙ୍ଗ କରିବାର ଅଧିକାର କାହାର ନାହିଁ। ସେଥିପାଇଁ ଶୁଟିଂ ଲାଗି ଯେଉଁମାନେ ଅନୁମତି ଦେଇଥିଲେ ତାଙ୍କୁ ପ୍ରଥମେ ନିଲମ୍ବିତ କରାଯାଇଛି। ଘଟଣାର ଯାଞ୍ଚ ଜାରି ରହିଛି। ତେବେ ସବା କମରଙ୍କୁ ସୋସିଆଲ ମିଡିଆରେ ହତ୍ୟା ଧମକ ମିଳିବା ପରେ ସେ କ୍ଷମା ମାଗି ନେଇଛନ୍ତି।
